Ti Dak Lak, dŭm mta phŭn dưi mă klei blŭ mguôp mâo: Hdră bhiăn mkra mlih, thiăm mbŏ dŭm mta mơ̆ng Hdră bhiăn bruă klam tla hnô mơ̆ng Knŭk kna; Hdră bhiăn gang mkhư̆, bi kdơ̆ng hŏng klei mplư prăk leh anăn Hdră bhiăn dŭm êpul bruă brei čan prăk; Hdră bhiăn dang kông, Hdră bhiăn bi mnia mblei điện tử…; mbĭt hŏng dua klei čih mkra hdră mtrŭn mơ̆ng bruă kƀĭn ala kơ bruă gang mkhư̆ phung ngă soh leh anăn hdră êlan, klei bhiăn mdê hjăn msir mghaih klei ngă soh djŏ tuôm hŏng bruă duh mkra, mlih mrâo mbruă, bi mlih mrô. Bi ala kơ dŭm anôk bruă mơ̆ng čar Dak Lak hưn mdah leh lu klei čih mkra kbiă hriê mơ̆ng boh sĭt.

Ti Lâm Đồng, pô bi ala dŭm knơ̆ng, dhar bruă nao hgŭm 8 gưl klei blŭ mguôp hŏng 15 hdră bhiăn, 4 hdră mtrŭn klei bhiăn, hlăm anăn lu klei blŭ mguôp hŏng Hdră bhiăn lăn ala (lŏ mlih mrâo), Hdră bhiăn sang dôk (lŏ mlih mrâo); Hdră bhiăn mnia mblei lăn ala, sang dôk (mkra mlih); hră čih hdră bhiăn Phŭn  kđi klei (mkra mlih); Hdră bhiăn mkra mlih, thiăm mbŏ dŭm mta mơ̆ng 09 hdră bhiăn kơ lĭng kahan, răng mgang klei êđăp ênang…

Dŭm klei blŭ kbiă hriê mơ̆ng klei čiăng hlăm boh sĭt mơ̆ng alŭ wăl. Êpul bi ala bruă kƀĭn ala čar Lâm Đồng bi mklin, hrŏng ruah dŭm mta phŭn čiăng nao hgŭm hlăm Klei bi kƀĭn bruă kƀĭn ala kơ anăp.