VOV.Bahnar - Hăm dôm hơdrĕch kon kông tơ̆ Tây Nguyên, chĭng chêng jĭ tơmam tôn tôch sĭt, đei yang oei lơ̆m chĭng chêng. Chĭng chêng đa iŏk tôn lơ̆m dôm tơdrong et soi, dăh mă đei bơngai nê̆ năn kâu. Hăm bơngai K’Ho tơ̆ dêh char Lâm Đồng oei đei 1 tơdrong soi hơdrô̆ vă bơnê kơ yang chĭng chêng, ‘nŏh jĭ soi kơ chĭng chêng.

VOV.Bahnar - Lơ̆m hla ar chih roi tơbăt Chĭnh trĭ pơtruh ăn Hop akŏm bơngai tang măt lơ̆m teh đak ‘măng mă XIV kơ Đảng, joh ayŏ kơđŏ soang đei băt hơdăh ‘noh jĭ tơdrong gĭt kăl jĭ jơhngơ̆m đon tơpôl, jĭ jơhngơ̆m pran kơjăp kăp gĭt kơ teh đak. Dôm trong vă jang tih nhen pơjing kơjă kăp gĭt kơ teh đak, joh ayŏ, ŭnh hnam păng tơdrong hơgăt ‘lơ̆ng kon bơngai Việt Nam, dăh mă hơtŏk tơiung kơmăy kơmŏk joh ayŏ, tơplih kơsô̆, pơjing hơnih joh ayŏ ‘lơ̆ng hơiă tă kơ tơlĕch ăn ‘meh vă tôch kơ hơdăh ƀơ̆t lăng lơ̆m yan âu rim tơring. Hăm Đắk Lắk - hơnih kơdrơ̆m kơ Tây Nguyên đei lơ hơdrĕch hơdrŭng, tơdrong bơ̆jang kiơ̆ ‘lơ̆ng jơhngơ̆m đon ‘noh tŏk bŏk đei ƀôh hơiă rim năr păng kiơ̆ đơ̆ng noh kŭm ƀôh ưh kơ đei tŏ sĕt tơdrong kăl kơ set hơlen vă vei sơđơ̆ng tơdrong hơtŏ băl.

VOV.Bahnar - Tơ̆ pơlei Kon Klŏk (xah Đăk Mar, dêh char Quảng Ngãi), nơ̆r chĭng chêng, hơgơ̆r re ang păng dôm tơdrong hơsuang 'lơ̆ng kơ bơngai Xơ Đăng pơm lăp đon kon bơngai. Tơ̆ ou, đe ngê̆ nhơ̆n 'lŏ sơnăm nhen Y Kha, A Veng, A Lang atŭm hăm đe sơnăm mơlôh Y Thuật, Y Pên tŏk bŏk oei pơtho rim tơdra hơsuang, rim nơ̆r chĭng chêng vă vei răk tơƀăk mong joh ayŏ kon pơlei kon kông, hơvơn lơ tơmoi truh hăm dôm tơdrong et xa, tơdrong akŏm joh ayŏ - tơmang pơhiơ̆. Hăm tơdrong lăp kơ joh ayŏ, rim “bơngai pơdjoi vei unh” Kon Klŏk tŏk bŏk oei tơgop vei răk tơƀăk mong, pơm hơtŏk tơdrong tôn chĭng chêng – hơsuang, hơ-'nhăk joh ayŏ Tây Nguyên păr ang jơ̆p jang.

VOV.Bahnar -  Et soi ming yang klang đak ‘noh jĭ 1 tơdrong et soi kơ yang đei đơ̆ng sơ̆ kơ lơ hơdrĕch kon kông tơ̆ Tây Nguyên, tơƀôh tơdrong pơyom hăm tu đak - tơdrong hơrih kơ pơlei pơla. Dôm sơnăm tơjê̆ âu, hăm tơdrong tơmơ̆t jên jang tơgŭm đơ̆ng anih jang vei lăng joh ayŏ, et soi ming yak klang đak hlôi đei kon pơlei tơ̆ lơ pơlei pơla tơiung ming, tơgop chĕp vei tơdrong ‘lơ̆ng hơiă joh ayŏ kơ hơdrĕch kon kông, hơdai hăm pơm đei 1 tơmam tơmang lăng hơiă hăm tơpôl.

