Ờ mìng ala\ hìu nha\ lơh broa\ sa geh bơhìan tam zơu tây, tu\ do ua\ làng bol kòn cau K’ho, kis tàm bòn drà Lạc Dương, kơnhoàl Lạc Dương, càr Lâm Đồng kung neh rềp mềr ngan mờ chi tam do. Tờm zơu tây neh gơ gơs la chi tam mờng kùeng ngan mờ ngai slơ geh rề ơnàng ba\ ù tam chi tam do.

            Sươn zơu tây bơh hìu nha\ ồng Kra\ Jan Syl tàm bòn Đăng Gia, bòn drà Lạc Dương, càr Lâm Đồng neh tus 3 nam. Lơh niam wơl ding rơsĩh dà, ồng Kra\ Jan Syl yal ndang broa\ lơh ồng dê. Lài do, kung bè làng bol gùt dar , ồng Syl tam ala\ bơta biap bè ờs bè bắp sú, biap sơbê. Ồng đơs: “Tam biap den 3, 4 nhai hơ\ sồng geh tơnhàu, tu\ tac yòm den geh sa, ai tu\ tac ờ yòm den geh ờ tơl pria\ nàng blơi phơng.Go\ cau dê tam zơu, a` kung blơi sơntìl zơu rê bơtờp is mờ tam, tam jơh tàm 5 sào ù sươn. Tam zơu geh bơta niam la gơ pria\ tac geh gàr sùm, geh pic sùm pah ngai den tàng lơh sa bơtàu tơngguh rlau mờ tam biap”. Krơi mờ zơu tây tam tàm Dà Làc, sùm geh glòm àr mờ nhơt ra`, zơu tàm tàm Lạc Dương làng bol sùm glòm àr mờ nha nho ra`. Ồng Syl ai git, làng bol tam zơu tàm do sùm guh đang bơnơm, trơgùm khòm nha nho ra`, rba\ nàng glòm àr. Nha nho ra` thồm mờ gơ kơljap rlau, jo\ gơbàn ồm rlau mờ nhơt ra`, mờ gơ ờ  roh pria\ tai, gơtùi jòi geh den tàng geh ngui ua\ ngan. Tờm zơu 3 nam neh ai go\ gơmù cồng nha tơnhàu, ồng Syl gam geh broa\ lơh tam gơl rhời sơntìl zơu pa.

            Tam zơu tây mờ làng bol kòn cau he, kal ke ngan la bơta  chài, ala\ tu\ zơu gơbàn kòp. Bi Kra\ Jan Srôn geh 6 sào zơu tàm bòn Đăng Gia mờ mờ kung bè ua\ cau ndai, sươn zơu tây hìu bi kung gơtìp kal ke ngan tu\ zơu gơbàn kòp. Tu\ bè hơ\, bi Srôn pà git, bi sùm tus ala\ anih tac sơnơm sền gàr phan tam mờ ala\ tờm sươn zơu ndai nàng lùp. Ala\ cau tờm sươn cau lơi kung yal git bi in ala\ bơta pal lơh nàng bồm sơnơm jơh kòp zơu in. Bơta tam pà do, geh dong bi mhar git mờ ala\ bơta kòp bơh tờm zơu. Bal mờ hơ\, broa\ sơng ka sền gàr bi geh git bơh ala\ ơdu\ geh bơto bơh bòn drà bơyai lơh cau lơh broa\ sa in. Mờ bi Srôn, tam zơu neh tam gơl rài kis hìu nha\ bi, pria\ geh gơguh ua\, cau tàm hìu ndrờm geh broa\ lơh, ờ gam bơta ờ tơl srap bơta tai. Ờ mìng geh ngui cau lơh broa\ tàm hìu, sươn zơu hìu bi gam ơpah sùm bơh 5-6 na\ cau lơh broa\ bơh bơdĩh mờ geh kờp bal 3 tơlak pria\ dùl nhai, pơ gồp bal ai geh broa\ lơh tàm bòn lơgar.

            Đơs bè bơta pờ ơnàng ba\ ù tam zơu tàm làng bol kòn cau ơh bòn drà Lạc Dương, kuang bàng gơnoar at bồ  bòn lơgar den geh kờ` bal ngan. Ồng Nguyễn Văn Hiếu kuang jat jơng at bồ anih duh broa\ làng bol bòn drà Lạc Dương, kơnhoàl Lạc Dương, càr Lâm Đồng đơs: Tu\ do, gùt bòn drà geh rlau 50 hìu nha\ tam zơu tây, tàm hơ\ làng bol kòn cau tam geh tus 20 hìu mờ khà cau tam slơ ngai slơ gơguh ua\ tai. Tam zơu tây geh dong làng bol geh pria\ pah ngai, bơsong geh cau lơh broa\ tàm bòn, mùl màl neh  gơ gơs tam gơl jơnmhua ngan tu\ tam biap. Bol a` lơh ngan geh dong kờl làng bol gh tam chi tam pa mờ bơyai lơh pờ ơdu\ bơto pơlam bơta chài tam zơu, dong làng bol git bơta chài nàng tam  geh ala\ plai zơu kloh.

            Ờ mìng geh ai plai zơu tac tàm drà ka\ bro, tu\ do ala\ sươn zơu bơh làng bol kòn cau he dê tềng jơng bơnơm Lang Biang gam lơh li la tai tus broa\ lơh nhơl chờ bơh kơnhoàl dê. Mờ bơta niam la rềp mờ tiah nhơl chờ bơnơm Lang Biang, ala\ sươn zơu tây drờm geh pờ mpồng ờ roh ria\ nàng ai cau nac in tus sền, jòi git wa\ rài kis bơh tờm zơu, pic plai mờ blơi plai. Do la broa\ lơh geh tai pria\ jền tus mờ cau lơh sa, mờ drơng nhơl chờ tus mờ  đah nhơl chờ sươn, gơ hòi gal ngan cau nac. Cau nac tus guh bơnơm Lang Biang kung đơs niam broa\ tus sền sươn tam zơu mờ do rhời gơs broa\ lơh mờng ngan tu\ cau nac tus mờ Lạc Dương.

            Tờm zơu tây la plai sa bơkah krơi is cèng geh hờm ram tus làng bol kòn cau he tềng jơng bơnơm Lang Biang.

                                                                                                      Cau mblàng K’ Brọp