VOV4.K’ho- Ngai 18/5, Sở y tế càr Lâm Đồng pà gĭt, cồng nha xét nghiệm dơ̆ 2 gơwèt mờ 122 nă cau gơrềng tus cau kòp sồ 3141 ndrờm ờ bơtờp kòp Covid-19. Lài mờ tŭ sền gĭt bơtờp kòp Covid-19, cau kòp sồ 3141 bơh Bắc Ninh tus Dà Làc lòt nhơl tàm ală ngai bơh ngai 2/5 tus ngai 5/5 mờ geh tiah lòt rê uă ngan. Càr Lâm Đồng neh tơrgùm ală mpồl lơh broă geh gơnoar sơr băc mhar jòi gĭt tiah lòt rê mờ geh 776 nă cau geh gơrềng (tàm hơ̆ geh 237 nă cau gơwèt F1 mờ 539 nă cau gơwèt F2), mơkung bơyai lơh ală broă lơh ai ơm yah ngài nàng rcang sơndră kòp Covid-19.

Bơdìh mờ broă lơh jat niam ală broă lơh rcang sơndră kòp, broă lơh ƀồm sơnơm lơh kloh khuẩn, pơs wàs tiah ơm kis kung gam geh càr Lâm Đồng lơh ngan lam lơh

 Tŭ do, ală anih lơh broă geh gơnoar càr Lâm Đồng gam lơh jat broă lơh ai ơm yah ngài 380 nă cau geh gơrềng tus cau kòp sồ 3141. Tàm ală cau do, geh 5 nă cau geh ai ơm yah ngài tàm Hìu sơnơm, 233 nă cau ai ơm yah ngài tơrgùm bal mờ 42 nă cau ai ơm yah ngài tàm hìu. Tŭ do, broă lơh rcang sơndră kòp kung gam geh ală mpồl lơh broă geh gơnoar càr dê lơh ngan lam lơh.

Cau mblàng K’ Hạnh