Tàm ƀòn Mlăng, xã Ea Tar, kơnhoàl Cư Mgar, càr Dăk Lăk cau lơi kung git tus ồng Y Huăt Niê (mat mờng hòi là ồng Trân dê), tài ồng là cau geh bơngă pin dờn tàm tiah jơi bơtiàn kòn cau dùl êt nă cau. Lam lơh Broă lơh bơt bơtàu ƀòn lơgar pa, ồng neh tus tơl hìu bơnhă hòi jà làng bol sang tĕ mờng kwèng ting lềng phan 4 jơng, iar ơda, ntrờn wàng ròng phan lik bơh rồm hìu rơnt, nàng gàr sàng goh ai hìu bơnhă mờ ƀòn lơgar in. Jơnau đơs ồng dê geh làng bol iat, pin dờn mờ lơh jat: “Là dùl nă cau geh bơngă pin dờn tàm ƀòn, añ sùm lòt bal mờ làng bol pah tŭ geh broă lơi kờñ. Bơto tơngkah làng bol git sền gàr ring lơngai tàm ƀòn, làng bol, ơruh pơnu bal mờ gơp boh bơr niam chài, tryăng tryồng lơh broă sơrlèt gan ală kal ke tàm rài kis. Añ geh bơsram bơta lơi den añ mblàng wơl làng bol in đòm jat nàng rài kis niam bơnĕ rlau”.

Ală cau geh bơngă pin dờn tàm ală ƀòn kòn cau Rơđê sùm git là, he pal sùm lơh krơh lài nàng làng bol in bơsram mờ đòm jat, bal mờ gơp tam klac bal bơt bơtàu ƀòn lơgar ngai sơlơ hờm ram, chờ hờp. Mò H’Ngọc Êban (mat mờng hòi là mò Tăm dê) lài do là Phó Ƀí thư Đảng ủy xã Cư Suê, kơnhoàl Cư Mgar, càr Dăk Lăk. Tơnơ̆ tŭ jơh sơnam rê rlô lơh broă, mò rê ơm kis tàm ƀòn Sut Mđưng, xã Cư Suê, geh làng bol tàm ƀòn pin dờn pồ là cau geh bơngă pin dờn. Să tờm mò H’Ngọc Êban mờ hìu bơnhă sùm lơh krơh lài lơh jat tơl gùng dà, broă lơh bơh Đảng, Dà lơgar dê mờ gơ gơs là anih kơldìng ai làng bol tàm ƀòn in: “Añ sùm tơngkah làng bol he lơh ngan bơto sồr kòn sau pơn đơl pràn lơh broă lơh sa, bơsram tus gùng tus dà, bañ iat bol ờ niam bơ chồt. Kòn sau bơsram jak, mè bèp tryăng tryồng lơh broă, rài kis hờm ram. Bol he ờ geh jơtài, phan bơna lời wơl kòn sau in den kung pal gơtùi gàr rài kis niam chài nàng oh kòn he in kơlôi rơcang bơsram sră, tơnơ̆ do geh broă lơh geh kuơ ai mpồl bơtiàn in”.

Tă pơgồp ai bơtàu tơnguh lơh sa- mpồl bơtiàn, sền gàr lơngăp lơngai cíñ trị, ring niam mpồl bơtiàn tàm ƀòn lơgar mờ là cau tờm “đơs làng bol iat, lơh làng bol đòm”, ală cau geh bơngă pin dờn kung pơgồp bơnah uă ngan gơ wèt mờ broă lơh ngui niam, gàr sùm ală bơta niam chài jơi bơtiàn kòn cau dê. Tàm ală nam do, ồng Y Đheh Ayun (mat mờng hòi là ồng Bình dê) là cau geh bơngă pin dờn tàm ƀòn Phơng, xã Ea Tul, kơnhoàl Cư Mgar, càr Dăk Lăk neh jơh nùs hòi jà làng bol tàm ƀòn sền gàr ală bơhiàn lơh yàng kuơmàng tàm ƀòn lơgar, broă tàñ ồi kòn cau, gàr sùm geh 14 hìu jòng bơh yau tàm ƀòn, gàr 4 bòr cing, mờr 30 nă nghệ ñân dròng cing, trah mòn rùp bơto wơl rơnàng kơnòm să in: “Làng bol tàm xã Ea Tul kung gam gàr ală bơta niam chài kòn cau he dê. Bol hi sùm mblàng yal ai làng bol in sền gàr bơta niam chài kòn cau he dê. Dơ̆ 2 là geh Đảng, dà lơgar dong kờl bè priă jền den tàng gơtùi sền gàr ală bơta niam chài kòn cau he dê. Dilah bol he roh huĭ bơta niam chài kòn cau he dê den pơlai soh ngan, moat jrùm ngan”.

Mò H’Yâo Knul- Kwang atbồ Ƀan zân tộk càr Dăk Lăk pà git, gùt càr tŭ do geh 942 nă cau geh bơngă pin dờn. Mpồl cau geh bơngă pin dờn tàm ƀòn làng bol jơi bơtiàn dùl êt nă cau đơs bal, cau Rơđê đơs is pal geh jờng rơ ngan. Ală cau geh bơngă pin dờn neh ờ ngòt kal ke, lòt tơl gùng, tơl ƀòn, kup tê tơl nă cau, hòi jà làng bol lơh broă lơh sa, tơn jơh jơgloh tơrmù rƀah, sang tĕ ală bơhiàn ờ niam, sền gàr bơta niam chài, kis gơ rờm bal mờ mpồl bơtiàn: “Gơ wèt mờ bơta bơtàu tơnguh bơh tiah jơi bơtiàn kòn cau dùl êt nă cau tàm càr Dăk Lăk dê đơs is mờ gùt lơgar đơs bal, geh bơta tă pơgồp uă ngan bơh ală cau geh bơngă pin dờn dê, là ală cau tờm ngan, là rbàng tơrbŏ đah Đảng, gơnoar atbồ mờ làng bol. Tàm ală nam do, ală cau geh bơngă pin dờn geh ngui niam gơnoar broă he dê tàm ƀòn lơgar mờ lơh jat bơta kơp gơn bơh Đảng, dà lơgar dê”.

Gơtùi đơs nền, mpồl ală cau geh bơngă pin dờn tàm tiah jơi bơtiàn kòn cau dùl êt nă cau tàm càr Dăk Lăk sùm lơh krơh lài, lam lài tàm ală srơh tàm pơrlòng kờñ gơboh dà lơgar, ală dơ̆ lam sồr, là rbàng tơrbŏ kuơmàng đah gơnoar atbồ mờ làng bol. Mùl màl ai gŏ, ală cau geh bơngă pin dờn neh ai tơnggŏ gơnoar broă kuơmàng tàm broă mblàng yal, hòi jà làng bol lơh jat niam gùng dà, broă lơh bơh Đảng, bơta dong kờl, adat boh lam bơh dà lơgar dê; ală broă lơh, broă rơndap lơh bơtàu tơnguh lơh sa- mpồl bơtiàn, sền gàr lơngăp lơngai, ring lơngai bơh càr dê.