VOV4.Êđê - Tết hriê, yan mnga truh, ai êwa mơak Đảng, mơak yan mnga leh anăn klei hơ̆k mơak djuê ana dôk bŏ hlăm dŭm ƀuôn êlan ti kdriêk Čư̆ Mgar, čar Dak Lak. Dŭm bĭt êlan dơ̆ng hla čhiăm gru lăn čar bi msiam kơ rup krĭng ƀuôn sang. Hlăm kdrêč “Anăp truh kơ klei kƀĭn phung bi ala kluôm ala tal 14 mơ̆ng Đảng” hruê anei, pô čih klei mrâo Nam Trang, jưh ti Lăn Dap Kngư mâo klei čih hưn kơ “Êlan hla čhiăm gru lăn čar” ti kdriêk Čư̆ Mgar, čar Dak Lak đru mđĭ klei ktưn hưn djuê ana, mtrŭt mđĭ ai tiê bi lông mđĭ kyar bruă duh mkra ala ƀuôn, dhar kreh ti alŭ wăl.

VOV4.Êđê - Tlam hrue 2/2 (jing hrue 5 Tết), ti Lạng Sơn, Khua knŭk kna Phạm Minh Chính kiă kriê klei bi kƀĭn hŏng dŭm phŭn dhar bruă, alŭ wăl kơ bruă mđĭ hĭn klei mkra êlan dơ̆ng pral Đồng Đăng (Lạng Sơn)-Trà Lĩnh (Cao Bằng) lehanăn ƀăng jang knông lăn Hữu Nghị-Chi Lăng.

VOV4.Êđê - Hlăm wưng mdei Tết Nguyên đán leh êgao, dŭm čar ti lăn dap kngư mâo tŭ jum leh lu phung tue truh hlăm ala čar lehanăn mơ̆ng ala tač êngao, mâo ba wĭt ngăn prăk lu hĭn mkă hŏng thŭn dih.

VOV4.Êđê - Hlăm ai êwa mơak Đảng, mơak yan Mnga Têt Djuê ana Ất Tỵ 2025 lehanăn bi hdơr 95 thŭn Hruê mkŏ mjing Đảng Cộng sản Việt Nam (3/2/1930-3/2/2025), Khua gĭt gai Đảng Tô Lâm nao lehanăn blŭ hrăm ti knăm Têt pla kyâo hdơr nanao kơ Awa Hô ti Ninh Bình.

VOV4.Êđê- Đăk Ngọk jing să tal êlâo ti kdriêk Đăk Hà, čar Kon Tum mkŏ mjing Klei bi kƀĭn phung bi ala bruă Đảng să Wưng 2025-2030. Wưng êgao, bruă Đảng, bruă sang čư̆ êa leh anăn mnuih ƀuôn sang hlăm să bi êdah leh ai tiê mlih mrâo, mbruă, klei čang hmăng mkŏ mjing Đăk Ngọc jing krĭng ƀuôn sang mdrŏng sah. Hlăm dŭm hruê akŏ thŭn, yan mng mrâo, Đăk Ngọk pŏk ngă leh mtam bruă hlue ngă hdră mtrŭn klei bi kƀĭn bruă Đảng, mjing klei ktang mrâo čiăng kơ krĭng ƀuôn sang Đăk Ngọk êdah kdlưn mđĭ kyar hơĭt kjăp.

VOV4.Êđê-Mbĭt hŏng lăn čar, mơ̆ng êlâo wưng tết Nguyên đán, ti đa đa alŭ wăl Lăn Dap Kngư, phung êdam êra hlăm ênuk thŭn bi hơ̆k mơak leh anăn mjêč nao mkă dlăng nao kahan.

VOV4.Êđê - Mbĭt hŏng kluôm ala, hlăm mnĭt mmông yuôm bhăn kkuh drông thŭn mrâo Ất Tỵ, mnuih ƀuôn sang dŭm djuê ana krĭng Lăn dap kngư ktưn hưn êdi hŏng dŭm klei bi mlih mơ̆ng ƀuôn sang, čang hmăng sa thŭn mrâo klei hdĭp trei mđao, yâo mơak.

VOV4.Êđê - Hlăm mnĭt mmông yuôm bhăn mơ̆ng hruê akŏ thŭn mrâo Ất Tỵ 2025, hmei alum mơĭt truh kơ ƀĭng găp drei kluôm Asăp hơêč hmưi Têt mơ̆ng Khua lăn čar Lương Cường truh hŏng mnuih ƀuôn sang, lĭng kahan hlăm kluôm ala čar

VOV4.Êđê - Thŭn 2024, găn lu klei dleh dlan, klei lông dlăng, bruă duh mkra Lăn Dap Kngư dưi mâo êbeh 484 êbâo êklai prăk, hnư hrui wĭt kah knar grăp čô đăo tĭng mâo 78,5 êklăk prăk hlăm sa thŭn, đĭ 16% mkă hŏng thŭn êlâo. Mŭt hlăm thŭn mrâo Ất Tỵ 2025 anei, lu bĭt êlan dơ̆ng pral dôk rŭ mjing, mkŏ mjing tur knơ̆ng čiăng kơ Lăn Dap Kngư bi lar klei găl mâo, čhuang mŭt hlăm ênuk mrâo.

VOV4.Êđê - Tuôm jing khua kiă kriê sa knơ̆ng bruă thơ̆ng kơ klei hưn mthâo mrâo mrang ti ƀuôn prŏng Hồ Chí Minh, ƀiădah kyua hmăi mơ̆ng klei ruă tưp Covid-19, ayŏng Y-Bhiông Ƀuôn Yă wĭt ti ƀuôn sang pô ti ƀuôn Kmrơ̆ng Prŏng B, să Ea Tu, ƀuôn prŏng Ƀuôn Ama Thuôt, čar Dak Lak čiăng duah êlan nao mrâo. Mơ̆ng thŭn 2021, ñu mphŭn ksiêm duah kơ dhar kreh leh anăn mnơ̆ng ƀơ̆ng huă mnuih Êđê, mkŏ mjing dŭm tour hiu čhưn dhing, ktuê dlăng dhar kreh ti dŭm ƀuôn êlan ti čar Dak Lak. Ƀri wưng hruê tal êlâo hlăm yan mnga, alum kơ ƀĭng găp drei hmư̆ klei blŭ hrăm hŏng ayŏng Y-Bhiông Ƀuôn Yă kơ klei hmăng hmưi mkŏ mjing ƀuôn sang ƀrư̆ hruê ƀrư̆ mlih mrâo.