VOV4.Jarai - Ƀơi mông Jơnum ƀu tui tơđar tal 5 (Khua pơ ala mơnuih ƀôn sang dêh čar tal 15), sa amăng pă tơlơi yôm phun hơmâo ƀing khua pơƀut bơkơtuai kơ Tơlơi pơtrun hơdôm jơlan hơdră ngă bruă, tơlơi djru phara kơ hơdôm jơlan hơdră dêh čar gơñăm kiăng ngă. Ƀing khua pơ ala mơnuih ƀôn sang tŭ ư hăng hơdră ngă lăng hlâo jao bruă phara kơ gưl tơring glông amăng wai lăng hăng pơphun ngă hơdôm jơlan hơdră dêh čar pơtrun; laih dong kiăng pơđĭ tui tơlơi rơgơi mă yua prăk kơ ƀing khua, biă ñu lĕ ƀơi tơring glông đah mơ̆ng ngă hơdôm kơčăo bruă anet mơ̆ng jơlan hơdră.

VOV4.Jarai-Hăng tơlơi pơsit “Pơpă kiăng hơmâo hlăk ai, bruă hơget tơnap hơmâo hlăk ai”, amăng thun 2023, hlăk ai tơring čar Gia Lai hơmâo pok pơhai lu jơlan hơdră, bruă mă sit nik amăng bruă “Hlăk ai gum tơngan hrŏm man pơdong plơi pla phrâo”. Mơng anun, ngă pơđŏm tui ao mơtah gum djru, ba jơlan hlâo, lêng gơgrong amăng pơđĭ kyar mơng mơnuih mơnam.

VOV4.Jarai – Hăng sa čô djuai ania Tày, tơkeng rai hăng prong đĭ ƀơi plơi pla Đông Khê tơring čar Cao Bằng – anih mơ̆ gông tính tẩu, er adôh then hmâo pơđom pioh laih amăng pran jua, anun khă nao dô̆ pơ̆ kual lŏn phrâo, ơi Nông Văn Hưu (75 thun) ăt hor kơ er adôh đưm mơ̆ng djuai ania pô mơn hăng dô̆ pơmin na nao mơ̆ hăng bruă ngă hiưm hơpă djă pioh, pơtô glăi tơlơi adôh anai kơ djuai ania pô ƀơi anih pô ñu dô̆.

VOV4.Jarai – Thun 2023, hmâo 3 bôh să ngă hră pơdŏng plơi pla phrâo tui hơdră pơkă phrâo. Khă să akă hmâo să hơpă dưi djơ̆ hăng abih bang hơdôm tơhnal pơkă ba tơbiă, samơ̆ pơdŏng plơi pla phrâo pơđĭ dlông brơi ƀuh hơdôm bôh tơhnal sit nik, pơđĭ tui tơlơi hơdip mơda gơnam tam hăng pran jua kơ mơnuih ƀôn sang. Nguyễn Thảo – Pô hyu mă tơlơi pơhing phrâo Gong phun jua pơhiăo dêh čar Việt Nam dô̆ mă bruă ƀơi Dap Kơdư hmâo tơlơi čih lăi nao truh bôh tơhnal pơdŏng plơi pla phrâo pơđĭ dlông ƀơi să Biển Hồ, plơi prong Plei Ku.

VOV4.Jarai-Thun 2023 yua kơ thâo jak iâu, mă yua hơmâo tơlơi dưi mơng gru grua amăng bruă man pơdong plơi pla phrâo kual mơnuih djuai ania ƀiă tơring čar Kon Tum hơmâo lu tơlơi pơplih phrâo. Hăng tơlơi gơgrong lĕ akŏ phun amăng man pơdong plơi pla phrâo, lu mơnuih djuai ania ƀiă amăng tơring čar Kon Tum hơmâo gir run amăng bruă bơwih ƀong hrưn đĭ lu dong prăk pơhrui hăng pơgôp pơplih ƀô̆ mơta plơi pla ƀon lan.

VOV4.Jarai-Thun 2023, mah bơbeč lu tơlơi tơnap tap hrŏm bơwih ƀong huă amăng dêh čar, samơ̆ yua ngă tui hmar beč bal ƀiă pơblih pơjeh phun pla, ba yua boh thâo ia rơgơi phrâo amăng bruă ngă hmua, rơnoh pơhrui glăi mơ̆ng mơnuih ƀôn sang djuai ania K’ho ƀơi să Hiệp An, tơring glông Đưk Trŏng (Lâm Đồng) ăt đĭ đăi mơ̆n. Să Hiệp An ăt ngă giong laih tơhnal pơkă man pơdong plơi pla phrâo tui tơhnal pơkă phrâo hloh.

