VOV4.K’ho- Tơngai rềp ndo, mờ ală bơta tam gơl dờng ngan tàm gah kông nghệ thông tin, tam gơl sồ nàng prap gàr, atbồ phan kuơ lời wơl niam chài là broă lơh geh jơh ală anih lơh broă dà lơgar mờ mpồl lơh broă dùl nă să is kờñ ală bơta kuơ niam chài bơh jŏ ngui. Bơt bơtàu ală dữ liệu bal tàm gah niam chài kung là dùl tàm ală jơnau kờñ geh wèt tus tŭ lam lơh Rơndap broă sồ 6 “Prap gàr, tơnguh bơta kuơ niam chài bơh jŏ niam bơnĕ bơh ală jơi bơtiàn kòn cau dùl êt nă cau dê pơgồp bal mờ bơtàu tơnguh nhơl chờ, gơ wèt broă lơh Jơnau kờñ dà lơgar bơtàu tơnguh lơh sa mpồl bơtiàn tàm tiah jơi bơtiàn kòn cau dùl êt nă cau.

Càr Thái Nguyên geh git tus là tiah tờm tam tìp bal lơh sa mpồl bơtiàn đah tiah kơh bơnơm mờ tiah ring đah tô dà lơgar, mờ geh tus 46 jơi bơtiàn kòn cau oh mi ơm kis bal. Ndrờm mờ broă, Thái Nguyên kung geh khà phan lời wơl niam chài bơh jŏ uă mờ li la ngan.

Tàm Ƀảo tàng càr Thái Nguyên, tơngai do, ală broă lơh kông nghệ krơi is bè sềr rùp 3D, tam gơl sồ dữ liệu phan lời kir gam hời rơ hời tam gơl broă atbồ ờs mờng, mờ rlau 32 rbô phan kah kir gam geh prap gàr tàm do. Mò Lương Thị Duyên, Phó Kuang atbồ Ƀảo tàng pà git: “Bol hi git là, do là broă kuơmàng ngan, broă do dong ƀảo tàng in geh tŭ niam nàng geh yal tơnggit tus nac lòt sền ală phan tơrgùm geh mờ tŭ do ƀảo tàng gam prap. Mờ kung dong ƀuơn ƀuài tàm broă ngui, jòi git jơnau yal, yal tơnggit tus gal ngan làng bol in.”

Jat ală cau jak chài đơs, broă ngui kông nghệ pa di ngan mờ broă lơh prap gàr, tơnguh bơta kuơ phan lời wơl. Tŭ tam gơl sồ, kông nghệ ai gơnoar tơrgùm jơh sap ntas, rùp hin, kuơmàng là sap mpờl gŏ mờ rùp hin 3D gơ lơh bè ngan ngồn, gơ dờp geh bơta gròi sền. Bal mờ hơ̆, ală phan lời wơl geh jơh bal phan bơna mờ ờ di phan bơna tàm bơta tam gơl sồ gơtùi geh yal tơnggit mhar ngan bơh mạng internet, ờ gơtìp gơ rềng bè tŭ tơngai, anih, dà  đơs. Gơ wèt mờ càr Thái Nguyên, tam gơl sồ phan kuơ lời wơl kung pa geh chồl pràn tàm tơngai rềp ndo. Kuơmàng là bơh tơnơ̆ tŭ Ƀan Cấp hàñ Đảng ƀộ càr tơlik Nghị quyết sồ 1 bè tam gơl sồ. Jat bi Nguyễn Thị Trang, Kuang atbồ Cơldŭ lơh broă niam chài- mblàng yal jơnau tơnggit kơnhoàl Phú Bình, càr Thái Nguyên pà git, mờ dùl khà li la ală phan kuơ lời wơl gam geh, chồl pràn ngui kông nghệ sồ gam geh ală kấp, gah broă lơh, ală tiah, mpồl lơh broă jơh nùs dờp mờ lơh jat: “Tàm broă lơh tam gơl sồ gơ rềng tis gah niam chài den Ủy ƀan kơnhoàl kung đal git là tơrgùm tam gơl sồ tàm gah tiah tềl kah yau mờ geh lam lơh lài tam gơl sồ lời ai tiah tềl kah yau kấp dà lơgar in nàng làng bol tàm ƀòn lơgar, nac nhơl chờ bal mờ gơp bơyô tàm lơgar, tàm dunia kung git tus.”

