VOV.Bahnar – Kơmăng ou (23/1), tơ̆ cham tơplŏng kơdou Mỹ Đình (Hà Nội), pơgơ̆r tơdrong joh hơri kăp gĭt đei hơnăn “Hlôh vao 'nao – Chăl sơnăm 'nao” hmach kơ kuh tơdrong đei jơnei keh kong Hop akŏm bơngai tang măt jơ̆p teh đak mă 14 kơ Đảng păng hmach kơ kuh kơ 96 sơnăm năr tơ-iung pơjing Đảng Cộng sản Việt Nam (3/2/1930 - 3/2/2026).

VOV.Bahnar - Lêh pơkao mai anh đào – Đà Lạt pơyan puih mak 2026 tŏk bŏk pơgơ̆r tơ̆ dêh char Lâm Đồng hăm lơ tơdrong jang joh ayŏ - tơmang lăng ‘lơ̆ng hơiă, tơgop pơm tơdrong hiôk chơt kơkuh pơyan puih mak ‘nao tơ̆ groi kông Lâm Viên.

VOV.Bahnar – Lơ̆m dôm năr blŭng sơnăm, kon pơlei Jarai tơ̆ xah Ea Sup, dêh char Đăk Lăk rơ-ông rơ-ang kơ tơdrong et xa. ‘Long gơ̆ng kơjung păng tiwdra chĭng chêng, kon pơlei atŭm pơgơ̆r khôi soi kơ yang, apinh đei tơdrong sơđơ̆ng, pơyang jang xa đei yua lơ păng tơdrong hơrih phĭ tơtŏ. Et soi ưh hơdrô̆ jing tơdrong lui kơ yang hơpang mă oei jing um pơtih gah joh ayŏ, tơguăt kon pơlei pơla păng vei răk tơƀăk mong juăt jue joh ayŏ kơ pơlei pơla Jarai.

VOV.Bahnar – Hơsuang hơvơn et tơdrô jĭ minh tơdra hơsuang juăt jue kơ bơngai Êđê, tơguăt hăm dôm tơdrong et xa sô̆ kơ pơlei pơla. Ưh đei tơgĭt gah um ai, tơdra hơsuang akŏm ƀenh khôi juăt păng tơdrong pơtih pơtŏng. Rim yak jơ̆ng, rim tơdrong tŭn hơsuang rơmuơn nhen nơ̆r hơvơn yang hơpang, sơng tơmoi gĭt atŭm hrou hăm tơdrong sô̆ kơ pơlei pơla.

VOV.Bahnar - Ưh khan lăp ƀôh lơ̆m năr lêh joăt joe, hơbăn ao tanh hrei ‘nâu oei păr ang lơ̆m tơdrong hơrih sa hle, đơ̆ng tơmang lăng tơpôl truh lơ̆m kơmăy kơsô̆, jing pơtih tơdrong hơiă ‘lơ̆ng đơ̆ng joh ayŏ păng tơdrong hơrih ‘nao tơring bri kông.

VOV.Bahnar - Lơ̆m tơdrong hơrih yan ou tơ̆ tơring Ia Dreh (Gia Lai), hơbĕn ao tanh, jơva chĭng chêng păng nơ̆r pơma dơnuh dih băl hiôk chơt pơjing đei tơdrong oei sa ‘lơ̆ng rŏ hơbŏ nhen hloh lơ̆m kon pơlei pơla. Đơ̆ng dôm tơkhông, bơngai tanh gơh hơgei hơdrung Jrai hơngŭr chă pơtho ăn đe mơlôh, ưh khan pơm hơtŏk jơhngơ̆m đon hưch hanh hơmanh bơnê đei pơhrăm mă oei pơjing đei jơhngơ̆m hưch hanh, vei răk tơƀăk mong mŭk drăm gĭt kăl kơ hơdrĕch hơdrung bơ̆n.

VOV.Bahnar - Tổng Bí thư Tô Lâm hlôi kĭ tơlĕch jang kiơ̆ tơdrong tơchơ̆t 80 đơ̆ng Hơnih tơm Chinh găh atŏk tơ iung oei sa joh ayŏ joăt joe Việt Nam.

VOV.Bahnar- Hơnih vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆ Lâm Đồng pơgơ̆r Hop akŏm kĭ pơkăp drơ̆ng mĭnh nơ̆r jang hơdoi chih tơbăt sơnăm 2026 hăm vă jê̆ 30 hơnih bơ̆ jang chih kơtơ̆ng ang đei bơngai jang chih kơtơ̆ng ang, hơnih bơ̆ jang lơ̆m dêh char, lơ̆m ou đei Hơnih bơ̆ jang kơ Radiô Nơ̆r Pơma Việt Nam tơ̆ tơring Tây Nguyên.

VOV.Bahnar – Tơ̆ tơring sơlam Quảng Trực, dêh char Lâm Đồng, tơring mă dôm groi kaphê, măk ka jơk ƀlik rok kiơ̆ teh kông, hơnih mă pơgê hrôih adoi oei đom đak ngom tơ̆ mir ƀa păng jơva chĭng chêng M’nông păr ang jơ̆p jang bri kông, rim pơyan ƀa huơ̆t noh pơdrĭu dơ̆ng tơdrong joh ayŏ kăp gĭt. 'Noh jing et soi pơtăm gơ̆ng khei ƀa huơ̆t – khôi et soi akŏm đon lui, tơdrong joh ayŏ păng tơdrong hơrih đon bơnôh kơ kon pơlei M’nông tơ̆ tơring sơlam teh Tây Nguyên.

VOV.Bahnar – Lơ̆m tơdrong hơrih hăt hot tơ̆ tơring kơdrơ̆m tơ̆ Buôn Ma Thuột, dêh char Đăk Lăk, đei dôm bơngai sơnăm mơlôh Xơ Đăng thĕng thăp băt 'mêm, pơhrăm păng vei răk tơdra hơri juăt jue kon kông po kơdih.