Klei êdah êdi hlăm hdră kdŏ mmuñ djuê ana hŏng akŏ "Ênai kwang hruê bi kuôl" jing lŏ bi êdah klei bhiăn drông ung hlăm klei bi kuôl mơ̆ng mnuih Êđê. Hlăm wăl anôk mtah ti gŭ êyui ana kyâo prŏng, phung thâo mbruă ƀuôn Tơ̆ng Jŭ, ƀuôn hgŭm Ea Kao lŏ bi êdah djăp ênŭm klei bhiăn drông ung (Iêô wĭt sang mniê) mơ̆ng mnuih Êđê. Hlăm êlan drông, ung bi găn dŭm klei lông dlăng mâo klei bhiăn. Ñu dơ̆ng mđup brei kông leh anăn mnơ̆ng kơ găp djuê, ƀĭng găp dua nah êlâo kơ dưi drông mŭt hlăm sang mô̆. Hŏng mnuih Êđê, kông buh jing klei bi knăl kơ klei khăp, bi klei lông dlăng hlăm êlan nao atăt mô̆ mơĭt klei čang hmăng kơ dua ung mô̆ srăng hgŭm mguôp găn klei dleh dlan čiăng mkŏ mjing klei hdĭp jăk yâo.

Pô thâo mbruă Y Djing Adrơng, ƀuôn Tơ̆ng Jŭ, brei thâo, bruă ba klei ngă yang kơ phung tuê hiu čhưn ênguê đru mguôp kriê pioh knhuah gru, lŏ pŏk hdră duh ƀơ̆ng mơ̆ng bruă hiu čhưn ênguê êpul êya.

“Kâo ktưn hưn êdi dưi lŏ bi êdah klei bhiăn drông ung, lŏ bi hdơr knhuah gru, knhuah jăk siam dhar kreh anak Ê Đê. Ƀuôn Tơ̆ng Jŭ ară anei ngă bruă hiu čhưn ênguê êpul êya, anei jing hdră êlan jăk êdi mjing bruă mă kơ mnuih ƀuôn sang, mbĭt anăn kriê pioh knhuah dhar kreh mnuih ƀuôn sang msĕ si pơ̆k mñam, tông čing čhar amâodah lŏ bi êdah klei bhiăn msĕ si hruê anei. Kâo čang hmăng ênoh yuôm dhar kreh anak Ê Đê dưi lar bra čiăng kơ lu mnuih dlông rŏng lăn thâo lehanăn kriê pioh nanao.”

Leh kdrêč lŏ wĭt bi êdah klei bhiăn, phung tuê lŏ tui ksiêm dŭm klei tông čing, čing kram, đĭng boh tâo, dŭm ênhiang mmuñ jiă knhuah Lăn Dap Kngư leh anăn tui ksiêm kơ dhar kreh kpiê čeh. Dŭm mta bruă ngă mâo lu klei jăk jĭn hŏng phung tuê hiu čhưn ênguê hlăm ala čar leh anăn ala tač êngao. Awa Steve, hriê mơ̆ng Scotland, brei thâo, dŭm ênai čing leh anăn hdră êpul êya alŭ wăl kriê pioh dhar kreh ngă kơ ñu khăp êdi.

"Anei jing gưl tal êlâo kâo dưi dlăng hdră lehanăn kâo ƀuh jăk êdi. Kâo khăp êdi kơ ênhiang mmuñ mơ̆ng mnuih Êđê. Tui si kâo, dŭm boh tŭ yuôm dhar kreh msĕ snei brei dưi hưn mthâo lu hĭn hlăm dŭm kdrăp hâo hưn čiăng kơ lu mnuih thâo. Kâo klă sĭt srăng lŏ wĭt".

Hluê si hdră kčah, hdră rang mdah Dhar kreh čing čhar srăng lŏ dơ̆ng mkŏ mjing grăp tuôr ti Sang kriê pioh mnơ̆ng Dak Lak. Grăp mlan čar srăng hưn mdah sa klei bhiăn knhuah gru mơ̆ng dŭm djuê ana ti alŭ wăl, đru kriê pioh mnơ̆ng kriê pioh leh anăn mkŏ mjing thiăm mnơ̆ng dhơ̆ng hiu čhưn ênguê dhar kreh mkăp kơ phung tuê.