Geh uă jơnau đơs pơgồp bal gơrềng tus mờ ală tơngu me bè broă rơndăp ù tiah, broă ngui ù, broă tơm bơtơl dong kờl lơh ƀòn ơm kis pa, broă bơsong ù geh bơh broă lơh sa suơn sre, brê bơnơm neh geh đơs.

Ồng Võ Tấn Tài, lơh broă tàm Mpồl ală mpồl git gơ̆p lơh bơyô bal càr Dăk Lăk đơs là, ală jơnau cih tam gơl pa tàm rơndăp broă Adăt ù tiah (tam gơl) ai geh nùs nhơm ring bal, ndrờm bal, gàr geh cồng nha tàm broă rơndăp ù tiah, broă ngui ù. Mìng is gơwèt mờ tiah Tây Nguyên, tiah geh gal làng bol kòn cau ơm kis, broă rơndăp ù tiah pal geh di pal mờ bơta kis gơs bơh làng bol dê tàm bơta lơh sa drà kă bro. Pơgồp bal jơnau đơs bè broă tơm bơtơl, dong kờl, lơh ƀòn ơm kis pa, ală kwang bàng đơs là, broă rơndăp cih pal loh làng rơlao ală jơnau kờñ tàm broă tơm bơtơl, dong kờl, lơh ƀòn ơm kis pa tơnơ̆ mờ tŭ dà lơgar toh ù “gàr tơl bơta niam rài kis ndrờm ha là niam rơlao mờ tiah ơm kis lài do”.