Hjan prŏng sui, êa mơ̆ng krĭng dlông truh ngă kơ lu alŭ wăl nah Yŭ čar Gia Lai êngăp êa, klưh hroh, êlan klông bi ktlah lehanăn hmăi truh kơ bruă duh mkra. Ti să Ia Pa, ênao êa Mơ Nang 2 tuôm êngăp êa, bi ktlah êbeh 300 gŏ êsei mnuih ƀuôn sang; kban kyâo mkŏ Ia Pa hŏng Ia Tul êa đung jih. Hlăm brô 7 ha mdiê lehanăn ktơr boh mnga tuôm hŏng klei êngăp êa. Ti să Ia Hiao, êbeh 180 ha mnơ̆ng pla mâo klei hmăi, lu jing mdiê, ktơr lehanăn lu ênhă mnơ̆ng pla mkăn. Dŭm să Gào, Ia Krái, Phú Thiện ăt mâo klei êngăp êa, klưh hroh ti lu ktuê êlan, krĭng ktuê hnoh krông, hnoh êa. Bruă sang čư̆ êa alŭ wăl iêu mtrŭt leh êpul êya, mbĕ mnuih ƀuôn sang mơ̆ng anôk huĭ hyưt, hưn mthâo dŭm anôk huĭ hyưt leh anăn ksiêm yap klei luič liê.

Êlâo kơ adiê hjan prŏng, aguah 9/9, Anôk bruă đăo knăl yan adiê čar Dak Lak lŏ dơ̆ng hưn brei răng kơ klei truh yan adiê gưl 1 leh anăn 2, mâo hjan prŏng ti anôk mâo, angĭn êbŭ, grăm kmlă, hjan lĕ pliêr, klei huĭ hyưt êa lêč leh anăn klưh hroh lăn. Êbeh 300 čô hđeh hriăm hră hlăm 10 adŭ ti 2 anôk sang hră mơ̆ng Sang hră gưl sa Chu Văn An, să Čuôr Dăng, mdei hriăm kyua lu ktuê êlan êngăp êa, êa mơ̆ng dŭm đang ksu đoh truh ngă êngăp êa, đoh êtăng. Ƀuôn Aring, anôk mâo sang hră, kreh êngăp êa tơdah adiê hjan prŏng. Anôk bruă sang čư̆ êa să akâo msir mghaih, mbĭt anăn mkŏ mjing hdră êlan mkra mđĭ dŭm anôk klưh hroh, mkra mnuôr mđoh êa.