Rơlao 3 nhai do, tàm tŭ 6 jơ mang bơh ngai dơ̆ 2 tus ngai dơ̆ 6 pah poh, Ơdŭ bơto sền sră-cih sră tàm Hìu bơsram Kấp 1 Ngô Quyền (sơnah ƀòn Chi Lăng, ƀòn dờng Pleiku) geh àng ồs đèng mờ mpong săp đơs bơh ală cau tus bơsram sră. Ơdŭ bơsram geh 30 nă tàm ƀòn Ia Lang, sơnah ƀòn Chi Lăng, ƀòn dờng Pleiku. Tơnơ̆ mờ tŭ neh git cih, ală akhar mờ cau pơnru cih tềng mpàn jù, Lŏ H’ Thiếu, dùl nă cau mè neh 3 nă kòn tus bal bơsram ơdŭ bơsram do đơs: “Lài do, hìu nhă añ rơƀah, kal ke, bèp chơ̆t gờñ, rài kis hìu nhă ờ tơl den tàng añ ờ gơtùi lòt bơsram, den tàng ờ git sră. Pa do, geh kwang atbồ ƀòn, sơnah ƀòn mờ đah hìu bơsram tus lam sồr, añ lơh ngan lòt bơsram nàng git sră. Ală ngai sơnrờp tus bal ơdŭ bơsram cih sră den gơtìp kal ke ngan, mơya añ kờñ git sền, git cih, den tàng lơh ngan bơsram”.

Tàm ơdŭ bơsram, mò H’ Lung (57 sơnam, kis tàm ƀòn Ia Lang, sơnah ƀòn Chi Lăng) kung gam lơh ngan bơsram cih ală sồ, ală akhar. Mò H’ Lung đơs, tài sơnam neh dờng, den tàng broă kờñ wă neh ờ di bè ală cau gam kơnòm tàm ơdŭ bơsram tai, mơya mờ nùs nhơm lơh ngan kờñ să tờm bañ gơtìp pơn jăt tai ờ git sră, mò neh lơh ngan tus bơsram. Tŭ do mò neh git sền, git cih is să tờm. “Añ ờ git sră, ờ git kờp, geh lòt bơsram git sră, cih is măt sơnđan să tờm añ chờ hờp ngan, ưn ngài pơgru neh bơto añ mờ ală cau in”.

Jăt pơgru Dương Thị Kiếu, bơto tàm hìu bơsram kấp 1 Ngô Quyền, sơnah ƀòn Chi Lăng, ƀòn dờng Pleiku yal, cồng nha lùp sền ing bơh hìu bơsram dê pà gŏ, Ƀòn Ia Lang geh di pơgăp 100 nă cau ờ git sră. Tŭ geh lam sồr lòt bơsram, geh uă cau ờ bài, ƀàs sìl tài neh dờng sơnam, geh ờ uă cau ndai den ờ khin tài ngòt ờ wă tàm broă bơsram sră. Mơya, tơnơ̆ mờ tŭ neh lòt bơsram dùl tŭ, ală cau neh gơboh, rơhời geh tam jà bal tus lòt bơsram gal rơlao. “Ơdŭ bơsram mìng là cau dờng sơnam, ờ tơl bơta niam nàng lòt bơsram, tŭ tus tàm do, akhar gơwèt mờ ală cau do kal ke ngan, mơya ală cau do gơboh ngan mờ broă bơsram sră, bŭ lah trồ mrềt, ha là trồ mìu den kung gam lòt bơsram tơl. Tŭ cih sră, ală cau kung neh git cih 100%, bè broă sền sră den di lah sền jăk tàm ơdŭ geh rơlao 50%”.

Kung ndrờm bal sơl, Hìu bơsram kấp 1 Lê Lai (xã Chư Á, ƀòn dờng Pleiku) là 1 tàm 7 hìu bơsram tàm ƀòn dờng Pleiku geh rơwah lơh jăt kơnòl bơto sền mờ cih sră ai làng bol tàm tiah kòn cau jăt Broă lơh jăt jơnau kờñ dà lơgar dê tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030.

Pơgru Lê Minh Tùng, Kwang atbồ Hìu bơsram kấp 1 Lê Lai pà git, hìu bơsram neh pơgồp bal mờ UɃÑZ xã Chư Á mờ ală ƀòn sền wơl cau kòn cau ờ hềt git sră tàm sơnam bơh 15 tus 60, nàng lam sồr làng bol tus bal bơsram. “Hìu bơsram kung neh crơng gơs mpồl lam sồr cau bơsram bơh 15 tus 60 sơnam tus lòt bơsram, mờ tus tŭ do là geh 23 nă cau neh lòt bơsram nàng git sră. Broă lơh bơto sră geh tam pà gơs 2 tơngai, tơngai sơnrờp geh 3 dơ̆, ndrờm bal mờ 42 poh, ndrờm mờ tơl dơ̆ là 315 tiết bơto, tơngai dơ̆ 2 geh tam pà 2 dơ̆, ndrờm mờ mpồl ơdŭ 4 mờ ơdŭ 5 den lơh gơs broă bơto sră”.

Mìng is tàm nam do, Sở Giáo dụk mờ Đào tạo càr Gia Lai geh pơgồp bal mờ Ƀan Zân tộk bal mờ ală mpồl lơh broă gơrềng bal pơlam UɃÑZ càr tam pà priă tus ală tiah nàng pờ geh 217 ơdŭ ai rơlao 6 rơbô 500 nă cau in tus bơsram. Ồng Nguyễn Văn Đông-Kwang atbồ cơl dŭ bơto Kấp 1, Mầm non, gơwèt Sở Giáo dụk mờ Đào tạo càr Gia Lai pà git: “Do là broă lơh cèng wơl bơta niam tàm rài kis ai làng bol kòn cau in đơs bal mờ càr Gia Lai đơs is geh tơnguh uă bơta ngăc ngar tàm làng bol, nàng bơh tŭ hơ̆ geh klàs mờ rơƀah, tơnguh uă bơta niam tàm rài kis să tờm in. Tŭ do, broă lơh do neh geh tam pà ai ală kơnhoàl, thị xã, ƀòn dờng, ờ uă mpồl lơh broă neh tơrgùm cau bơsram nàng cau bơsram geh tus bơsram. Tàm tơngai tus, broă lơh do geh lơh uă mờ bơto jơh tàm ală tiah”.

Jăt rơndăp broă geh ai lơh jăt broă lơh jăt jơnau kờñ dà lơgar dê tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2025, càr Gia Lai bơyai lơh pờ geh 735 ơdŭ bơsram sền-cih sră ai mờr 23 rơbô 500 nă cau tàm 175 xã in.