Tàm do, uă cau ala mat ring bal uă mờ kơ̆p gơn, Ƀan Cấp hàñ tơngai lơh broă pa rơ̆p geh uă tam gơl pa, đơng pơlam broă lơh Mpồl cau ling yau tàm gùt lơgar lơh geh ală jơnau kờñ neh geh ai, ngan là dong ai ală cau tàm mpồl cau ling yau bơtàu tơnguh lơh sa.

Ồng Nguyễn Đình Trường, lài do là Kwang atbồ dờng Kông ty May Việt Tiến, Phó Củ tịc Ală mpồl Cau lơh sa kă bro cau ling yau Việt Nam đơs là, tơngai lơh broă pa do, Mpồl Cau ling yau Việt Nam neh lơh sir kơnòl broă mờ sùm tơnguh uă nùs nhơm bơhiàn bơh yau bơto bơtê rơnàng kơnòm să, bơto bơtê nùs nhơm pơnđơl pràn is, nùs nhơm tam lơh mờ ală rơnàng bèp ồng neh bơt bơtàu, lời wơl ai rơnàng kơnòm să in, đòm jat broă lơh sền gàr ù tiah, dà lơgar dê. Den tàng bè hơ̆, tơngai lơh broă tus bal mờ 1/3 kwang bàng pa geh tơlik mat tĕ khà mờ geh pồ mŭt lơh broă tàm Ƀan Cấp hàñ, mờ bơh bơta đơng lam, sồr lơh bơh Ƀan Cấp hàñ pa dê, ồng Nguyễn Đình Trường pin dờn, ală jơnau kờñ, broă jàu bơh tơngai lơh broă dơ̆ VII rơ̆p lơh jat geh cồng nha.

Ồng Nguyễn Đình Trường đơs: Lơh jat jơnau sồr bơh Tổng Ƀí thư ồng Nguyễn Phú Trọng dê, Mpồl Cau ling yau Việt Nam geh 5 kơnòl broă. Tàm 5 kơnòl broă hơ̆ den geh 2 broă cèng bơta bơtàu tơnguh pràn. Broă bơtàu tơnguh pràn dơ̆ 1 là, pal bơt bơtàu mpồl cíñ trị kơ̆ kơl jap, pràn kơl dang ngan, sàng goh, nàng lơh tờm, sền gàr gơnoar atbồ ală tiah bơh tàm ƀòn lơgar tus hơđang. Broă dơ̆ 2 là lơh ngan tus bal lơh sa nàng tơn jơh jơgloh tơrmù rƀah mờ tus bal uă ngan tàm srơh bơh Đảng mờ Dà lơgar dê lam lơh. Do là 2 broă lơh bơtàu tơnguh pràn cèng bơta lơh nền nàng bơt bơtàu Mpồl ngai sơlơ bơtàu tơnguh.

Dùl tàm ală kơnòl broă geh ală kấp Mpồl Cau ling yau tàm gùt lơgar jơh nùs lơh ngan lơh jat là dong ală cau tàm mpồl cau ling yau lơh pas, bơtàu tơnguh lơh sa. Ồng Trần Bá Đông, Củ tịc Mpồl Cau ling yau sơnah ƀòn Đông Tảo, ƀòn dờng Hưng Yên, càr Hưng Yên pà gĭt, gơwèt mờ 3 mpồl lơh sa kă bro bơh cau ling yau dê lơh tờm, broă lơh dong kờl ală cau tàm mpồl cau ling yau lơh pas geh lơh jat niam geh cồng nha tàm uă nam do. Tŭ do 100% mpồl cau ling yau ờ geh cau lơi là hìu bơnhă rƀah, 85% là hìu bơnhă tơl ngui tơl sa mờ hìu bơnhă pas mờ 15% khà hìu bơnhă geh khà kis dimơ.

