VOV4.Bahnar – Kơsơ̆ năr 2/2 (năr 5 Têt), tơ̆ Lạng Sơn, lơ̆m tơdrong chơt hơ-iă Tơbăt 95 sơnăm năr tơ-iung pơjing Đảng Cộng sản Việt Nam (3/2), jơ̆p teh đak sô̆ Puih mak Ất Tỵ, Thủ tướng Phạm Minh Chính pơgơ̆r tơdrong hop akŏm hăm dôm anih jang tơm, rim tơring gah tơdrong hơtŏk tenh ming man jăl trong dơnơm Đồng Đăng (Lạng Sơn)-Trà Lĩnh (Cao Bằng) păng 'Măng sơlam Hữu Nghị-Chi Lăng.

VOV4.Bahnar - Đăk Ngọk jĭ xah mă blŭng tơ̆ apŭng Đăk Hà, dêh char Kon Tum pơgơ̆r Hop akŏm bơngai tang măt ăn Đảng ƀô̆ xah jăl jang 2025-2030. Jăl jang âu ki, Đảng ƀô̆, jơnŭm pơgơ̆r tơring păng kon pơlei lơ̆m xah hlôi tơplih 'nao, hơbĕch hơbal, hơpơi 'meh tơ-iung pơjing Đăk Ngọc jing tơring pơdrŏng jơnap. Lơ̆m dôm năr blŭng sơnăm, puih mak 'nao, Đăk Ngọk hlôi tơlĕch jang kiơ̆ tơchơ̆t hop akŏm Đảng, pơjing jơhngơ̆m pran hơrih 'nao vă tơring Đăk Ngọk hơtŏk tơ-iung kơjăp sơđơ̆ng.

VOV4.Bahnar - Hăm jơhngâm đon chơt hơiă kơ Đảng, hơiă kơ Têt Nguyên Đán Ất Tỵ 2025 păng tơbăt 95 sơnăm Năr pơjing Đảng CSVN (3/2/1930-3/2-2025), Tổng Bí thư Tô Lâm truh akŏm păng tơlĕch Têt pơtăm ‘long rim jơhnơr ƀlŏk hơdơ̆r kơ Ƀok Hô tơ̆ Ninh Bình.

VOV4.Bahnar - Kŭm hăm jơ̆p tơring lơ̆m teh đak, iŏk đơ̆ng adrol kơ Tết nguyên đán, tơ̆ 1,2 tơring lơ̆m Tây Nguyên, đe druh dăm tôm sơnăm chơt hơiă, năm khăm hơlen jơhngâm pran vă pơm linh.

VOV4.Bahnar

VOV4.Bahnar - Sơnăm 2024, yak hloh lơ mơmat tat long nol, tơdrong jang mŭk drăm kơ tơring Tây Nguyên hlôi iŏk đei hloh 484 rơbâu ti hlak jên, iŏk yua jô̆ păh lăp kơ̆l bơngai jô̆ pơhlom đei 78,5 triệu hlak jên, tŏk 16% pơting hăm sơnăm hơdrol. Sơnăm 2025 âu, hăm lơ tơdrong jang pơm trong gre kơdâu hrĕnh tŏk bŏk tơlĕch jang, gô pơm tơdrong ‘lơ̆ng vă tơring Tây Nguyên hơtŏk tơdrong ‘lơ̆ng pran, kơjăp yak mơ̆t lơ̆m jăl jang ‘nao

VOV4.Bahnar – Atŭm hăm jơ̆p teh đak, lơ̆m jơ năr grasia sơng puih mak 'nao Ất Tỵ, kon pơlei kon kông Tây Nguyên adoi chơt hơ-iă hăm dôm tơdrong tơplih kơ pơlei pơla, hơpơi minh sơnăm 'nao phĭ tơtŏ, jơnap sô̆ sôn.

VOV4.Bahnar - Ƀok Vốt-Bí thư Chi ƀô̆, pơm hloi Ƀok pơgơ̆r pơlei, Kră pơlei đei kon pơlei lui yom tơ̆ plei Brêp, xăh Đak Djrăng, apŭng Mang Yang, dêh char Gia Lai hơnơ̆ng čhôk ‘nă plei Brêp jĭ plei blŭng a đei Anih vei lăng kon pơlei apŭng Mang Yang chih tơbăt jĭ Plei tơring tơrang ‘nao tơ̆ tơring kon kông” đơ̆ng sơnăm 2019. Lơ sơnăm âu ki, plei Brêp oei vei kơjăp hơnăn ‘nŏh, tơdrong arih xa roi tŏk ‘lơ̆ng hlŏh dơ̆ng. Gơ̆h đei jơnei ‘nâu, Anih chĕp kơ̆l đảng, khul kơdră tơring hơnơ̆ng chih răk kŏng păng tơdrong tơgop gĭt kăl đơ̆ng Kră pơlei, ƀok. Ƀlep ƀât blŭng sơnăm ‘nao Ất Tỵ 2025, nhôn đei jơ pơma nuh hăm kră pơlei đei lơ bơngai lui yom âu.

VOV4.Bahnar - Têt truh, puih mak vih, ‘ngoăih vei lăng năng tông ăn kang ƀô̆, ƀô̆ đô̆i lơ̆m hơnih, rim kơđông vei lăng sơlam teh đak lơ̆m rim jăl trong sơlam teh đak kơ dêh char Gia Lai oei lăng ba, tơgŭm djru păng yak hơdoi hăm kon pơlei, mă kăl ‘noh kon pơlei dơnuh, tơnap tap. Puih mak sơlam teh đak nhen lĕ roi ‘lơ̆ng hloh dơ̆ng kơ yuơ jơhngơ̆m đon tơgoăt tơgoăl ƀar păh ƀô̆ đô̆i hăm kon pơlei ling lang kơjăp iăp kơtang păng ‘lơ̆ng hơ iă.

VOV4.Bahnar - Sơnăm 2024 jĭ sơnăm dôm dêh char Tây Nguyên jang đei lơ tơdrong jơnei jô̆ hloi găh jang atŏk tơiung mŭk drăm păng pơm hơtŏk tơdrong arih xa kơ kon pơlei. Lơ tơdrong ‘lơ̆ng tih kŭm pơih đei hăm tơring mưh lơ tơdrong tơgŭm ‘nao đei tơlĕch, pơih xă trong ăn Tây Nguyên jang tŏk. Iŏk yoa tơdrong pran ‘lơ̆ng đơ̆ng choh jang xa, sir iŏk tơmam bri brăh, chă tơmang lăng, păng đei dơ̆ng lơ tơdrong tơgŭm ‘nao, kon pơlei dôm hơdrĕch hơdrung tơ̆ tơring Tây Nguyên chơt hơiă mât lơ̆m sơnăm ‘nao, pơjing 1 chăl jang tŏk ‘nao tôch hơmĕng.