Bơh hơ̆, dong kờl làng bol bơtàu tơnguh lơh sa- mpồl bơtiàn, pơgồp bơnah gàr kơ̆ lơngap lơngai cíñ trị, sơlơ tơnguh tai nùs nhơm tam klăc bal đah ling klàng mờ làng bol.

Pah dơ̆ tus tàm ngai lồi poh halà ngai ơm rơlô ngai lơh chờ, 21 nă Đảng viên geh Pôs đồng ling sền gàr tiah nhàr lơgar A Xan geh jàu drơng kơnòl 95 hìu bơnhă làng bol ơm tàm 2 xã A Xan mờ Tr’hy, kơnhoàl Tây Giang (càr Quảng Nam) tus lùp còp tai ală hìu bơnhă làng bol tàm ală ƀòn tiah nhàr lơgar. Gĭt loh nùs nhơm, bơta kơ̆p kờñ bal mờ broă jòi gĭt loh ngan bè nùs nhơm kơlôi sơnơng broă lơh bơh làng bol dê, kwang bàng, cau ling Pôs đồng ling sền gàr tiah nhàr lơgar A Xan neh lam lơh uă broă lơh, bơnah broă dong kờl làng bol tiah nhàr lơgar, hìu bơnhă kal ke brồ guh lik klàs rƀah.

Hìu bơnhă ồng Bliềng, ơm tàm thôn Ki’noonh, xã A Xan, lài do gơwèt hìu bơnhă rƀah. Bơh tŭ geh ală Đảng viên Pôs đồng ling sền gàr tiah nhàr lơgar A Xan dong kờl, bơto broă lơh sa, rài kis hìu bơnhă ồng Bliềng tŭ do neh tam gơl loh làng. Ồng Bliềng, đơs: “Lài do hìu bơnhă añ kal ke ngan, rài kis tŭ lơi kung siơ̆u siar, geh ală wa Pôs đồng ling sền gàr tiah nhàr lơgar dong kờl sơntìl phan tam phan ròng, bơto pơlam broă ròng siam den mpồl sur dờng pràn niam, cèng wơl phan ngui sa tàm rài kis ai hìu bơnhă in. Ưn ngài ală wa mpồl ling wă ngan”.

Bơta dong kờl bơh ală Đảng viên Pôs đồng ling sền gàr tiah nhàr lơgar A Xan neh pơgồp bơnah ngan ngồn pơn jờng làng bol sơr lèt gan kal ke brồ guh lơh broă lơh sa. Thượng uý Nguyễn Văn Trọng, Kwang atbồ Mpồl hòi jà làng bol, Pôs đồng ling sền gàr tiah nhàr lơgar A Xan pà gĭt, mpồl ling jàu tơl nă Đảng viên dờp dong kờl bơh 5 tus 7 hìu bơnhă rƀah, hìu bơnhă kis dùl nă să, hìu bơnhă kal ke. Mìng is Thượng uý Nguyễn Văn Trọng den drơng kơnòl 5 hìu bơnhă.

Thượng uý Nguyễn Văn Trọng đơs:“Geh bơh ală bơta lơh sa mpồl bơtiàn tàm ù tiah mpồl ling atbồ dê, rài kis làng bol đơs bal gam gơtìp uă ngan kal ke. Mpồl ling lam lơh uă broă lơh dong kờl làng bol bơtàu tơnguh lơh sa. Tơnơ̆ tŭ geh kwang bàng bơh Mpồl ling sền gàr tiah nhàr lơgar A Xan dong kờl bơto pơlam ròng phan tam phan, làng bol hời rơ hời jòi geh gùng lơh sa ai hìu bơnhă in tàm broă bơtàu tơnguh lơh sa. Ngan là ală broă lơh bơtàu tơnguh lơh sa hìu bơnhă neh cèng wơl cồng nha lơh sa uă, pơgồp bơnhă tơnguh uă priă lơh geh bơtàu tơnguh rài kis bơh làng bol dê tàm ù tiah do".