Ồng Trần Bá Đông kơ̆p kờñ: Priă bơcri den bol añ tàm ƀòn lơgar jat jơnau sồr bơh Dà lơgar dê rao, Ngân hàng cíñ sác rơ̆p dong kờl jat tàm jơnau cih. Tŭ do bol añ kơ̆p kờñ tàm kấp hơđang dong kờl lơh bè lơi nàng geh gùng dà broă lơh di pal, ală tơngume, broă lơh dong kờl ai bol añ in lik klàs rƀah. Bol añ kơ̆p kờñ, pin dờn ngan tàm bơta đơng lam bơh ală kwang bàng tàm Ƀan Cấp hàñ tơngai lơh broă dơ̆ VII do dê mờ añ kơ̆p kờñ là ală kwang bàng bal mờ kơnòl broă mờ bơta jơh nùs ngan bơh cau ling wa Hồ dê den ală kwang bàng rơ̆p geh lơh jat, đơng lam broă lơh Mpồl gơ in ring bal mờ bơtàu tơnguh.

Ai ồng Dương Xuân Hảo, Cáñ Văn phòng Mpồl Cau ling yau càr Ninh Bình den tơngŏ nùs nhơm lơh ngan, tàm tơngai lơh broă pa do geh pơn jat tai lơh jat niam ală broă lơh dong kờl bal mờ gơ̆p lơh pas bơh ală cau tàm mpồl cau ling yau dê. Ồng Dương Xuân Hảo, đơs: Mpồl cau ling yau càr Ninh Bình tàm tơngai lơh broă tus rơ̆p pơnđơl pràn lơh ngan lơh geh ală bơta uă ngan, dong kờl bè priă càn nàng cau tàm mpồl in geh ală bơta nàng bơtàu tơnguh lơh sa mờ dong kờl uă ngan rlau jơh là bè priă càn tàm ală Ngân hàng cíñ sác xã hội mờ Ngân hàng ndai. Dong kờl bè ală broă lơh pơndờm pơnđiang bal mờ gơ̆p, dong kờl bal mờ gơ̆p tàm bơta là cau tàm mpồl lơi geh uă bơta rlau den dong kờl bè bơta chài, dong kờl bè bơta mờng chài lơh sa, dong cau tàm mpồl he dê bơtàu tơnguh rlau.

Ală sră nggal bơh Pơrjum dờng dê là pơlam gùng dà kwơ màng ai broă lơh mờ bơta bơtàu tơnguh bơh mpồl dê tàm 5 nam tus. Tơnơ̆ tŭ Pơrjum dờng geh tơn jơh tơn, ală kấp mpồl bơyai lơh niam broă bơsram lơh jat Nghị quyết, ală sră nggal Pơrjum dờng dê, mblàng yal jrô ơnàng ai kwang bàng, cau tàm mpồl in bè cồng nha Pơrjum dờng; mhar bơt bơtàu, lam lơh jat broă lơh, broă rơndap lơh lơh broă, ai Nghị quyết mŭt lơh ngan ngồn tàm broă lơh bơh mpồl dê; lơh pràn srơh tàm pơrlòng, bơsram mờ lơh jat bồ tơngoh, nùs nhơm, broă lơh mờ rài kis Hồ Chí Minh dê, lơh jat geh cồng nha ală kơnòl broă; pơgồp bơnah bơt bơtàu mờ sền gàr kơ̆ kơljap Dà lơgar, di pal mờ bơta pin dờn bơh Đảng, Dà lơgar mờ làng bol dê. Đơs tơn jơh Pơrjum dờng, Thượng tướng ồng Bế Xuân Trường, Củ tịc Mpồl Cau ling yau Việt Nam khoá VII, tơngai lơh broă bơh nam 2022-2027 đơs loh: Bol añ dan hơ tềng đap Mpồl Cau ling yau tàm gùt lơgar sùm tam klăc bal, ring bal, đềt mềr bal mờ gơ̆p, bơt bơtàu Mpồl Cau ling yau geh nùs nhơm cíñ trị kơ̆ dơn, pin dờn ngan tàm bơta đơng lam bơh Đảng, Dà lơgar, jơh nùs dòn song mờ Đảng, Dà lơgar dê, mờ làng bol mờ rài xã hội củ nghĩa, sùm tơnguh uă nùs nhơm geh kơnòl. Tam gơl pa tơngume, broă lơh, nùs nhơm lơh broă, lơh ngan, rcang lài, bơceh pa tàm broă đơng lam sồr lơh lơh jat kơnòl broă, bơt bơtàu Mpồl sàng goh, pràn kơldang kơ̆ kơljap  tơl làm, lơh sir jak ngan tơl kơnòl broă.