Tàm ală tiah tus còp, ồng Hầu A Lềnh pà gĭt, Đảng, Dà lơgar mờ Cíñ phủ neh hời rơ hời bơsong ală jơnau gơ lời wơl bơh kòp dờng Kovid-19 dê. Tàm hơ̆ geh bơta tă pơgồp uă ngan bơh làng bol ală jơi bơtiàn kòn cau dùl ết nă cau, tàm hơ̆ geh làng bol kòn cau Khmer tàm ƀòn dờng Hồ Chí Minh.

Bulah bơta lơh sa gam uă kal ke, mơya Ƀộ trưởng, Củ ñiệm Ủy ƀan Jơi bơtiàn kòn cau pin dờn mờ bơta pơnđơl pràn lơh ngan, bal mờ gơ̆p tam klăc bal gùt mpồl bơtiàn, làng bol kòn cau rơ̆p gờñ bơsong ală bơta kal ke nàng geh rài kis hờm ram rlau tai, chờ hờp rlau tai tàm tơngai tus. Ƀộ trưởng, Củ ñiệm Ủy ƀan Jơi bơtiàn kòn cau sồr hìu Yàng Phờk bal mờ gơnoar atbồ ală tiah mờ ƀòn dờng Hồ Chí Minh ngui niam mpồl tam klăc dờng jơh gùt mpồl bơtiàn, pơn jat tai ală broă lơh sền gròi, dong kờl làng bol kòn cau, cau jat Yàng Phờk, gàr niam rài kis mpồl bơtiàn. Di dơ̆ do, Ủy ƀan Jơi bơtiàn kòn cau mờ Ủy ƀan Ñân zân ƀòn dờng Hồ Chí Minh neh jàu phan gờm chờ nam pa tàm ală hìu Yàng Phờk mờ 37 nă cau geh bơngă pin dờn tàm mpồl bơtiàn kòn cau Khmer dê.