VOV4.Jarai - Hăng anăn “Đại ngàn Tây Nguyên - Tinh hoa hội tụ” - Glai klô Dap Kơdư - Tum pơƀut anŏ hiam klă hloh, mơ̆ng lơ 29/11 truh lơ 1/12 ƀơi plơi prong Kon Tum, tơring čar Kon Tum hơmâo pơphun Hrơi jơnum ngui gru grua bơkơjăp drơi jăn hăng tuai čuă ngui djŏp djuai ania kual Dap Kơdư tal 1, thun 2023. Abih bang bruă jơnum ngui djă gru hiam mơ̆ng kual Dap Kơdư hing ang pơpŭ kơ anŏ yôm mơ̆ng gru đưm hiam mơ̆ng djŏp djuai ania kual Dap Kơdư, laih dong pơƀuh hyu, pơhưč tuai čuă ngui.

VOV4.Jarai-Yua hơmâo prăk čan mơ̆ng Sang bruă prăk ngă hmua hăng pơđĭ kyar plơi pla tơring čar Dak Nông, lu sang anŏ mơnuih ƀôn sang djuai ania Bnông dưi hơmâo prăk kăk tuh pơ alin kơ bruă ngă hmua, ƀơ ƀrư̆ pơđĭ tui tơlơi hơdip mơda pơklaih mơ̆ng ƀun rin. Mơnuih ƀôn sang dưi čan prăk djơ̆ hăng bơyan ngă hmua anun huăi hyu čan ling prăk gah rơngiao kơmlai lu kah hăng hlâo adih.

VOV4.Jarai – Phrâo anai, ƀơi plơi prong Plei Ku, Ping gah tơring čar Gia Lai, Sang hră pơtô bruă Kơđi čar Hồ Chí Minh dêh čar ta phrâo pơphun bơkơtuai bôh thâo phrâo pơđĭ kyar kơjăp bruă tuai čuă lăng bôh thâo hăng čuă lăng plơi pla glai klô kơjăp phik kual Dap Kơdư amăng rơwang ră anai. Ƀơi anai, 50 mơta tơlơi čih gum lăi mơ̆ng ƀing kơsem min bôh thâo phrâo, mơnuih wai lăng, anom bơwih ƀong gah tuai čuă ngui hmâo laih hơdôm tơlơi gum hơgôp nua yôm kơsem min hăng bôh nik kơ tuai čuă ngui Dap Kơdư.

VOV4.Jarai-Jơlan hơdră tui hơnong pơkă dêh čar amăng man pơdong plơi pla phrâo ƀơi tơring glông, tơring čar Lâm Đồng jai hrơi ngă lar hyu djop anih, hăng lu bruă mă pơčeh phrâo hăng sit nik. Sa amăng hơdôm bruă pơphun anun lĕ “Hrơi năm man pơdong plơi pla phrâo” ƀơi tơring glông Di Linh. Lơm truh hrơi anai, neh met wa amăng djop plơi pla kual ataih tơring glông gum pơgôp, gum tơngan hrŏm man pơdong plơi pla hăng hơdôm bruă mă sit nik.

VOV4.Jarai - Ngă tui hơnong pơkă mrô 4 kơ mă yua apui lơtrik amăng man pơdong plơi pla phrâo, hơdôm thun laih rơgao, kông ti apui lơtrik Dak Lak đing nao pơđĭ kyar dăng hyu hrĕ apui lơtrik hăng pơhlôm brơi klă ƀiă dong, djơ̆ hăng tơlơi kiăng pơđĭ kyar bơwih ƀong hăng tơlơi hơdip mơda mơng mơnuih ƀon sang.

VOV4.Jarai-Y Tuyên Ƀuôn Krông (B.Krông) djuai ania Êđê juăt iâu lĕ Ama Ha, sa čô mơnuih ping gah ba gru hlâo dŏ pơ Ƀuôn Drai H’Ling, să Hòa Xuân, plơi prong Ƀuôn Ma Thuôt, tơring čar Dak Lak. Hăng 30 thun ngă bruă kơ mơnuih mơnam ƀơi plơi pla, ñu lĕ mơnuih ƀôn sang khăp pơpŭ biă mă. Hloh kơ anun dơ̆ng, hăng sa čô mơnuih glăm ba ngă Kơ-iăng Khua ping gah plơi, ngă rah Khua Khua plơi mơnuih ƀôn sang đăo kơnang biă mă, yua ñu hơmâo djru pơtrut tui bruă man pơdong plơi pla phrâo.

VOV4.Jarai-Tơring čar Dak Lak hơmâo giăm 2.300 čô čơđai drit druai, amăng anun lu čơđai tơnap tap biă mă. Kơnang kơ hơdră “Amĭ mĕm” ƀudah ngă amĭ lăng ba yua Khul đah kơmơi mut phung Việt Nam jak iâu, lu čơđai muai drit druai, ƀu hơmâo anih kơnang ƀơi Dak Lak dưi tŭ mă tơlơi djru, lăng ba hơmâo gơnam yua hăng juh alum pran jua. Anai lĕ hơdôm anih ưh kơnang khăp pap djru ƀing čơđai găn rơgao hơdôm tơlơi rơngiă rơngiom, hrưn đĭ amăng tơlơi hơdip mơda. H’Xĭu pô čih tơlơi pơhing Gong phun jua pơhiăp Việt Nam dŏ ƀơi kual Lŏn Dap Kơdư hơmâo tơlơi čih lăi nao kơ anai.

VOV4.Jarai – Rơbêh kơ 10 thun dưi ruah ngă tha plơi, ơi Siu Bình, ƀơi plơi Sơn, să Ia Nan, tơring glông Đức Cơ, tơring čar Gia Lai hmâo gum hơgôp laih tơlơi pơplih mơ̆ng plơi ƀơi guai dêh čar anai hăng hơdôm bruă mă rơđah, sit nik. Hrăm hăng ngă tui Wa, abih pran jua hăng bruă mă, pơhiăp nao hrŏm hăng bruă mă, ba gru hlâo rơđah amăng rim bruă mă yua kơ tơlơi hơdip trơi pơđao mơ̆ng ană plơi, rim bruă mă ƀu prong mơ̆ng tha plơi Siu Bình hmâo djru pơdŏng laih plơi Sơn đĭ kyar ră anai.

VOV4.Jarai-Amăng hơdôm thun laih rơgao, mơng rơnoh prăk kah trun mơng Ping gah, Kơnuk kơna, rơnoh prăk jak iâu gum pơgôp mơng mơnuih mơnam, hơmâo djru brơi hơdôm boh să amăng đơ đam dêh čar ƀơƀrư̆ ngă pơgiong hơnong pơkă dêh čar amăng man pơdong plơi pla phrâo hăng plơi pla tui kru hle. Tui hơnong pơkă să plơi pla phrâo hăng plơi pla tui kru hle rơwang thun 2021-2025, hơmâo lu hơnong pơkă kiăng hrưn đĭ klă ƀiă dong, tơnap ngă tui ƀiă dong pơhmu hăng rơwang hlâo anun. Amăng anun hơnong pơkă wai lăng anih dŏ hơdip jum dar arăng lăng kar hăng hơnong pơkă ƀu kiăng lu prăk kak tuh pơ alin mơng kơnuk kơna, samơ̆ jing tơlơi ngă tơnap tap ƀơi hơdôm boh ƀon lan.

VOV4.Jarai - Jơlan hơdră man pơdong plơi pla phrâo glăk tŭ yua biă ƀơi tơring čar Dak Nông, ƀô̆ adung mơta plơi pla jai hrơi pơplih hiam.