Wèt tus jơnau kờñ do, ală kấp ủy bơh ƀòn dờng tus sơnah ƀòn mờ ci ƀộ ƀòn Ốp neh geh broă đơng lam, lam sồr gơnoar atbồ bal mờ làng bol lơh jăt ală broă lơh mùl màl.

Ơ ồng Rơ Châm Thót, Ƀí thư Ci ƀộ ƀòn Ốp, sơnah ƀòn Hoa Lư, ƀòn dờng Pleiku, tŭ do, ƀòn Ốp geh ală bơta ƀuơn bè lơi nàng bơ̆t bơtàu ƀòn lơgar pa mờ tơnguh bơtàu lòt nhơl mpồl bơtiàn geh uă bơta niam chài kòn cau Jarai dê?

Ƀí thư Ci ƀộ Rơ Châm Thót: “Tŭ do ƀòn Ốp geh uă bơta ƀuơn mờ tơnguh bơtàu. Sơnrờp ngan, ƀòn geh 2 nơm hìu rông, bơta lơh sa tơnguh bơtàu lơh sa geh uă bơta ƀuơn, tàm hơ̆ tai là rềp mờ tiah tờm ƀòn dờng dê, den tàng rềp mờ hìu sơnơm, hìu bơsram, gùng lòt geh tơl ồs đèng den tàng rài kis geh ƀuơn rơlao. Ƀòn Ốp tŭ do geh rơlao 125 hìu mờ rơlao 600 nă làng bol, tàm hơ̆ kòn cau Jarai là rơlao 80 hìu mờ kòn cau Bahnar 20 hìu, gam tai là làng bol cau Yoan. Kơnờm mờ broă tam klăc bal bơh jơh ală cau, rài kis ngai sơlơ tơnguh bơtàu mờ lơh gơs jăt jơnau gờñ bơ̆t bơtàu ƀòn lơgar pa. Bol añ sùm bơyai lơh pơrjum yal mblàng nàng làng bol in git, tam klăc bal, tus bal lơh gơs ală jơnau kờñ bơ̆t bơtàu ƀòn lơgar pa, bŭ lah gam ờ tơl bè priă jền nàng lơh ơnàng gùng lòt nàng ƀuơn tàm broă lòt rê”.

Mờ broă đơng lam bơh Ci ƀộ đảng, gơnoar atbồ, tơngai do ƀòn Ốp neh lơh geh ală cồng nha lơi ơ ồng?

Ƀí thư Ci ƀộ Rơ Châm Thót: “Tŭ do ƀòn Ốp neh tam gơl pa uă ngan. Bơh nam 2017 tus 2020, lơh sa sơn đờm tơnguh bơtàu, geh uă hìu lơh dờng niam, dơ̆ bàr tai là blơi rơndeh lơ-òr nàng pơn diang phan geh lơh bơh broă lơh sa bal mờ măi mŏk drơng tàm broă lơh sa, dơ̆ pe tai là 100% hìu nhă geh ngui ồs đèng mờ 80% gùng geh dă mờ cài, mờ bê tông, bal mờ bòr cing, mồng kung gam geh làng bol prăp gàr niam tàm ală hìu rông. Dơ̆ poan, tàm ƀòn geh hìu rông dờng nàng làng bol bơyai lơh pơrjum ƀòn, dơ̆ pram kung gam dà mbòr nàng làng bol lòt bơ̆ cèng rê ngui sa pah ngai mờ gàr sùm dà sàng kloh. Ƀòn Ốp tŭ do geh ai jơnau kờñ nàng geh uă oh kòn lòt bơsram tus đại họk, tŭ do gam 1, 2 hìu rơƀah, làng bol di lah gơtìp kòp tê jê să, kờñ lòt kham den neh geh hìu sơnơm rềp tơn, ƀảo hiểm y tế làng bol gơtùi blơi ha là dà lơgar pà, geh uă jơnau kờñ tŭ do ƀòn Ốp neh lơh geh 100%”.

Nàng ƀòn Ốp tơnguh bơtàu gơs ƀòn niam chài lòt nhơl mpồl bơtiàn geh pơnrơ ngan ƀòn dờng Pleiku dê, den kấp ủy neh lơh bè lơi nàng dong kờl làng bol in git tàm broă prăp gàr bơta niam chài niam bơnĕ ngan bơh kòn cau Jarai dê, pal geh lơh ndrờm bal mờ broă rơhời sơbì jơh ală bơhiàn ờ niam, sền gàr tiah kis?

