VOV4.K’ho - Ngai òr (26/04), càr Dak Nông neh lơh jăt broă cĭt ală ding sơnơm vaccine kòp Covid-19 sơnrờp ngan ai ală y, bác sĩ, cau lơh sơnơm lơh kơnòl tàm tiah lài tam dră mờ kòp.

Hìu sơnơm càr Dak Nông mờ hìu sơnơm ƀòn dờng Gia Nghĩa là bàr anih sơnrờp ngan geh rơwah cĭt sơnơm rơcang sơndră mờ kòp Covid-19. 100 nă cau cĭt tàm drim òr (26/04) neh lơh di mờ kơrnoăt bơh Bộ Y tế ai. Tơl nă cau tơnơ̆ mờ tŭ cĭt geh sền gròi bơh 30 tus 60 phút nàng rơcang mờ ală broă sơndră wơl bơh sơnơm, mờ geh bơto sồr sền gròi is bơta pràn kơl dang să jan tàm hìu 7 ngai.

Jăt Sở Y tế càr Dak Nông yal, dơ̆ cĭt sơnơm vaccine rơcang sơndră mờ kòp sơnrờp ngan geh bơyai lơh bơh ngai 26 nhai 4 tus ngai 12 nhai 5, geh lơh tàm 8 anih. Tàm dơ̆ sơnrờp, càr Dak Nông geh Bộ Y tế tam pà 9 rơbô ding sơnơm vaccine sơndră mờ kòp Covid-19 bơh gah lơh sơnơm AstraZeneca lơh gơs. Càr Dak Nông geh cĭt ai 2 rơbô 844 anih tờm sơnrờp ngan tam dră mờ kòp gơtờp in.

Cau mblàng Ndong Brawl