VOV.Jarai-Ƀơi sang bruă djă pioh Kơphê rŏng lŏn tơnah, tơring čar Dak Lak  ngă hrŏm sang bruă UNESCO ƀơi Việt Nam hăng hơdôm bơnah ngă hrŏm, jơnum pơčrong sai Kông ngăn kơphê rŏng lŏn tơnah hăng akŏ ñu “ Mơ̆ng gru grua hơđăp lu mơta truh pơ kông ngăn dŏ hrŏm mơ̆ng ană mơnuih lŏn tơnah”.

VOV.Jarai-Čơkă hơ̆k mơak Hrơi hơdrôm hră hăng Gru grua pơđok hră Việt Nam lơ 21/4, Hrơi hơdrôm hră hăng Tơlơi ngă pô Rŏng lŏn tơnah lơ 23/4, Khul čih pơčeh hơ̆k hơr adoh suang tơring čar Dak Lak ngă hrŏm, jơnum min phường Phú Yên, Sang bruă djă pioh gơnam gru Dak Lak, Sang pơđok hră tơring čar hăng Sang hră gưl dua Trần Hưng Đạo jơnum mơak Hrơi Hơdrôm hră hăng Gru grua pơđok hră thun 2026 hăng akŏ ñu “Hơdrôm hră hăng Tơlơi kiăng găn ia puh yă”.

VOV.Jarai-Ƀơi phường Ƀuôn Ma Thuột, Khua mua jơnum min mơnuih ƀôn sang tơring čar Dak Lak hơmâo tŭ jum laih anun mă bruă hăng grup hyu mă bruă mơ̆ng UNESCO hăng FAO yua kơ ơi Jonathan Wallace Baker, Khua pơ ala UNESCO ƀơi Việt Nam hăng ơi Ninod Ahuja, Khua anom bruă FAO ƀơi Việt Nam ba jơlan hlâo, ƀrô tal rai jơnum pơčrong sai kơ bruă Kông ngăn gru grua kơphê rŏng lŏn tơnah pơphun ƀơi Dak Lak.

VOV.Jarai-Y Quân Mjâo, arăng juăt iâu ơi Khely, dŏ ƀơi ƀôn A2, să Ea Sup, tơring čar Dak Lak, mơnuih hor biă mă kơ tơlơi adoh đưm Jarai. Hơdôm tơlơi ñu adoh, ră ruai glăi sa tơlơi pơhing hrup akhan hri, dŏ rô na nao amăng tơlơi pơmin pran jua ñu, hmư̆ tơma amăng pran jua biă mă. Rim er tơlơi ñu adoh ƀu kơnong sa tơlơi ruai glăi đôč ôh, lăi nao kơ tơlơi khăp, bơni kơ bruă mă rim hrơi, laih dơ̆ng dŏ djă pioh bơngăt jua tơlơi hơdip gru grua mơ̆ng đưm amăng plơi pla găn rơgao thun bơyan blan tơkuh.

VOV.Jarai-Ƀơi bôr lŏn Ây Nô, ƀuôn Trí, să Ƀuôn Đôn, tơring čar Dak Lak, pơphun jơlan hơdră ngui tê̆t Lao-Bunpimay thun 2026. Hơmâo lu mơnuih ƀôn sang hăng tuai čuă ngui mut hrŏm hơdôm tơlơi ngă yang gru grua mơng mơnuih ƀôn sang Lao dŏ hơdip ƀơi anai.

VOV.Jarai - Ƀơi čư̆ siăng Trường Sơn, hơdôm hrơi tong krah blan 4, hơdôm rơbâo čô mơnuih mơ̆ng hơdôm boh plơi giăm guai tơring glông Kà Lừm, tơring čar Sê Kông (čar Lao) hơmâo mơnuih rơtuh mơnuih rơbâo rơbat tơkai nao pơ să Hùng Sơn, ƀôn prong Đà Nẵng či ngui têt Bunpimay. Hrơi têt tui phiăn juăt dêh čar Lao jing hrơi kiăng mơnuih ƀôn sang dua bơnah guai dêh čar pơbưp, ngui ngor, kjăp tui tơlơi khăp ƀu-eng ngă giăng mah pŭ ƀăn.

VOV.Jarai-Tong krah blan 4, lơm jua hơgor Paranưng hăng đing ayup Saranai hmư̆ dik dak, lu plơi pla djuai ania Chăm ƀơi kual Dơnung tong krah yak nao bơyan ngă yang Rija Nagar-tơlơi ngui ngă yang thun phrâo tui thun mơnuih djuai ania Chăm. Amăng hrơi mông dik dak mơ-ak mơng hơdôm tơlơi ayun suang gru grua, pĕ gông brô̆ hăng buh eng ai hiam djuai ania, mơnuih djuai ania Chăm mut hrŏm pơƀuh gru grua sô hơđăp, djă pioh hăng lăi pơthâo hơdôm gru grua hiam mơng đưm đă ră hlâo.

VOV.Jarai-Kiăng pơhưč tuai hyu ngui hăng djơ̆ hnơ̆ng rơnoh pơđĭ kyar mơ̆ng bruă tuai čuă ngui, tơring čar Khánh Hòa amra pơphun jơnum lu wơ̆t pơdah thâo gru grua, tuai čuă ngui pơprong, laih dơ̆ng pơblih ƀơƀrư̆ gơnam pơkra ming kiăng pơđĭ rơnoh anăn păn gơnam sĭ mơdrô pơ anih tuai kiăng nao.

VOV.Jarai-Rơnuč rơwang hrơi tơjuh rơgao, ƀơi bul pơtâo Ây Nô, să Buôn Đôn, tơring čar Dak Lak, jơlan hơdră ngui tê̆t Lao-Bunpimay 2026 pơphun dik dak mơ-ak, phưč lu mơnuih ƀôn sang hăng tuai čuă ngui mut hrŏm.

VOV.Jarai - Amăng tơlơi hơdip rơnuk phrâo, bruă pơkra gơnam đưm mơ̆ng djuai ania Jarai ƀơi Gia Lai ăt dŏ djă pioh kah hăng arăt drah, ia rô amăng gru grua hơđong biă mă. Mơ̆ng hơdôm ƀĕ kram, phun pơ-o, hơmâo krih, tơluah, mơñam jing hơkă, jing rêu rô, pioh mă yua amăng sang anŏ, truh kơ rup trah pơ pơsat ƀu hơmâo pơkra ten hăng măi mok hơget ôh, samơ̆ ñu yom biă, pơƀuh sit tơlơi hơdip, pran jua, anŏ rơgơi, pran jua gir kơtir mơ̆ng ƀing anong wa. Ƀu kơnong gơnam či yua ƀudah anŏ hiam amăng rup trah đôč ôh, ñu jing tơlơi lăp hơdor, tơlơi ră ruai kơ tơlơi hơdip hăng tơlơi phiăn, gru ama grua amĭ mơ̆ng djuai ania Jarai.