Tukvak ini, anek saih di dom sang bac dalam tỉnh Bình Thuận daok caga yam tame tukvak padeih he. Hadei di labaih 2 thun njauk kan kandah kayua jit ruak Covid-19, bruk ma-in sambai ka yaok umo meng dam dara tal uranaih njauk cagar veik, ye urak ini lac mbang padeih he hu caong maong abih di rilo uranaih sit saong dom amaik, ame. Kadha vak di Thuý Linh hu ba tagok mbao online Bình Thuận hu ndem ka bruk ini:

Thun bac 2021-2022 mada akan tal tuk tamat, ralo urang ngak amaik ame duh hatai kuhria pilih duah mblang main brei ka anek bik di drei. Mblang main brei ka uranaih anek saih ieu lac bruk praong di dalam bilan padeih bac bilan pandiak thun ini. Di tỉnh Bình Thuận mblang main bilan pandiak brei ka uranaih kurang oh di labik bhum palei atah bayah bo mboh daok kurang labik brei ka uranai main di ban praong ban sit dalam tinh. Phun kadha cih di Jasi – urang vak di rayo sap ndom VN di ban raya HCM brei thau:

Jit pandiak tabiak darah dok tagok khang. Piah pacang plaih ruak pandiak tabiak darah, jalan ngak siam di abih nan lac pametai jamaok. Mintri Y tế hu panuac ieu bhap bini caik tabiak 10 minite sa adit piah pametai bọ gậy, lăng quăng… Kadha vak di Nguyễn Quốc mangaok mbao SGGP hu ndom ka bruk ni, daa mik va … tui pang .

Urang nong pala padai urak ni dok gaok rilo kan kandah kayua yaom pandap ngak nong tagok jang 2 mbang , 3 mbang dut song dom thun dahlau , dalam tuk yaom padai jeng dok dang sa labik, hu tuk dok bier jang dahlau deih. Piah dong lang talaih kan kandah ka urang nong, tỉnh Tây Ninh hu pambak prong dom jalan ngak pambuak gauk "4 gah". Kadha vak di Phạm Thanh Tân mangaok mbao điện tử di TTXVN brei thau dom kein laba meng jalan ngak ni.

Thun ni, bilan hajan di bhum taneran krong CL mai avar jang yaok thun, ngak ka ia mbak trun bier, hadang mboh suai prong, dalam tuk nan, yaom pandap piah raong hadang dok tagok, ngak ka bruk rong hadang di mik va gaok rilo kan kandah. Kadha vak di urang vak Thạch Hồng brei thau ka bruk nan di Sóc Trăng.

Lac “akaok kapal” di bhum, hu brei bruk praong lac “dang akaok” piah tacei ba, urak ni, ban raya .HCM dok samar drah kuhria caga dom bruk, piah peih ngak danak dak.. Bruk khang hatai peih ngak danak dak ni di ban raya.HCM song dom tỉnh Đồng Nai, Bình Dương song Long An hu brei mboh cambaih dalam tuk vak tapa.Kadha vak di Hà Khánh, urang vak di rayo sap ndom VN daok di ban raya .HCM hu angan lac "Patagok bruk “dang akaok” di ban raya .HCM dalam bruk ngak jalan Vành đai 3" hu ndom tal bruk n, daa mik va ,… tui pang

Ngak mbao lac bruk gleih glar, min dom phóng viên, biên tập viên ngak gah danak dak brei ka bhap bini bangsa takik di dom rayo papar sap papar binguk di dom tỉnh, ban bhum ceik dok gleih glar jang dut song dom urang vak karei karei. Labik prong, jalan nao mai kan kandah, pandap ngak bruk dok kurang, takik ... urang jeng kham merat yam tapa, kandi kandang rik dong ka bruk patagok di palei negar meng bruk abih hatung hatai song bruk ngak. Pahadar 97 thun- Harei mbao chí Cách mạng Việt Nam, daa mik va song tong abih gauk taom gaok dom urang ngak báo yau nan di Cao Bằng song Bắc Kạn tapa kadha vak di Công Luận, Urang vak di rayo sap ndom VN dok di bhum Đông Bắc:

Yaok pluh thun ni mai, di mangaok danao Dầu Tiếng, di xã Minh Hòa, huyện Dầu Tiếng, tỉnh Bình Dương hu yaok pluh boh sang daok mangaok bè song ngak bruk tong chap ikan, rong ikan bè. Anak bruk mbuan si nerak halau ia, rilo thun ni mai, huyện Dầu Tiếng jak ba rahra tagok thu, padeih rong ikan bè, min bruk ni, jeng dok rah tabiak. Urak ni, karja pak ni dok duah dom jalan dong piah ka rahra klaak bruk dok mbleing mblang di mangaok krong, tabiak truh làng bè, duah bruk ngak tani tanat song labik dok siam mekre. Kadha vak di Thiên Lý – urang vak di rayo sap ndom VN dok di ban raya HCM hu ndom ka bruk ni:

Ban raya .HCM hu angan lac “ban oh ndih” kayua labik ni tuk melam biak chreih chrai, rilo bruk main sambai. Nan ye, gah du lịch dok hu jalan pasiam veik song patagok bruk ngak mbang kinh tế melam, piah dui pachreih song khik takai tuai du lịch hadei di 2 thun jit ruak Covid-19. Urang vak Minh Thắm dok di ban raya HCM hu ndom tal bruk ban raya HCM kham merat patagok kinh tế melam, piah patagok jien mek tame ka gah du lịch.

Sở y tế Ninh Thuận bahrau peih bruk klauk vắc xin pacang Covid -19 mbang 4, daok hu ieu lac mbang klauk hadar veik mbang 2 dalam tỉnh. Bruk peih ngak samu gauk mbang klauk ka 4 vắc xin pacang jit Covid 19 piah pakhang, patagok bruk miễn dịch pacang ruak hu siam jang. Kadha vak di urang pambuak bruk Minh Triều ka bruk Ninh Thuận peih bruk klauk mbang 4 vắc xin Covid 19.