Mờ pria\ lơh geh mờr 300 tơlak pria\ pah nam, mìng tơnơ\ 3 nam, hìu nha\ ồng Cil Roan ơm tàm bòn Bon Dưng 1, bòn drà Lạc Dương, kơnhoàl Lạc Dương, càr Lâm Đồng neh ờ mìng geh hìu ơm dờng ơnàng mờ gah pria\ nàng pơyua tàm anih pria\ jền.

            Ồng Cil Roan kis tàm Bon Dưng 1, bòn drà Lạc Dương, kơnhoàl Lạc Dương geh 5 sào ù. Jơh tam cải thảo tus tam han tây, cà rốt… cau gùt nam sùm lơh broa\, ù kung ờ ai rlô, mơya ờ hềt tu\ lơi ồng Cil Roan geh dùl khà pria\ ua\ đau. Nam lơi lơh geh, tơl sào ù bơtuah ngan kung mìng geh rlau jơt tơlak pria\,  phan lơh geh tac ờ yòm la hìu nha\ sùm jơgloh-ồng Cil Roan kah dùl tu\ tơngai bòl glar kal ke.

            Tàm Bon Dưng 1, ờ mìng is ồng Cil Roan, git nđờ jơt hìu nha\ ndai kung gơbàn bal bè do. Ù tiah den ê\t, mờ ờ geh pria\ nàng bơcri lơh sa geh broa\ lơh dờng, den tàng rbah jơgloh sùm lir wil. Ồng Kra\jan Sron yal wơl: Hìu nha\ mìng geh 3 sào ù, sùm lơh sa gùt nam, ờ go\ tu\ lơi tơl sa. Nđờ nam do, dilah ờ geh pria\ dong kờl bơh dà lơgar geh tu\ neh chơt jơ gloh.

            Gơ ơm tềng jơng bơnơm Lang Biang, tiah pah ngai geh wa\ git nđờ rhiang na\ nac nhơl chờ, lah ngan ờ geh broa\  dong làng bol lơh pas? Tơnơ\ tu\ tơngai jòi wa\, go\ bơta kờ` zơu tây la plai sa bơkah bơh Lâm Đồng bơh cau nac la ua\ ngan, cơldu\ lơh broa\ sa kơnhoàl neh pờ ơdu\ bơto pơlam tam zơu tây làng bol in. Ờ hềt pin  ngan tàm broa\ lơh chi tam pa, ua\ cau neh ờ khin ngan tam.

            Mơya, tơnơ\ go\ ồng Cil Roan lam lài tàm pria\ geh ua\, git nđờ jơt hìu nha\ ndai neh lơh jat bal. “Tu\ pa klo cau kuang lam sồ, he gơ lơh ờ pin ngan. Gơyau sơnơng wơl, lơh jat gùng lài do kung jơgloh, den tàng neh neh lơh ngò, tam 1 sào” ồng Cil Roan yal wơl ala\ ngai sơnrờp tam zơu tây.

            3 nhai tơnơ\, kơnờm geh git bơta chài geh bơto pơlam, sươn zơu bơh ồng Cil Roan neh ai tơnhàu. Sùm 2 ngai, ồng pic geh 30 kg, tac geh 1 tơlak 200 rbô pria\. Ờ ngòt tai, ồng Cil Roan neh ngui jơh 5 sào ù nàng tam zơu tây. Mìng tơnơ\ 3 nam, mờ khà pria\ geh mờr 300 tơlak pria\ pah nam, hìu nha\ ồng Cil Roan neh ờ mìng lơh geh hìu ơm dờng ngan mờ gam geh pria\ pơyua tàm anih pria\ jền.

            Bơh geh cồng nha bơh ồng  Cil Roan, git nđờ  jơt hìu nha\ ndai kung lơh jat bal. Tơnơ\ 3 nam, mìng bơh 30 lồ zơu tây, neh cèng geh rài kis  hờm ram ai tus 70 hìu nha\ làng bol kòn cau tàm do. “Hìu mìng geh 3 sào ù mơya tu\ do dùl nam ai tơnhàu geh rlau 170 tơlak pria\, jơh jơgloh bloh”- ồng Kra\jan Sron yal wơl.

            Ồng Trần Quang Kỳ- kuang atbồ Mpồl cau lơh broa\ sa bòn drà Lạc Dương, kơnhoàl Lạc Dương, càr Lâm Đồng ai git: “Ala\ nam lài, tiah  do gam rlau 20% làng bol kòn cau di tàm khà jơgloh rbah. Den mờ bèhơ\,  mìng tơnơ\ 3 nam, ua\ hìu nha\ ờ mìng blơi geh ala\ phan bơna kas pria\ git nđờ jơt tơlak pria\, ala\ phan ngui kas pria\ bè tùh mriềt, bơnha\ buh phan sa… mờ gam lơh geh hìu ơm dờng, kơljap, ơnàng, geh ua\ hìu nha\ gam geh  tềm pềr ơn pria\ tàm anih pria\ jền…”.

                                                                                         Cau mblàng K’ Brọp.