Giải Báo chí pakat negar thun ini daok brei mboh bruk kham merat, labik dang saong pok angan dom urang ngak báo di VOV hu rilo kadha gheih di abih, ba tal rilo siam mekre di abih dalam xã hội. Meng dom bruk ginum biai ngak brei hacih sa-at Đảng, dom urang pan akaok Đảng – Karja tal dom dalikan ka raidiuk, bruk mbang ngui, bruk khang hatai khik caga chủ quyền, taneh ia, urang vak di rayo sap ndom Việt Nam tuk halei jeng ba abih drei tame gah jalan saheng, nao gam haong taneh ia tapa rilo kadha praong.

Peih ngak dom danak dak bruk ngak negar, jaik abih dom tinh, ban dalam bhum taneran kraong CL hu padang dom janih darak bahrau yau ye siêu thị, kadai quan mbuan lagaih taphia dom darak meng kan piah duh ka bruk pablei salih pandap panda di rahra. Min, dom darak tamuh eng lih mek abih takai jalan di dom puk palei jeng daok hu biak rilo. Bruk ni ngak lahik salamat ka urang peih radaih saong dom urang pablei salih.

Pok jien dong 62.000 tỷ di rajaei brei ka urang ngak, dalam nan hu urang ngak gaok kan kandah kayua jit prong Covid-19 lac bruk ngak biak siam biak hu makna, min tal kreih bilan 6, Mintri Lao động Thương binh song Xã hội jeng bahrau pasang iek, brei daong ka 418 urang ngak. Gah langiu mbang nyaom, dom urang Quoc hoi cong khin dom mintri, dom gah chức năng samar hu jalan ngak piah ka urang ngak hu mbang tui sarak dong di karja tui njauk tacei pato di Thủ tướng Rajaei. Kadha vak di urang vak Việt Cường, Nguyên Nhung ndom ka bruk ni:

Urak ini, bhum taneran kraong Cuu Long tame bilan hajan, ini jeng lac tukvak bo karja palei saong mikva labik ini samar pasiam veik bruk pala drak hadei di mbang pandiak bhang khang dalam sajarah dakrai. Kadha vak di Nhật Trường – P.V VOV di bhum taneran kraong Cuu Long ndem la bruk pasiam veik bein phun baoh kayau bingi khut trak hadei di pandiak bhang, njom ia mbak di dua tỉnh Tiền Giang saong Bến Tre lac bhum palei hu taneh pala phun mbang baoh ralo di bhum taneran:

Meng di harei ngak bruk camereip di mbang 2 (Mbang nyaom ka 9, Quốc hội mbang 14), Quốc hội hu ginum biai ka danak dak pakat negar patagok kinh tế - xã hội buhum bhap bini bangsa takik song bhum ceik tuk vak 2021 - 2030. Pataom pren yava jien padai dalam danak dak tame dom bruk hagait njauk ngak di abih lac asar kadha praong dalam mbang ginum biai ni. Kadha vak di urang vak Thu Hòa- gah papar sap bangsa di rayo sap ndom Viet Nam:

Anak bruk tak klaak atau kaoh abih dhar, hala daok veik phun saoh, yaom lac piah “kuhria ka anek saih” atau lac kayua “huac trách nhiệm” ye anak meta mboh mblo tabiak dom vang huan dalam bruk khik ramik phun hijao dalam labik sang bac. Urang ilamu mboh lac, phun hijao dalam sang bac meyah tok caik ka sang bac khik iek lac oh ka ginup bo brei hu bruk pambuak gauk di karja pak nan saong gah hu ilau iek glang phun hijao. Kadha vak di Minh Hường- urang vak di rayo sap ndom Viet Nam hu ndom tal bruk nan.

Dom harei tapa, rilo labik ngak bruk di karja, rilo sang bac di TPHCM brei pasang iek, kaoh, cakak phun hijao. Hu dom labik brei kaoh klaak phun phượng, dom janih phun hijao karei jeng hu kaoh, cakak abih dhar. Bruk ngak ini yaom lac siam piah pacang caga bala kayua phun hijao jaoh, jaleih min oh lac jalan ngak hu ilamu haong phun hijao.

Daok dom bilan tra, lac tame thun bac 2020 – 2021, min meng tukvak ini, rilo sang bac Ndai hoc di karja padang tabiak di TPHCM brei thau lac tagok yaom jien bac dalam thun tal, ngak ka rilo amaik ame di sinh viên biak duh hatai. Dom jalan sahneng ka bruk tagok yaom jien bac hu ndom tal dalam kadha vak hadei ini di Tỷ Huỳnh, urang vak di VOV TPHCM:

Jit ruak Covid-19 ngak kan kandah praong dalam tal taong abih bruk kinh tế, dalam nan darak pasar sang danaok taneh riya jeng gaok oh lac takik kan kandah. Di Ban raya HCM, dom doanh nghiệp gah taneh riya daok duah jalan pasiam veik hadei di jit ruak. Langiu bruk kham merat di doanh nghiệp, jabat khik iek di Karja jeng kham merat langyah dom kan kandah, tavak tavaiy gah hukum di dom danak dak sang danaok, taneh riya njauk padeih dahlau di ini. Asar kadha ini hu dalam kadha vak hadei ni di Duy Phương, urang vak di Rayo sap ndem Viet Nam daok di Ban raya HCM:

Hadei di tuk Hiệp định pablei salih tự do Viet Nam- Châu Âu, iew katut lac EVFTA saong Hiệp định khik caga đầu tư, ieu lac EVIPA hu Quoc hoi brei tapa, rilo doanh nghiep di Ban raya HCM saong bhum Đông Nam bộ biak chreih chrai, caong taduan hu bruk lagaih ini piah peih praong darak pasar pablei tabiak negar langiu saong patagok bruk ngak tabiak pandap panda, pablei salih. Kadha vak di dom urang vak di Rayo sap ndem Viet Nam daok di Ban raya HCM brei thau dom kein laba bo doanh nghiep Viet hu mbang tui meng hiep ndinh ini: