Ồng Phan Thế Dĩnh ơm tàm xã Ea Tóh, kơnhoàl Krông Năng nam do neh 102 sơnam mờ mŭt Đảng neh 79 nam do, là đảng viên geh sơnam Đảng uă ngan rlau jơh bơh Đảng ƀộ càr Dăk Lăk dê. Tàm sùm ală tŭ tus bal lơh broă kăc màng, bulah ơm tàm tiah lơi, dờp lơh broă lơi, gơnoar broă lơi, ồng kung sùm gàr nùs nhơm bồ tơngoh kăc màng dê, yờ tơnguh uă nùs nhơm tam klăc tàm mpồl Đảng kung bè tàm ală bơta gĭt gơ̆p mpồl bơtiàn. Ồng gam là krơh àng bè nùs nhơm dòn song kơ̆ dơn, rài kis pơndềt să, bềng nùs nhơm kờñ gơboh kòn bơnus, geh làng bol ki ngàm kờñ gơboh ngan. Tus tŭ do, bulah sơnam neh dờng mơya ồng Phan Thế Dĩnh kung gam ngac ngar ngan, sùm iăt rơdio nàng iăt kơno yal tơngĭt jơnau gơlik geh pah ngai. Ồng pơñiờ să bè bơta bơtàu tơnguh bơh dà lơgar dê ngai do. Pơñiờ să bè ală cau kộng sản dòn song kơ̆ dơn bè ồng sùm prăp gàr bơta pin dờn mờ Đảng Kộng sản Việt Nam, ồng Phan Thế Dĩnh, đơs: Dờng màng ngan rlau jơh bơh mpồl đảng dê là sùm prăp gàr nàng kòn bơnus hơ̆ gơ gơs là krơh àng ai làng bol in, ai jơh tơl nă cau in đòm jăt. Dilah krơh hơ̆ mờ ờ sơrdah den ngan ngồn gơtìp gơrềng tus Đảng. Den tàng bè hơ̆ mờ cau đảng viên sùm sùm bơsram tàp nàng gơ gơs là đảng viên lơh krơh ngan ngồn, den tàng đảng sền gròi ngan broă do.

Mờ bơta mờng chài tàm rài kis rlau dùl rhiang nam mờ bềng broă lơh kăc màng, ồng Phan Thế Dĩnh ngan ngồn là krơh àng ai ală đảng viên pa mŭt đảng in tàm tiah do, là bơta gơn kơnờm nàng oh kòn, kòn sau mờ ală rơnàng cau kơnòm să ai jơh pràn bơsram sră, pơn jăt tai tă pơgồp dà kơlhề ai ƀòn lơgar, dà lơgar in. Ồng Hồ Văn Thái, Ƀí thư Đảng ủy xã Ea Tóh, kơnhoàl Krông Năng, càr Dăk Lăk pà gĭt: Ồng Phan Thế Dĩnh là đảng viên geh mat tàm tiah do bơh ală ngai pa crơng gơs xã tơn. Mờ krơh àng bơh ồng dê tàm ală broă lơh là jơh nùs jơh tồr ngan, mờ jơnau niam bơnĕ Kộng sản bơh ồng dê là niam ngan. Do là bơta pơñiờ să bơh ƀòn lơgar dê, ƀòn lơgar sền do là krơh àng nàng bơto bơtê rơnàng kơnòm să bè bơta niam bơnĕ kăc màng dê mờ nùs nhơm kơnòl broă bơh đảng viên dê gơwèt mờ làng bol.

