VOV4.Êđê- Tlam mbrue 16/7, ti Sang bruă kƀĭn ala, mkŏ mjing leh knăm bi êdah hdruôm hră “Bruă kƀĭn ala hlăm klei mlih mrâo bi djŏ hŏng klei rŭ mdơ̆ng, bi kjăp knŭk kna mâo klei bhiăn yang ƀuôn ngă phŭn êngiê Việt Nam” mơ̆ng khua gĭt gai Đảng Nguyễn Phú Trọng.

VOV4.Êđê- Bruă dliê kmrơ̆ng čar Dak Lak dôk kƀĭn mđĭ hnơ̆ng pla dliê hlăm yan hjan hŏng hdră kñăm pla mrâo 1.800 ha dliê.

VOV4.Êđê- Hruê 16/7, Knơ̆ng bruă sang čư̆ êa čar Lâm Đồng mâo hră mơar mjêč gĭt gai dŭm anôk bruă, kdriêk, ƀuôn prŏng hlăm čar mjêč pŏk ngă hdră msir mdrơ̆ng hŏng angĭn êbŭ leh anăn adiê hjan prŏng. Gĭr mbĕ đuĕ mnuih ƀuôn sang mơ̆ng krĭng huĭ hyưt klưh hroh lăn, êa lip.

VOV4.Êđê- Hruê 16/7, blŭ hrăm gĭt gai klei bi kƀĭn mđĭ bi liê knŭk kna, Khua knŭk kna mtă kơ phung khua phŭn bruă, khua dhar bruă, Khua Knơ̆ng bruă sang čư̆ êa gưl čar kƀĭn hlue ngă bi jăk dŭm hdră mtrŭn Knŭk kna, asăp mtrŭn, hră mơar mơ̆ng Khua knŭk kna leh anăn hră mơar gĭt gai mơ̆ng Knŭk kna kơ klei mbha, bi liê knŭk kna thŭn 2024.

VOV4.Êđê-Năm mlan akŏ thŭn anei, bruă duh mkra ƀuôn prŏng Đà Nẵng mâo hnơ̆ng đĭ kyar 5%, prăk hrui wĭt mâo 70% hdră kčah thŭn, đĭ êbeh 31% mkă hŏng wưng anei thŭn dih.

VOV4.Êđê- Aguah mbruê 16/7, ti Hà Nội, Khua knŭk kna Phạm Minh Chính gĭt gai klei kƀĭn trông mtrŭt mđĭ klei duh bi liê bruă knŭk kna thŭn 2024.

VOV4.Êđê- Hruê mbruê, ti anăp boh sĭt klei hjan prŏng, čar Lâm Đồng mâo klei hưn brei răng kơ klei klưh hroh lăn ti alŭ wăl, boh nik jing dŭm anôk mâo čư̆, lăn êjin.

VOV4.Êđê- Ƀri gưl bi hdơr 74 thŭn Hruê knhuah gru phung êdam êra ba anăp Việt Nam (15/7/1950 - 15/7/2024), tlam 15/7, ti Anôk bruă khua lăn čar, Khua lăn čar Tô Lâm bi tuôm leh hŏng êpul bi ala Êpul hgŭm Phung êdam êra ba anăp hđăp Việt Nam ƀri gưl nao hlăm Klei bi kƀĭn phung knuă druh kluôm ala Êpul hgŭm Phung êdam êra ba anăp hđăp Việt Nam.

VOV4.Êđê- Hruê 15/7, K’iăng Khua lăn čar Võ Thị Ánh Xuân hŏng Êpul bi ala Bruă kƀĭn ala čar An Giang mâo leh mmông bi tuôm hŏng phung bi ala kơ mnuih ƀuôn sang ti wăl krah knông lăn Tịnh Biên, čar An Giang leh Klei bi kƀĭn tal 7, Bruă kƀĭn ala gưl XV.

VOV4.Êđê- Blŭ hrăm hlăm knăm mphŭn pŏk klei bi kƀĭn tal 17, Êpul gơ̆ng bruă ƀuôn sang ƀuôn prŏng Hồ Chí Minh gưl X, wưng 2021 -2026 aguah (15/7), Khua dlăng bruă đảng ƀuôn prŏng Hồ Chí Minh Nguyễn Văn Nên brei thâo, bruă klam wưng adôk mơ̆ng thŭn ăt msĕ mơh jih wưng ktrŏ snăk, brei gĭr hĭn hlăm wưng kơ anăp.