VOV4.K’ho- Kung tàm dơ̆ pơrjum bơh Thường trục Chính phủ dê bè rơcang sơndră kòp Covid-19, Bộ trưởng Bộ Y tế, ồng Nguyễn Thanh Long pà git, gùt lơgar neh cit sơnơm vaccine ai 20 rbô 695 nă cau in, tàm hơ̆ mìng geh 2, 3 nă cau gơbàn bơta ờ niam mờ tŭ do pràn kơldang să jan neh niam. Kuơmàng ờ hềt git gŏ cau lơi gơ rềng tus gơ klac kơt mhàm bè bơta kơ lôi rơcang lài. Bulah bè hơ̆ nàng gàr ờdo ờdă ngan rlau jơh, Bộ gam đơng lam ală Sở Y tế pơnjat tai sơlơ bơto pơlam gơ wèt tus mờ ală kuang bàng lơh sơnơm mờ lam lơh ală anih cit dipal, gàr ờ do ờ dă hơ̆ sồng cit.

Bơdìh mờ khà sơnơm vaccine blơi bơh lơgar ndai, Bộ Y tế gam lơh ngan chồl mhar tơngai kơlôi sơnơng, lơh gơlik sơnơm vaccine tàm lơgar. Sơnơm vaccine Nanocovax bơh kong ti NANOGEN lơh gơlik neh geh cit tơrlòng lài tơngai dơ̆ 2 tàm kòn bơnus bơh ngai 26/02/2021. Sơnơm vaccine Covivac bơh IVAC lơh gơlik sơnđờm cit tơrlòng lài bơh ngai 15/3/2021. Sơnơm vaccine bơh Việt Nam lơh gơlik kờp dŭ geh ngui tàm nam 2022 nàng gơtùi rơcang lài sơnơm vaccine, gàr tơl sơnơm lơh gơlik, gàr tơl niam gah lơh sơnơm, rơcang lài sơndră tŭ geh ală kòp dờng tàm tơngai tơnơ̆ do.

Cau mblàng K’Duẩn