Ngài mờ kơnhoàl Đức Trọng, càr Lâm Đồng rlau 30 kơi sồ, ntum tiah sar lơgar ngài Ninh Loan gam lơh ala\ gơl gùng pa tus tơl bòn, tơrbo\ tơn tus tơl blàng sre, lơh geh tai bơta pràn nàng chồl pràn tơmù rbah mgar mờ kơljap tàm ntum.

            Jat ồng Phạm Đức Tuấn kuang atbồ đơng lam Đảng mờ la kuang atbồ lam sồr bơt bơtàu bòn lơgar pa ntum Ninh Loan, den bol a` gam lòt tàm gùng geh lơh mờ chài, gùng sơmang lòt  gan ala\ tiah lơh sa tờm ngan bơh ntum. Gùng lơi kung geh lơh ơnàng mờ ua\ ha pah, rơndeh dờng gơtùi  mut tus hờ blàng hìu, tus tàm sươn sre. Ồng Phạm Đức Tuấn kờp jơh gùng lòt tàm ntum Ninh Loan tus tu\ do geh 2 gùng dờng gan ntum, kờp jơh jòng tus rlau 12 kơi sồ, neh lơh geh khà 100%  da\ mơ chài: 12 nơm gùng tàm bòn, gùng tàm blàng sre jòng mờr 17 kơi sồ, lơh jat khà gùng da\  sơmang, bê tông gùng bòn di khà bơh Gah gùng lòt pơndiang phan dà lơgar mờ di khà gùng tuh  lu\ jat tiah. Ngan ngồn, bơh nam 2011, tu\ mut lơh ala\ broa\ lơh bơt bơtàu bòn lơgar pa tus tu\ do, ntum Ninh Loan neh bơcri rlau 38 tơmàn 700 tơlak pria\ nàng lơh pa, mờ lơh niam wơl gùng lòt go\ ngan bè 4 kơi sồ 400 thơt gùng da\ chài la gùng tờm, lơh niam wơk 7 kơi sồ gùng da\ lu\, gùng bê tông sơmang gùng bòn. Tàm hơ\,  làng bol neh ai is ù lơh gùng mờ kờp pria\ geh tus di 4 tơmàn 500 tơlak pria\ mờ pria\ ta\ pơ gồp bal rlau 1 tơmàn 800 tơlak pria\...

            Kềng gah gùng dờng, bol a` tus còp dùl ba\ ù lơh hìu krơh ơnàng 1 sào 7 chuờng tam biap jat công nghệ cao di bòn Ninh Thái, ntum Ninh Loan. Cau tờm sươn la ồng Phạm Văn Tụ ai git, tàm dùl nam pa do, hìu nha\ ồng geh tus 100 tơlak pria\ bơh pria\ cồng tac biap tam tàm hìu krơh do. Ồng Trần Ngọc Năm kuang atbồ Mpồl cau lơh sa ntum Ninh Loan ai git: Gùng pa neh geh den tàng ờ ngòt broa\ pơndiang phan lơh geh, phơng tuh rê hờ sươn lơh sa. Slơ ờ pal  ngòt broa\ pơndiang blơi tac phan lơh geh  lòt gùng ngài. Tu\ do geh ua\ ngan cau blơi phan tam pơr lòng blơi ai rơndeh tus blơi biap tàm sươn, bơkàu bơh hìu nha\ ồng Tụ đơs is, bơh cau lơh sa ntum Ninh Loan đơs bal.

            Bơh nam 2011 rê hờ lài, hìu nha\ ồng Tụ geh pria\ ờ jơnhua tài gùt nam mìng tam ala\ phan tam bè ờs. Rlau 3 nam pa do, bơh tu\ geh kơrnuat jơnau sơnđan bơh mpồl đơng lam Đảng ntum Ninh Loan bè bơtàu tơngguh lơh broa\ sa jat gùng công nghệ cao, anih duh broa\ làng bol ntum neh geh lơh bal mờ ala\ mpồl bơtìan gùng dra\ bal bòn lơgar geh bơyai lơh lơh ala\ broa\ lơh lài, bơh hơ\ lam sồr làng bol lơh ua\ di pal mờ bơta geh, bơta pràn bơcri tàm ba\ ù bơh hìu nha\. Ồng Tụ la dùl tàm ala\ hìu nha\ geh lam lơh lài  lơh hìu krơh geh ròt tuh dà is tơn tàm ntum Ninh Loan, kờp khà pria\ bơcri mờr 10 tơlak pria\. Sùm tam pơdar ala\ kàl tam biap, bơkàu tàm nam jat bơta pơlam chài bơh gah lơh broa\ sa bơh càr, bơh kơnhoàl mờ mpồl bơto pơlam broa\ lơh sa bơh ntum, lài mờ tu\ tơnhàu geh cồng 100 tơlak pria\ dùl nam tàm mre\ ờ hòi geh đơs, ồng Tụ neh tơnhàu geh ua\ cồng nha rlau tàm bal mờ ba\ ù tam bơkàu cẩm chướng, khoah tơnhàu Nhờk…

            Cau lơh broa\ sa lòt lài lơh sa  công nghệ cao mơ kung geh jar mhar tus bal broa\ lam sồr ala\ hìu nha\ cau lơh broa\ sa ndai lơh jat di bơta chài, rhời pờ ơnàng ala\  ba\ ù cèng geh cồng nha lơh sa jơnhua rlau. Kờp du\ tus jơh nam 2014, gùt ntum Ninh Loan  geh lơh geh di 3 lồ biap, bơkàu, mre\ ờ hòi, blơn sut…geh tam geh kềng ala\ ròt bồm dà is tơn,  gam geh ala\ broa\ geh ngui nilong glòm ù kơryan phan kis tàm ù. Geh bơta sền gròi dong kờl tơl bơta bươn boài bơh kơna\ Đảng, gơnoar atbồ ntum Ninh Loan, tus tu\ do,  ala\ hìu nha\  lơh sa do neh ring bal  trơ gùl lơh broa\ bal, lơh geh dùl mpồl  lơh sa bal nàng geh wèt tus broa\ lơh sa, ka\ bro  jat gùng tơl niam mờ  bơtàu tơngguh jat khà kàl. Mờ broa\ lơh tam gơl do,  ntum Ninh Loan neh  mut lơh ala\ broa\ lơh gơguh mhar tơmù rbah niam ngan: Bơh 6,2% nam 2011 gơmù gam 3,2% tàm lồi nam 2014, kờp du\ nam nam 2015, khà hìu nha\ rbah pơnjat tai gơmù gam hờđơm 3%. Geh kờp bal tơl na\ cau tàm ntum Ninh Loan neh gơguh sơbac mhar, 27 tơlak pria\ tàm nam 2011, gơguh 38 tơlak pria\ tàm nam 2014 mờ kờp du\ geh rlau 40 tơlak pria\ tàm nam 2015. Tu\ do, geh kờp bal tơl na\ cau tàm ntum Ninh Loan la 1 tàm 17 broa\ lơh bơh bòn lơgar pa neh lơh geh, 2 khà broa\ gam wơl gam geh lơh gơs bơh tu\ do tus lồi nam 2014.

                                                                                                Cau mblàng K’ Brọp