“Dùl nùs lòt jăt Đảng, jăt Wa Hồ” là bơta niam bơnĕ sùm geh ồng Y Thương K’Măn tàm xã Bông Krang, kơnhoàl Lăk kah prăp sùm tàm bồ tơngoh. 54 sơnam tàm mpồl bơh Đảng dê mờ tŭ do neh dờng sơnam mơya ồng kung gam sùm tus bal ală dơ̆ pơrjum mpồl bơtiàn tàm ƀòn lơgar, hòi jà làng bol ală jơi bơtiàn lơh jăt niam gùng dà broă lơh, adat boh lam bơh Dà lơgar dê, jơh nùs bơ̆t bơtàu mpồl tam klăc dờng jơh gùt jơi bơtiàn. Ồng Y Thương K’Măn pà gĭt, bulah kis tàm rài ring lơngai, dà lơgar ngai sơlơ bơtàu tơnguh mơya rài kis bơh làng bol ală jơi bơtiàn dùl êt nă cau dê kung gam uă kal ke sơl, ală mpồl cau gơjrañ kwềng mờ dà lơgar kung gam sơmờm sơl tàm bơta do nàng pơn jồ làng bol tam dră wơl mờ cồng nha lơh geh bơh kăc màng dê. Den tàng bè hơ̆, ală đảng viên bè ồng pal là cau tờm, là anih kơldìng kwơmàng nàng làng bol he in pin dờn đòm jăt. Ồng Y Thương K’Măn, đơs: Tơngai do, Đảng mờ Dà lơgar sền gròi ngan tus rài kis làng bol jơi bơtiàn dùl êt nă cau dê uă ngan bơta, lài ngan là đèng hìu lơi kung neh geh lơm, dơ̆ bàr là lòt kham kòp là ờ roh priă roh jền. Ală bơta hơ̆ là bơta sền gròi bơh Đảng dê, bơta dong kờl bơh Dà lơgar dê neh sền gròi tus làng bol jơi bơtiàn dùl êt nă cau he in.  

Sền swì bè gơnoar broă bơh ală đảng viên bè ồng Y Thương K’Măn dê, ồng Võ Ngọc Tuyên, Ƀí thư Huyện ủy Lắk, đơs là: Do là mpồl cau dờng màng ngan, là anih kơldìng bơh làng bol jơi bơtiàn dùl êt nă cau dê. Ală đảng viên jŏ sơnam neh tơngŏ loh nùs nhơm cíñ trị, là cau pơnrơ tàm broă lơh mblàng yal, hòi jà làng bol lơh jăt niam gùng dà broă lơh bơh Đảng dê, adat boh lam bơh Dà lơgar dê. Ồng Võ Ngọc Tuyên, Ƀí thư Huyện ủy Lắk pà gĭt: Bol añ sùm gĭt nền tơl nă đảng viên là dùl nơm bơkàu tàm sươn bơkàu, kwơmàng là ală đảng viên geh sơnam đảng jơnhoa, khi là ală cau lơh krơh, pơnrơ, là krơh àng ai làng bol in đòm jăt. Den tàng bè hơ̆, bol añ sền gròi ngan tus broă lòt còp, pơndờm pơnđiang, tìp măt tơm bơh bơr nàng ală đảng viên geh ală bơta  ngui niam ală mờng chài bơceh lơh tă pơgồp ai ƀòn lơgar in. Dipal là ală krơh àng pơnrơ là ală gar đèk àng tàm kâp ủy ci ƀộ mờ mpồl đảng tàm ƀòn lơgar.

Đảng ƀộ càr Dăk Lăk tŭ do geh rlau 85 rbô nă đảng viên, tàm hơ̆ geh rlau 5 rbô nă đảng viên geh sơnam đảng bơh 50 sơnam rlau hơđang. Ală đảng viên jŏ sơnam Đảng kung gam pơn jăt tai tă pơgồp dà kơlhề ai broă lơh kăc màng in. Khi là krơh àng ai rơnàng đảng viên kơnòm să pa mŭt đảng in đòm jăt, là gar đèk àng geh tiar tồl bơh tŭ tơngai jăt di nùs nhơm Củ tịc Hồ Chí Minh neh geh tŭ cih pang sră “Nùs nhơm kăc màng” bơh he dê  “Gar đèk sơlơ tồl sơlơ àng, Biàng sơlơ buh sơlơ gơklŏ”.