Ồng A Don là đảng viên, Phó Củ tịc Hội đồng Ñân zân xã Đăk Trăm, kơnhoàl Đăk Tô, càr Kon Tum là dùl krơh bè hơ̆. Geh Đảng ủy xã jàu rê pơrjum mờ Ci ƀộ thôn Đăk Rô Gia, ồng A Don neh lơh Mpồl lơh broă bal tam tàu Y Du hơ̆ sồng să tờm tơn lòt lùp mờ kĭ hơ mờ Kông ty Kổ phần sơdàng Kon Tum lơh gơs sươn tàu dờng.

Ơ ồng A Don, kơno yal bơh bàr pe hìu làng bol bal mờ bă ù dùl êt ngan lơm bơh sơnrờp, bơh rlau 2 nam lơh, Mpồl lơh broă bal tam tàu Y Du bơh A Don lơh cau ătbồ mpồl neh gơhòi gơ jà rlau 150 hìu làng bol lơh bal mờ lơh gơs geh tiah tam tàu ơnàng rlau 35 lồ tàm xã Đăk Trăm. Mờ gơnoar broă là Phó Củ tịc Hội đồng Ñân zân xã Đăk Trăm, pơrjum tàm Ci ƀộ thôn Đăk Rô Gia, bơta lơi ồng in mblàng yal, hòi jà làng bol mŭt bal tàm Mpồl lơh broă bal nàng tam tàu taih?

Lài ngan là să tờm añ gŏ rài kis làng bol tàm xã dê kal ke ngan, uă hìu bơnhă ờ hềt gĭt broă lơh sa den tàng añ gŏ gơlơh sơnđàc mờ pal geh kơnòl dong kờl làng bol, lơh Mpồl lơh broă bal, añ lòt kĭ sră hơ mờ jơh ală kông ty, ală mpồl lơh sa kă bro nàng geh drà blơi phan làng bol in. Kơnờm bơta dong kờl bơh kông ty dê, añ mờ làng bol neh lơh nền lơh Mpồl lơh broă bal, hòi jà uă làng bol mờ cau tàm mpồl tam tàu, tài bơh pơndrờm mờ tam bùm blàng, lơh kòi den tàu geh cồng nha lơh geh uă rlau. Lơh dùl kàl tàu den digơlan geh sa bơh 3 tus 4 nam tơnơ̆, priă cồng lơh geh uă rlau mờ broă tam bùm blàng, lơh kòi. Đah kông ty kung ai tơl bơta dong kờl ai làng bol in càn sơntìl, phơng sih, tus kàl tơnhàu den làng bol hơ̆ sồng tơm dồs ai đah kông ty in.

Tơngai sơnrờp, broă hòi jà làng bol mŭt bal tàm Mpồl lơh broă bal tam tàu do den geh sơl bơta lơi kal ke ờ mờ ồng neh lơh bè lơi nàng làng bol in iăt kơno mờ lơh jăt he hah ồng?

Bơh sơnrờp añ lòt jà làng bol kung tìp sơl uă kal ke, lài ngan là bè bơta đah sră pơ àr nàng bơto pơlam làng bol in broă chài tam, làng bol gam gơlơh pa ngan ờ hềt kwèng ngan mơya tŭ “ià tê sơñio broă” den kơnờm geh kwang bàng bơto pơlam lơh broă sa sươn sre tus bơto pơlam den làng bol hơ̆ sồng gĭt wă. Añ kung lòt tus tơl hìu bơnhă, bơto pơlam làng bol bè bơta chài tam tàu, tơnơ̆ hơ̆ añ mblàng lơh loh ai làng bol in gĭt là kơnờm bơh tam tàu den tàng hìu bơnhă añ lơh geh priă jền uă, geh priă blơi rơndeh, lơh hìu. Làng bol gŏ añ tam tàu geh cồng nha bè hơ̆ den làng bol iăt kơno he đơs, hơ̆ sồng lơh jăt broă he lơh. Mpồl lơh broă bal bol añ dê geh 153 nă cau, kờp jơh bă ù tam tàu bơh jơh gùt xã dê tŭ do là 35 lồ.

Kàl tơnhàu pa do, tàu lơh geh bơh Mpồl lơh broă bal dê lơh geh cồng nha bè lơi, ơ ồng?

