VOV4.K’ho- Ồng Nay Phi La, Kuang atbồ Sở Y tế Dak Lak pà gĭt, tus mho ngai 4/6, 2 nă cau kòp Covid-19, hơ̆ là cau kòp sồ 3237 mờ 3334 tàm càr ndrờm geh cồng nha xét nghiệm 3 dơ̆ ờ bơtờp mờ Sars CoV-2.

                                                  Tiah sơm kòp cau kòp Covid-19 tàm Dak Lak

Jat hơ̆, 2 nă cau kòp sồ 3237 mờ 3334 là 2 nă cau kòp geh sền gŏ tàm ngai 8 mờ ngai 9/5. Jơh 2 nă cau do ndrờm ơm tàm gùng kòn 189/1 gùng Mai Hắc Đế, sơnah ƀòn Tân Thành, ƀòn dờng Buôn Ma Thuột, càr Dak Lak. Do là 2 nă cau geh gơrềng tus cau kòp tàm Đà Nẵng.

Bàr nă cau kòp do gam sơm kòp tàm Hìu sơnơm kòp jòr bơsiă gơlik mhàm mờ Kòp klờm soh càr Dak Lak dê. Tơnơ̆ 27 ngai sơm kòp, să jan 2 nă cau kòp bè ờs mờ 3 dơ̆ xét nghiệm pa do ndrờm ai cồng nha ờ bơtờp mờ Sars CoV-2. Kờp dŭ, 2 nă cau do geh ai rê tàm hìu tàm poh tus.

Cau mblàng K’Hạnh