Tàm jơnau yal bồ nam 2022, Củ tịc Quốk hội ồng Vương Đình Huệ đơs: Quốk hội, Ủy ƀan Thường vụ Quốk hội geh rơcang rơlao tai, lòt bal nền nòn rơlao tai mờ Cíñ phủ, ală anih lơh broă dà lơgar nàng di tŭ sền wơl, ai tơlik kơrnoăt ală bơta gơwèt mờ gơnoar. Đơs lòt bal mờ lơh broă, tơnơ̆ 1 nam lơh jăt Broă bơ̆t bơtàu adăt boh lam tơngai Quốk hội Khoă 15, ală anih lơh broă Quốk hội, Cíñ phủ mờ ală anih lơh broă gơrềng bal neh lơh gơs 81 tàm 137 kơnòl lơh adăt boh lam, lơh gơs broă kơlôi sơnơng, sền wơl ha là kơlôi sơnơng, bơ̆t bơtàu pa (geh rơlao 59% kơnòl bơh jơh gùt tơngai lơh broă), ai geh tơngu me adăt boh lam nàng Cíñ phủ, gơnoar atbồ càr, ƀòn dờng ngui ală broă lơh ndrờm bal, pràn, geh cồng nha tàm broă rơcang sơndră mờ kòp gơtờp, sền gàr màng kis, bơta pràn kơl dang să jan bơh làng bol, dong kờl mpồl lơh sa kă bro, cau lơh broă sơrlèt mờ kal ke mờ gàr niam rài kis broă lơh sa mpồl bơtiàn; lơh pràn broă brồ guh wơl mờ tơnguh bơtàu lơh sa mpồl bơtiàn kơl jăp tơnơ̆ mờ kòp Kovid-19.

Kwơ màng, bal mờ bàr dơ̆ pơrjum bè ờs, bơh bồ nam, Quốk hội neh bơyai lơh Pơrjum ni sơna dơ̆ sơnrờp nàng sền wơl, ai tơlik kơrnoăt uă tơngu me dờng, jal mhar, gơrềng tơn tus mờ broă brồ guh wơl, tơnguh bơtàu dà lơgar tàm bơta “bè ờs pa”. Broă tơrgùm pơrjum ni sơna dơ̆ sơnrờp geh sền là ai tơlik kơrnoăt di pal bơh lài tus tŭ do bơh Quốk hội lơgar Việt Nam dê tàm 76 nam do, ai tơngŏ nùs nhơm kơ̆ dơn, lơh ngan cíñ trị bơh anih lơh broă geh gơnoar dờng ngan Dà lơgar dê kung bè broă lơh ngan tam gơl pa, lơh broă tài bơta kwơ bơh làng bol.

Pơrjum “Ni sơna” nàng bơsong broă jal mhar. Mùl màl ai tơngŏ di lah Quốk hội ờ bal mờ Cíñ phủ geh ală kơrnoăt hơ mblàng mhar geh lơh gơlời gời tŭ niam dà lơgar dê. Ală tơngu me cri bơyai tàm Pơrjum ni sơna ờ mìng di pal mờ bơta gờñ tềng đăp măt ai nam 2022, nam 2023, mờ gam geh bơta kwơ màng ai jơh tơngai lơh broă bal mờ ală nam pơn jăt tai. Jơh ală broă rơcang lài mờ bơyai lơh pơrjum ndrờm ai tơngŏ loh làng nùs nhơm kơlôi sơnơng jrô ơnàng mờ broă tus bal rơcang bơh gờñ, bơh ngài.

Bơta tơngŏ loh làng ngan là broă Quốk hội ring bal Nghị quyết sồ 43 nam 2022 ngai 11/01/2022 bè broă nam priă jền, priă mờ broă lơh di pơgăp 350 rơbô tơmàn đong, ndrờm mờ rơlao 8% GDP nàng dong kờl lơh jăt broă brồ guh wơl mờ tơnguh bơtàu lơh sa mpồl bơtiàn, pơgồp bal tàm broă ai gơguh GDP nam 2022 gơguh 8,02%, do là khà gơguh uă ngan tàm rơlao 10 nam do, gơwèt mpồl ală lơgar geh khà gơguh lơh sa pràn ngan tàm dunia dê.