VOV.Bahnar - Nơ̆r chĭng chêng re ang jơ̆p jang, hơdai hăm tơdrong hơsuang, ƀơ̆r hơri re ang jơ̆p bri kông, đei 'nhot xa 'lơ̆ng... jĭ dôm tơdrong hơvơn đei lơ tơmoi năm truh hăm Đăk Lăk. Tơdrong joh ayŏ juăt jue kră sơ̆ kơ kon pơlei Êđê đei pơgơ̆r dơ̆ng tơ̆ tơring kơdrơ̆m bơngai tơ Buôn Ma Thuột, pơm ăn tơmoi chơt hơ-iă mưh truh tơmang lăng tơ̆ tơring teh ou. Păng tơdrong joh ayŏ 'noh ling lang đei đe yă ƀok kră, đe sơnăm mơlôh tơ̆ rim pơlei pơla Đăk Lăk pơtho dih băl gah tơdrong vei răk tơƀăk mong joh ayŏ kăp gĭt ou lơ̆m tơdrong hơrih 'nao.

VOV.Bahnar - Dêh char Lâm Đồng tŏk bŏk tĕnh koăng bơ̆ jang hơmet ăn Tơdrong pơgơ̆r “Tôn chĭng chêng Đông Nam Á 2025”, pơgơ̆r đơ̆ng năr 19 truh năr 21/12/2025 tơ̆ Cham să Lâm Viên – Đà Lạt.

VOV.Bahnar – ‘Năr 26/10, tơ̆ plei Tơng Jú, phường Ea Kao, Khul chih pơcheh, hơri hơxoang Đắk Lắk pơtôch Lăm pơtâp hơxoang Tây Nguyên sơnăm 2025.

VOV.Bahnar - Pơtao Unh jĭ minh ƀok pơtao lơ̆m tơdrong hơ-'mon kră sơ̆ kơ bơngai Jarai tơ̆ dêh char Gia Lai, đei pơtoi lơ̆m 14 jơhnơr. Sơnăm 1993, Et soi apinh đak 'mi “Yang Pơtao Apui” kơ bơngai Jarai đei tơchơ̆t jing Mŭk drăm joh ayŏ kăp gĭt kơ teh đak; pơlei Ơi (anih mă đe Pơtao Unh hơrih xa, dang ei oei lơ̆m xah Chư A Thai, dêh char Gia Lai) jĭ Gru grua kơ tơdrong joh ayŏ kăp gĭt kơ teh đak. Et soi apinh đak 'mi “Yang Pơtao Apui” jĭ tơdrong akŏm joh ayŏ kăp gĭt phara kơdih kơ bơngai Jarai tơ̆ dêh char Gia Lai, hơnơ̆ng hơvơn lơ tơmoi truh.

VOV.Bahnar -  Dôm sơnăm ou ki, lơ tơring tơ̆ dêh char Gia Lai hlôi tơlĕch jang kiơ̆ jơnei tơdrong vei răk tơƀăk mong păng atŏk tơ iung tơdrong oei sa ‘lơ̆ng rŏ kơ kon kông vă jang tơmang pơhiơ̆ pơlei pơla. Đơ̆ng noh, mĭnh păh tơgŭm ăn vei răk tơ ƀăk mong oei sa joăt joe ‘lơ̆ng rŏ sơ̆ ki, adoi pơm hơtŏk tơdrong hơrih sa sơđơ̆ng dơ̆ng kơjăp ăn kon pơlei. Mă hơdăh nhen pơlei Mơhra Đáp, tơring Tơ Tung, tŏk bŏk jing hơnih truh roi năr roi hơ iă hăm trong tơmang pơhiơ̆ pơlei pơla ‘lơ̆ng liĕm. Tơ̆ ou, tơdrong oei sa joăt joe kơ kon pơlei Bahnar đei vei răk păng atŏk tơ iung hơ iă, pơjing đei jơhngơm pran gĭt kăl hăm tơmoi.

VOV.Bahnar - Hăm tơdrong tơlĕch jên jang đơ̆ng teh đak, plei đei tơdrong juăt so Klong Trao 1, xăh Di Linh, dêh char Lâm Đồng, đĭ jing tơdrong joh ayŏ kơ dŏ xoang ‘lơ̆ng hơiă, anih tơdrong juăt ‘lơ̆ng đơ̆ng sơ̆ kơ bơngai K’Ho oei đei chĕp vei, tưk tơiung, pơjing tơdrong jang xa vă tơgŭm ăn kon pơlei kon kông atŏk tơiung chă tơmang lăng tơpôl, pơm hơtŏk tơdrong arih xa găh tơmam drăm păng jơhngâm đon. ‘Nâu jĭ anih ngôi pơchơt, pơdơ̆h ngôi, truh tơmang lăng, kŭm jing anih truh chă hơlen năng yăn âu găh joh ayŏ kơ dŏ xoang đơ̆ng hơdrĕch kon kông đei lơ anih pơtho pơhrăm rơih.