VOV4.K’ho - Drim òr (26/03), tàm pơrjum bơsram tàp bè broă cĭt sơnơm vaccine kòp Covid-19. Bộ trưởng ồng Nguyễn Thanh Long pà gĭt, tơngai pa do, he neh sền gròi geh kòp gơtờp geh cồng nha 3 dơ̆ gơtờp kòp Covid-19.

Gơtờp dơ̆ 3 mờ tiah tờm là càr Hải Dương geh khà cau gơtờp uă ngan, tus tŭ do kung gam geh ờ uă cau gơtìp rah rài tài he lơh jăt broă tam cah ngài, jòi tềl gơtờp kòp mơya geh tŭ 2, 3 tiah, ờ uă tiah ờ hềt lơh nền nòn. Mơya, bộ trưởng Bộ Y tế kung ờ sŭk bè broă di gơlan gơtìp dơ̆ gơtờp kòp Covid-19 dơ̆ 4 tàm lơgar he mờ bơta gơtờp di gơlan uă rơlao mờ geh gŏ loh làng ngan, tài tàm bơta tŭ do ală lơgar tàm tiah do gam gơtìp kal ke bơh kòp do.

Den tàng, Bộ Y tế sồr ală tiah lơh jăt pràn ală broă rơcang sơndră mờ kòp gơtờp di jăt mờ jơnau đơng lam bơh Chính phủ, Thủ tướng Chính phủ, Mpồl đơng lam dà lơgar rơcang sơndră mờ kòp gơtòp bơh Bộ Y tế bè xét nghiệm, jòi tềl gơtòp, tam cah ngài, sơm kòp.

Cau mblàng Ndong Brawl