Tàm hơ̆, Broă lơh “Nhai pe tiah nhàr dà lơgar” kấp Dà lơgar tàm 03 càr Lạng Sơn, Quảng Trị mờ Kiên Giang. Uă bơnah phan geh kwơ geh Mpồl bơyai lơh jào pà ai mpồl ling sền gàr tiah nhàr dà lơgar, làng bol bal mờ ơruh pơnu, kơnòm pa tào mờ kơnòm dềt kis tàm ală ƀòn tiah nhàr dà lơgar 3 càr Lạng Sơn, Kiên Giang, Quảng Trị bè: pà phan ai hìu nhă geh sră dong kờl bơh dà lơgar mờ kơnòm bơsram geh rài kis gơtìp kal ke, dong kờl tờm gle ai broă lơh “mpung gle tiah nhàr dà lơgar Việt Nam”.

Tàm hơ̆ kwơ màng ngan, lơh ală broă lơh geh khà priă rơlao 7 tơmàn 200 tơlăk đong. Mìng is tàm càr Lạng Sơn, ală broă lơh ưn ngài cau geh màng mờ dà lơgar, lơh uă broă lơh, bơnah broă bơh ơruh pơnu dê mờ khà 4 tơmàn 700 tơlăk đong. Dùl tàm ală broă lơh geh làng bol chờ hờp tus bal là broă kham kòp, pơlam, pà sơnơm ờ sa priă ai 500 nă làng bol mờ ơruh pơnu, kơnòm pa tào mờ kơnòm dềt geh rài kis gơtìp kal ke tềng mpồng nhàr dà lơgar Chi Ma, càr Lạng Sơn.