VOV4.K’ho- Mờ bơta kơlôi sơnơng pal sền gàr mờ bơto wơl broă tàñ ồi kòn cau ai rơnàng kơnòm să in, nghệ nhân H’Blong Knul, ơm tàm xã Ea Trul, kơnhoàl Krông Bông, càr Dăk Lăk neh jơh nùs tus bal ală ơdŭ bơto broă lơh ai ơruh pơnu in geh lơh tàm xã. Mò H’Blong kung tàñ is ală blah ồi kòn cau ngui tàm hìu bơnhă mờ đòm jat tac phan lơh gơs nàng pơlam tàp bơta chài tàñ ồi mờ tơnguh priă lơh geh.

Ală ngai lơh jat broă ơm yah ngài mpồl bơtiàn nàng rơcang sơndră kòp Covid-19, broă lòt rê mờ lơh mìr bơh hìu bơnhă dê gơtìp gơ rềng den tàng bi H’Giang Knul ơm tàm ƀòn Ja, xã Ea Trul, kơnhoàl Krông Bông, càr Dăk Lăk lời uă tŭ tơngai nàng lơh gơs blah ồi àu kòn cau gam tàñ.

                                                                                    Mò H’Blong Knul

Bi H’Giang pà git, tàñ ồi kòn cau là broă lơh tŭ ru broă lơh sa suơn sre dong tơnguh priă jền lơh geh. Uă nam do, ală phan ồi kòn cau tàm hìu bơnhă mờ bi tàñ gơs neh geh cau git tus mờ dan blơi. Bè hơ̆ den tàng, jơh bal 3 nă oh mi ùr bi dê ndrờm git tàñ mờ tàñ chài ngan uă bơta phan soh cau Rơđê dê: “Geh mè git tàñ bơto tàñ den tàng añ bơsram. Bơh sơn rờp bơsram kung kal ke sơl, mơya hời rơhời chài rơgơi tàñ, bè git dang che, git tàñ, git jiñ àu jat rùp bơka ờs mờng cau Rơđê dê”. Bi H’Giang là kòn ùr dơ̆ 3 bơh nghệ nhân H’Blong Knul dê, mat mờng hòi là mò Jim. Tàm ƀòn Ja kung bè tàm kơnhoàl Krông Bông, mò H’Blong geh git tus là nghệ nhân tàñ ồi kòn cau jak ngan, mòn gơs uă blah ồi kòn cau niam. Bal mờ ală bơta ồi tơ̆, ồi mă, ồi mbơn, àu, ntròñ, mò H’Blong gam geh cih mat lài dan blơi ală bơta chèu lă ƀàng, rùp bơka yồng kơlik hìu ai ală hìu tac phan ñô sa, hìu nac tàm càr mờ bơdìh càr in. Mò H’Blong yal, ală nam lài, mò geh uă sră dan blơi den tàng pal sồr ală kòn tus dong hơ̆ sồng thàn lơh gơs nàng jàu nac in, nam do tài kòp bơtờp gơlik geh kal ke den tàng khà dan blơi gơmù uă ngan. Bulah bè hơ̆, ală ngai do, mò kung gam lời tŭ tơngai nàng tàñ ală blah ồi, àu mờ prap lài. Hơ̆ bè dùl bơta mờng quèng, kung là broă nàng tàp chài tàñ ồi mpàng tê dê mờ mat geh niam rlau: “Añ git tàñ ồi bơh tŭ 15 sơnam, tus tŭ do neh geh kòn sau den neh chài ngan tàñ mờ kung kờñ bơto bơtê wơl nàng prap gàr ală bơta niam chài bơh ồng mò dê lời wơl, ngan là broă tàñ ồi kòn cau do”.

Jat ồng Châu Phan, Phó Kuang atbồ Phòng Văn hóa Thông tin kơnhoàl Krông Bông, càr Dăk Lăk yal, tàm xã Ea Trul mờ ală xã rềp bal bơh kơnhoàl Krông Bông dê, ală nam rềp ndo, ngai sơlơ geh uă oh mi cau ùr git tàñ ồi kòn cau. Gơtùi geh bơta do geh bơta tă pơgồp bơh ală nghệ nhân dê bè mò H’Blong Knul, neh bơto bơtê tơn cau kơnòm să in. Tơngai lài, mò H’Blong neh jơh nùs pơlam mờ bơto ai rlau 100 nă cau ùr tàm ală xã in git tàñ ồi kòn cau chài rơgơi: “Nghệ nhân H’Blong Knul tus bal broă lơh niam chài ờs mờng ndang mờ pờ ală ơdŭ bơto tamya, đơs eirei ndang. Bơdìh hơ̆ tai den nghệ nhân kung neh tus bal uă ơdŭ tàñ ồi kòn cau bơh anih tờm bơto broă lơh ai ơruh pơnu Dăk Lăk in geh lơh tàm xã Ea Trul bè ƀòn Cư Mil, ƀòn Ja, ƀòn Plum, ƀòn Băng Cung mờ ƀòn Mnang Dơng tàm xã Yang Mao nàng bơto wơl broă tàñ ồi kòn cau”.

Mò H’Blong yal, broă lơh bơh jŏ kòn cau dê den ngan là pal sền gàr mờ bơto wơl cau kơnòm să in, nàng tơnơ̆ do, kòn cau Rơđê he dê ờ gơtìp roh huĭ bơta niam chài. Bè hơ̆ den tàng, tàm tơngai lài, ờ mìng bơto wơl kòn sau in, mờ gam jơh nùs bơto bơtê ai uă cau kờñ gơboh mờ kờñ bơsram tàñ ồi kòn cau.

Mờ bơta lơh ngan, bơta jơh nùs tàm broă bơto bơtê, mò H’Blong neh dờp geh uă sră jờng bơh ală kấp dê, kung bè uă khà jờng tàm ală dơ̆ pơrlòng dờng, dềt tàm càr. Mò gam pơn iờ să geh Chủ tịch lơgar pà khà jờng “Nghệ nhân ưu tú” nam 2019 tài neh geh tă pơgồp jak ngan tàm broă sền gàr mờ tơnguh phan lời wơl niam chài ờ di phan bơna bơh jơi bơtiàn kòn cau dê.

Cau mblàng K’Duẩn