Bè jơnau Tổng Thư ký, Củ ñiệm Cơl dŭ lơh broă Quốk hội ồng Bùi Văn Cường yal: Nghị quyết geh tơlik tàm dùl dơ̆ pơrjum kwơ màng ngan, ờ hềt geh bơh lài mờ uă nùs nhơm niam, bơta pràn đơng lam bơh Đảng, Quốk hội, Cíñ phủ, ală Ƀộ, gah lơh broă dà lơgar, ală càr, ƀòn dờng bal mờ kwang bàng Quốk hội. Kơrnoăt ai tơlik do pờ geh kơ cế kwơ màng, tàm hơ̆ ală broă lơh, sră nggal geh lơh ƀuơn jơh uă ngan, tam pà kâp pràn kơl dang tus tơl ƀộ, gah lơh broă dà lơgar, ală càr, ƀòn dờng mờ lài do ờ hềt geh ngui. Quốk hội gam jào Ủy ƀan Thường vụ Quốk hội tơlik kơrnoăt ală broă ai lài, krơi is, kwơ màng ndai mờ adăt tàm tơngai Quốk hội ờ pơrjum nàng di tŭ lòt bal mờ Cíñ phủ. Nùs nhơm mờ cồng nha bơh pơrjum ni sơna dơ̆ sơnrờp dê, Quốk hội khoă 15 neh ai geh nùs nhơm pràn pa, tŭ niam pa.

Tă tàm kes priă geh uă ngan bơh lài tus tŭ do, sơrlèt uă ngan pơn drờm mờ kờp dŭ lài; tă uă, dồs dà lơgar geh tàm bơta sền gròi; GDP nam 2022 bơh gùt nam gơguh 8,02%, uă ngan tàm tơngai bơh nam 2011 tus 2022; ală bơta lơh ring bal dờng geh gàr niam... Ală jơnau yal kwơ màng geh yal tàm lồi nam cèng geh bal uă bơta tơngŏ niam, là bơta pràn kwơ màng ai jơnau kờñ tàm broă rơndăp lơh 5 nam, sơlơ kwơ màng rơlao tŭ dà lơgar mŭt tàm nam sơn đờm lài bơh tơngai lơh broă tàm broă lơh jăt nghị quyết Pơrjum dờng dơ̆ 13 Đảng dê.

Kwơ màng rơlao tŭ bơta pràn geh jơh tàm ală gah broă mờ uă bơta niam hơ̆ tŭ he sền wơl bơta tàm nam 2022 bơta tàm dunia tơlik geh kal ke, ờ hềt tŭ lơi geh, kal ke rơlao mờ tŭ bơ̆t bơtàu broă rơndăp lơh tơnguh bơtàu lơh sa mpồl bơtiàn nam 2022. Mờ bơta tam gơl tàm dunia, bơta kal ke bơh khà priă phan kă bro gơguh kas; khà priă xăng jờu, phan lơh broă tam gơl pràn, lơh gơrềng uă ngan tus mờ uă gah, gah lơh broă; uă broă gam gơlời jŏ jòng pal geh bơsong; tàm tŭ hơ̆, kòp gơtờp, rềs àr bơh trồ tiah, mìu càl dờng gơtìp kal ke, lơh gơtìp uă rềs àr tus mờ broă lơh sa kă bro mờ rài kis làng bol.

Yal ală bơta gơrềng ờ niam do nàng gŏ là ală cồng nha bơh he neh lơh geh là kwơ màng ngan. Broă brồ guh wơl pràn kơl dang bơh gah lơh sa tơlik gŏ cồng nha đơng lam bơh Cíñ phủ kung bè ală ƀộ; gah lơh broă dà lơgar; broă lơh ngan, jơh nùs ring bal bơh ală mpồl lơh broă cíñ trị, bơh làng bol mờ mpồl lơh sa kă bro dê. Mờ kwơ màng là broă lòt bal, dong kờl bal di tŭ, geh cồng nha bơh Quốk hội bơh kơrnoăt geh ai “kwơ màng, ai lơh lài, krơi is”.

Bơta lòng, kal ke gam uă, mơya nùs nhơm pin dờn tàm pơrjum gŏ loh làng, tŭ geh kwang bàng Quốk hội tơlik jơnau: Dunia gam đơs lơgar Việt Nam bè dùl rùp rài gơguh bơh tơngai tơnơ̆ kòp Kovid-19 mờ di gơlan geh pràn rơlao tơnơ̆ mờ kòp gơtờp. Pin dờn là, mờ nùs nhơm tam klăc bal, ring bal uă bơh mpồl lơh broă cíñ trị, broă kờñ bal, dờp bal bơh gùt làng bol bal mờ ală mpồl lơh sa kă bro, mờ broă đơng lam jăk chài, nền nòn bơh Đảng, broă rơcang lài, lòt bal bơh Quốk hội bal mờ broă đơng lam pràn kơl dang, ai jơh bơta pràn să jan bơh Cíñ phủ dê, ngan là he geh mùl màl lơh geh cồng nha ală jơnau kờñ ờ jŏ tơngai tàm nam 2023, kung bè jơnau kờñ jŏ tơngai tàm tơnơ̆ do.