Tŭ do, tàm càr Thái Nguyên geh rlau 800 tiah tềl kah yau, tù tiah niam tiơng pơn rơ rlau 500 phan kuơ lời wơl niam chài ờ di phan bơna, tàm hơ̆ geh 17 phan kuơ lời wơl bơh cau jơi bơtiàn kòn cau dùl êt nă cau dê geh pơn iờ să ngan dờp là phan lời wơl niam chài ờ di phan bơna dà lơgar, bal mờ git nđờ rbô phan lời kir gam geh prap gàr tàm Ƀảo tàng càr. Nàng tơnguh cồng nha broă lơh atbồ mờ yal tơnggit gah niam chài, tàp pràn să jan mờ nhơl chờ kung neh ai tơlik broă rơndap lơh, tŭ tơngai ngan ngồn nàng gơtùi mhar lơh gơs broă ngui kông nghệ sồ, pơgồp bơnah prap gàr, tơnguh bơta kuơ phan lời wơl niam chài tàm càr.

Tŭ do, mpồl bơtiàn 53 jơi bơtiàn kòn cau dùl êt nă cau gam geh rlau 14 tơlak nă cau, ơm kis rah rài tàm 52 càr, ƀòn dờng, tơrgùm tàm ală tiah gam kal ke, tiah bồ tô dà lơgar dê. Mùl màl ai gŏ, tam gơl sồ dữ liệu niam chài jơi bơtiàn kòn cau dùl êt nă cau ờ mìng dong tơnguh cồng nha broă lơh atbồ phan kuơ lời wơl niam chài, mờ gam là broă nàng lơh gơ rề uă ală bơta kuơ bơh jŏ tàm rài ngui uă kông nghệ.

Ồng Hà Việt Quân, Kuang atbồ Cơldŭ lơh broă đơng pơlam broă lơh Jơnau kờñ dà lơgar bơtàu tơnguh lơh sa mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm pà git, rơndap broă sồ 6 geh 19 tơngume mờ kờp jơh pruă tă lơh mờr 5 rbô 900 tơmàn đong. Gơtùi đơs, do là dơ̆ sơn rờp geh dùl rơndap broă dờng bè hơ̆ lời is ai gah niam chài kòn cau in. Ală kơnòl broă ngan ngồn wèt tus tơnguh ală bơta gơ dờp bè rài kis nùs nhơm, prap gàr, tơnguh ală bơta niam chài bè lơh pa phan bơna, mblàng yal, bơto bơtê tàm hìu bơsram, lam lơh ală broă lơh chờ, lơh yàng mờ kuơmàng là tam gơl sồ phan lời wơl: “Jơnau bè tam gơl sồ ală phan kuơ lời wơl niam chài den Ƀộ trưởng bol hi dê neh geh jơnau đơng lam bè broă kơlôi sơnơng bè tam gơl sồ ală broă lam lơh broă lơh Jơnau kờñ dà lơgar. Bơdìh hơ̆ tai, Ƀộ trưởng kung neh geh jơnau đơng lam pal kơlôi sơnơng, pơgồp bal mờ Ƀộ Văn hóa, Thể thao mờ Zu lịc, ală Ƀộ, gah broă lơh geh gơ rềng mờ kuơmàng là ală càr, ƀòn dờng, mpồl bơtiàn ală jơi bơtiàn kòn cau dùl êt nă cau bơt bơtàu dùl broă lơh ƀảo tàng sồ. nàng tơnguh kung bè yal tơnggit ală bơta kuơ niam chài bơh jŏ jơi bơtiàn kòn cau dùl êt nă cau dê. Mờ geh anih prap ơn cơ sỡ dữ liệu đơs bal bè niam chài, lơh sa, mpồl bơtiàn, drơng ai broă bơtàu tơnguh ală bơta kuơ bè nùs nhơm kung bè drơng ai jơnau kờñ bơtàu tơnguh lơh sa mpồl bơtiàn bơh ală broă lơh nhơl chờ dê in.”

Cau cih VOV4- Cau mblàng K’Duẩn