Kàl sơnrờp, làng bol lơh geh pơgăp bơh 60 tus 80 tấn tàm dùl lồ tàu nam sơnrờp, gơwwèt mờ tờm tàu koh nam dơ̆ 2, nam dơ̆ 3 den pơgăp bơh 80 tus 100 tấn tàm dùl lồ, lơh geh pơgăp bơh 70 tus 90 tơlak đong, kờp jơh priă tă lơh den làng bol kung gam geh cồng pơgăp bơh 50 tus 70 tơlak sơl. Añ gŏ làng bol tam tàu geh cồng uă, kông ty kĭ sră hơ blơi phan bơna bol he dê mờ geh sră hơ sền gàr rềs àr loh làng là 850 rbô đong den tàng làng bol ờ gŏ kơlôi rơcăng jơnau lơh geh uă mơya tăc ờ geh giă, halà tăc geh giă mơya lơh ờ geh uă. Mơya, làng bol pal kong bòl glar kal ke lùp bơsram, kong bòl glar kal ke lơh den hơ̆ sồng geh priă jền. Dilah lơh di bơta bơto pơlam bơh kông ty dê den rơ̆p lơh geh cồng nha uă rlau, priă lơh geh rơ̆p uă rlau, làng bol geh jơng kah priă tơm dồs.

Mùl màl, broă tam tàu pơndrờm mờ ală tờm chi tam ndai mờ lài do làng bol neh geh tŭ lơh den ồng gŏ bơta ƀươn bơh tờm tàu dê bè lơi?

Broă tam tàu dilah pơndrờm mờ ală sơntìl chi tam ndai den geh cồng uă rlau. Mùl màl tam 1 kàl tàu tàm nam den rơ̆p geh sa bơh 4 tus 5 nam tơnơ̆. Ai dilah tam bùm blàng den tam dùl kàl den mìng sa uă ngan rlau jơh là 2 kàl lơm, tơnơ̆ hơ̆, bol he pal tam pa wơl tai. Lài ngan là kông ty rơcăng priă lơ òr ù, dơ̆ bàr là kông ty rơcăng priă tam gơl chi tam, dơ̆ pe là priă pơndiang bơh sươn tàu tus kông ty, dơ̆ puan là kông ty ai làng bol in lèng càn chi sơntìl, phơng sih, tus kàl tơnhàu den làng bol tơm wơl dồs chi sơntì, dồs phơng kông ty dê.

Nàng làng bol in lùp bơsram mờ lơh jăt den ồng gŏ gơnoar broă bơh cau đảng viên bè ồng kung bè ală đảng viên ndai tàm Ci ƀộ thôn Đăk Rô Gia bè lơi, ơ ồng?

Să tờm añ là cau đảng viên, añ pal sùm lam lài lòt lài. Bơh broă lơh broă sa, tus dì rài kis tàm hìu bơnhă ndrờm pal lơh krơh. Bơh hơ̆, làng bol gùt dar sền gŏ bơta niam, bơta di bơh añ dê den làng bol rơ̆p lùp bơsram, đòm jăt. Bol he đơs bè lơi den bol he pal lơh bè hơ̆, lơh broă lơh sa pal geh cồng nha, pal lơh gơlik phan bơna loh làng den làng bol hơ̆ sồng dòn, iăt mờ lơh jăt.

Bơh cồng nha bơh broă lơh Mpồl lơh broă bal tam tàu dê bè hơ̆, ồng geh jơnau rơcăng lơh lơi tàm broă hòi jà tai ală cau tàm mpồl là ală làng bol tàm ƀòn Đăk Rô Gia kung bè ală ƀòn ndai tus bal tam tàu kung bè là rề ơnàng tai bàr pe broă lơh sa tam ală tờm chi tam ndai, hah ồng?

Să tờm añ sơnđàc ngan ală oh mi tàm mpồl, tài bơh làng bol he ờ hềt gĭt ngan ngồn broă chài lơh broă lơh sa. Añ sùm lơh ngan hòi jà ală oh mi tàm mpồl, đơs nàng ai làng bol in iăt, nàng làng bol in gĭt bè bơta kwơ bơh broă mŭt tàm Mpồl lơh broă bal dê, tơl nă cau tàm mpồl tŭ mŭt dilah geh bơta pơđơl pràn lơh ngan, ngan là lơh gơlik phan bơna den lơh geh priă jền uă mờ bol añ kung rơ̆p rề ơnàng lơh uă broă lơh do, rơ̆p tam pơgăp bơh 30 tus 50 lồ tàu, gơn kơnờm ală cau tàm mpồl rơ̆p lơh geh tai priă jền sùm.

Dan ưn ngài uă ngan ồng A Don bè dơ̆ tơm bơh bơr do!