 Nàng lam lơh geh cồng nha broă lơh Đảng viên mpồl ling sền gàr tiah nhàr lơgar drơng kơnòl, dong kờl hìu bơnhă tàm tiah nhàr lơgar, Pôs đồng ling sền gàr tiah nhàr lơgar A Xan sac rơwah ală kwang bàng, cau ling geh bơta mờng chài geh ngan, gĭt wă loh bơhiàn bơh làng bol dê. Bơh hơ̆, ngui niam bơta pràn tàm broă lơh cribơyai, lam lơh, dong làng bol hời rơ hời bơtàu tơnguh lơh sa, tơn jơh jơ gloh, tơrmù rƀah. Thiếu tá Nguyễn Văn Lợi, Ƀí thư Đảng uỷ, Cíñ trị viên Pôs đồng ling sền gàr tiah nhàr lơgar A Xan, kơnhoàl Tây Giang, càr Quảng Nam pà gĭt: bơh tŭ lam lơh broă lơh jàu Đảng viên drơng kơnòl, dong kờl hìu bơnhă, rài kis làng bol dê neh tam gơl loh làng, geh uă hìu bơnhă brồ guh lơh pas.

Thiếu tá Nguyễn Văn Lợi, đơs: “Pôs đồng jàu Đảng viên tus drơng kơnòl ală hìu bơnhă rƀah tàm ù tiah do in. Jơnau kờñ nàng gĭt loh bơta ală hìu bơnhă do dê nàng gĭt khi kờñ geh bơta lơi nàng cribơyai pơgồp bal mờ ală kấp nàng dong kờl tơn bơta kờñ pal geh ai làng bol in. Bơh ală broă lơh dong kờl bơtàu tơnguh lơh sa mpồl bơtiàn, broă lơh bơh Mpồl ling sền gàr tiah nhàr lơgar dê lam lơh den tŭ do rài kis bơh làng bol dê hời rơ hời gĭt bơtàu tơnguh lơh sa. Tŭ do ală hìu bơnhă neh hời rơ hời lơh tờm lơh sa bơh he dê.”

Đại tá Nguyễn Bá Hưng, Phó Cíñ ủy Mpồl ling sền gàr tiah nhàr lơgar càr Quảng Nam pà gĭt, Đảng ủy, Gah đơng lam Mpồl ling sền gàr tiah nhàr lơgar càr neh sồr kấp ủy 11 Pôs đồng ling sền gàr tiah nhàr lơgar pơgồp bal mờ Đảng ủy, Ủy ƀan Ñân zân 30 xã, sơnah ƀòn tiah nhàr lơgar, bồt bơlào dà lềng jàu 212 nă đảng viên drơng kơnòl rlau 1 rơbô hìu bơnhă làng bol. Tàm hơ̆, geh 132 nă Đảng viên drơng kơnòl 720 hìu bơnhă là làng bol kòn cau dùl ết nă cau. Uă Đảng viên geh broă lơh niam, niam ngan, geh broă rơndap lơh, jơnau kờñ geh ngan nàng dong kờl ală hìu bơnhă làng bol geh dờp drơng kơnòl. Đại tá Nguyễn Bá Hưng đơs nền, bơh sơn rờp, ală Đảng viên neh hòi jà uă hìu bơnhă bơt bơtàu niam rài kis niam chài, ƀañ lơh tìs adat boh lam, rềs àr mpồl bơtiàn, pơlam gùng dà ai làng bol tàm tiah nhàr lơgar in bơtàu tơnguh lơh sa geh cồng nha.

Đại tá Nguyễn Bá Hưng, đơs: “Đảng viên geh sồr drơng kơnòl hìu bơnhă, den pah nhai geh broă rơndap lơh ngan ngồn pal tơrgùm dong kờl ală hìu bơnhă tàm broă bơtàu tơnguh lơh sa- mpồl bơtiàn, tus bal sền gàr lơngap lơngai, rơndap tap sèng. Broă lơh geh lam lơh lơh geh cồng nha ngan neh hòi jà dong kờl 10 hìu bơnhă geh bơta kal ke tam gơl broă lơh gĭt wă, ờ tus bal ală broă rềs àr mpồl bơtiàn, ờ lơh tìs adat boh lam. Bơdìh hơ̆, gam dong kờl 25 hìu bơnhă lik klàs rƀah, drơng niam ngan kơnòl broă sền gàr tiah nhàr lơgar, bơtàu tơnguh lơh sa mpồl bơtiàn tàm tiah do dê".