VOV4.K’ho - Mang òr (16/07), càr Dak Nông neh dờp tai dùl nă cau gơtìp kòp Covid-19. Cau kòp là cau klao sồ 44301 là L.H.D, deh nam 1988, kis tàm ƀòn Bu Boong, xã Dak Ndrung, kơnhoàl Dak Song, càr Dak Nông.

                         Jòi cau neh tìp rềp mờ cau gơtìp kòp tàm kơnhoàl Dak Song, càr Dak Nông

Tơnơ̆ mờ tŭ gŏ cau gơtìp kòp, mpồl lơh broă geh gơnoar neh jun cau kòp mờ rơndeh sơnơm tus tiah tam cah is sơm kòp Covid-19 càr dê. Mờ tam cah is ing mpồl cau ai mẫu xét nghiệm cau kòp in tơn tàm tiah ai mẫu bơh hìu sơnơm kơnhoàl Dak Song. Gah lơh broă geh gơnoar gam mhar lùp sền, jòi gŏ geh 16 nă cau neh tìp rềp mờ pơn jăt tai jòi ală cau gơrềng bal. Bal mờ hơ̆, mpồl lơh sơnơm bơyai lơh ƀồm sơnơm lơh kloh vi trùng, vi khuẩn jơh gùt dar hìu ơm cau kòp, tiah ai mẫu xét nghiệm mờ ală anih cau kòp mờng tus tàm 3 ngai pa do.

Cau mblàng Ndong Brawl