Ƀí thư Ci ƀộ Rơ Châm Thót: “Ci ƀộ, kwang atbồ ƀòn, kra ƀòn hòi jà làng bol lam sồr oh kòn tơriang lòt bơsram. Pah nhai bol añ kung bơyai lơh pơrjum nàng đơng lam ală đảng viên dong kờl làng bol crăp ƀong đèng tàm bàr đah gùng, dơ̆ bàr tai là pơs wàs kloh niam gùng lòt, dơ̆ pe là lam sồr ală oh kòn lòt bơsram. Bol añ kung ai geh kơrnoăt hơ pơrgon tàm ƀòn, nàng làng bol lơh gơs rài kis kloh niam, wă cau năc bơh ngài di lah geh dơ̆ sĕ còp ƀòn niam chài do. Gam broă chơ̆t jê tàm ƀòn kung gam bơyai lơh uă ir hoàc huơr, bŭ lah hìu nhă kung gam kal ke, mơya kung gam lơh jăt bơhiàn ờ niam lài do. Den tàng kwang atbồ ƀòn, Ƀí thư, Mặt trận ală mpồl lơh broă neh pơrjum nàng làng bol in wă mờ sơbì ală bơta ờ niam, geh kơrnoăt hơ pơrgon bal nàng làng bol lơh jăt 2, 3 jơnau kờñ, rơlao mờ hơ̆ tai, ală oh kòn, kơnòm dềt lòt bơsram gam ờ uă, ờ hoan geh cau lòt bơsram đại họk, kung yal mblàng lơh bè lơi nàng jơh ală cau ndrờm git sră mờ iăt dờn jơnau đơng lam bơh kwang bàng ƀòn”.

Tàm tơngai tus, pơn jăt tai lơh ngan bơ̆t bơtàu ƀòn gơs anih gơhòi gơjà cau năc nhơl chờ tus, geh uă bơta niam chài kòn cau Jarai dê, kấp ủy, gơnoar atbồ bal mờ làng bol kis tàm ƀòn Ốp neh geh broă rơndăp lơh bè lơi ơ ồng?

Ƀí thư Ci ƀộ Rơ Châm Thót: “Broă tềng đăp măt là prăp gàr bơta niam chài, bơto ơruh pơnu, kơnòm pa tào, kơnòm dềt in git dròng cing mồng mờ lơh gơs ală mpồl dròng cing mồng, mpồl tamya tàm ƀòn, pơn jăt tai là prăp gàr broă trah rùp mờ dơm chi, broă tàñ ồi yau nàng di pal mờ măt sơnđan ƀòn niam chài. Pơn jăt tai là, yal mblàng làng bol in git mờ lơh jăt ală nghị quyết bơh thàñ ủy, đảng ủy, kung bè ci ƀộ, tŭ do Đảng, Dà lơgar kờñ ngan làng bol lơh broă nhơl chờ, broă lơh drơng ala, ci ƀộ bol añ den kis rềp mờ làng bol ngan kung yal mblàng nàng làng bol in git, gŏ ală bơta ƀuơn cèng wơl geh bơh broă lơh nhơl chờ, bŭ lah gam uă kal ke, mơya tus do bol añ kung lơh ngan jòi geh gùng dà nàng tơmù bơta kal ke.

Pa do ngan, ƀòn Ốp dờp geh priă bơcri bơh gơnoar atbồ nàng lơh hìu rông mờ bê tông, mơya kung gam tìm mờ ja, tŭ cau năc tus nhơl sền den kờñ gơboh ngan mờ broă sền kòn cau Jarai dròng cing, tamya, tàm ƀòn tŭ do geh uă bơta krơ is pơn drờm mờ ƀòn ndai, den tàng bol añ pal git prăp gàr, bè tàm hìu rông den pal geh cing, mồng, sơngơr, geh sơ̆, geh bơnhă ồs, tàm ală ngai bơyai lơh chờ bol añ kung geh dròng cing nàng cau năc nhơl chờ in sền mờ nhơl chờ, tàm ƀòn Ốp tŭ do geh 2 mpồl dròng cing mồng, mpồl dròng cing cau kra, mpồl dròng cing cau ùr, geh mpồl tamya tai, ală mpồl đơs crih tamya do sùm geh lòt lơh nàng cau năc nhơl chờ in sền, añ kơ̆p kờñ geh lơh sùm”.

Ơi, dan ưn ngài ồng Rơ Châm Thót uă ngan!