VOV4.Jarai - Hăng bruă dưm truă camera krăp lăng bruă arăng tuh asuk ruk, pla bơnga plih hĭ anih ană plơi tuh asuk mơ̆ng hlăk ai mơ̆ kual giăm guai 2 boh să Dak Liêng hăng Dak Nuê, tơring glông Lăk, tơring čar Dak Lăk jing mơtah hiam, agaih hloh. Bruă ană plơi tuh asuk ča čot pơ anai plai ƀiă laih. Hơbô̆ bruă blung a hơmâo tŭ yua amăng bruă pơgang ayuh hyiăng, anih hơdip, glăk hơmâo hlăk ai amăng plơi pok prong tui dong.

VOV4.Jarai - Bruă dŏ rơkơi bơnai aka ƀu truh thun hăng dŏ ană anong wa pô ăt dŏ hơmâo đôč amăng hơdôm kual mơnuih ƀôn sang djuai ƀiă ƀơi tơring čar Dak Lăk. hơdôm thun laih rơgao, mah gong gai hăng hơdôm anom bruă bơdjơ̆ nao gir pơtô pơblang kiăng plai ƀiă, pơgăn hĭ, samơ̆ truh ră anai ăt dŏ hơmâo đôč, ba glăi lu tơlơi sat răm. Ngă tui Kơčăo bruă “Plai ƀiă bruă pơdô̆ rơkơi bơnai aka ƀu truh thun hăng dŏ glăi ană anong wa pô amăng kual mơnuih ƀôn sang djuai ƀiă” phrâo anai, Anom bruă Djuai ania tơring čar Dak Lăk ngă hrŏm hăng Jơnum min mơnuih ƀôn sang hơdôm boh tơring pơtrut pơtô pơblang kiăng plai ƀiă hơmâo mơnuih dŏ ung mơ̆ng muai bơnai mơ̆ng anet.

VOV4.Jarai - Bruă pok pơhai 3 jơlan hơdră dêh čar pơtrun kơ man pơdong plơi pla phrâo thun 2021-2025; hrŏ trun mrô sang anŏ rin hơđong kơjăp rơwang thun 2021-2025; pơđĭ kyar bơwih ƀong huă - mơnuih mơnam kual mơnuih ƀôn sang djuai ƀiă hăng čư̆ siăng rơwang thun 2021-2023 bưp tơnap tap, phun ñu lĕ bruă kah pơpha gưl ngă bruă aka ƀu truh anih, hơmâo lu đơi hră pơ-ar pơtô ba anung jing bruă ngă tơnap tui. Truh mông anai, dŏ kơnong 2 thun yơh abih laih bruă ngă tui jơlan hơdră thun 2021-2025. Yua hnun kiăng hơmâo hơdră pơsir hĭ hơdôm tơlơi tơnap, aka ƀu djơ̆ amăng hrơi blan rơgao.

VOV4.Jarai - Mơnuih apăn bruă Ping gah Y Phen lĕ djuai ania M’nông, 37 thun, dŏ amăng ƀuôn Kuốp, să Dray Sap, tơring glông Krông Ana, tơring čar Dak Lak. Hơdôm thun laih rơgao, hrŏm hăng ngă pơgiong bruă jao lơm ngă Khua khul mơnuih ngă hmua să Dray Sap, Y Phen ăt ba jơlan hlâo amăng hơdôm bruă pơđĭ kyar bơwih ƀong huă kiăng pơhrŏ trun ƀun rin hăng pơgôp man pơdong plơi pla phrâo. Hăng hơdôm tơlơi dưi amăng bruă mă, 5 thun mơtăm ñu hơmâo khul mơnuih ngă hmua tơring čar Dak Lak pơpŭ lĕ ding kơna khul ngă hmua bơwih ƀong rơgơi. Pô mă tơlơi pơhing phrâo amăng črăn hơdră hơmâo mông bơră ruai hăng Y Phen Niê kơ bruă bơwih ƀong huă kah hăng bruă mă amăng khul mơnuih ngă hmua.