Tơngai lài, Sở Giáo zụk mờ Đào tạo càr Dăk Lăk neh hòi jà tă pơgồp priă jền dong kờl geh 40 tơmàn đong, geh: 5 tơmàn đong bơh priă hòi jà tă pơgồp bơh gah bơto bơtê dê; 35 tơmàn đong priă dong kờl bơh Tập đoàn Ồs đèng Việt Nam bơh Ƀộ Giáo zụk mờ Đào tạo dê sồr pà ai càr in. Tơnơ̆ tŭ dờp 35 tơmàn đong, Sở Giáo zụk mờ Đào tạo càr Dăk Lăk neh pơgồp bal mờ Anih tờm drơng broă tàm pơrlòng giă jơtài càr bơyai tàm pơrlòng jòi cau tăc blơi, blơi phan jăt jơnau ai bơh adat boh lam dê.

Cồng nha, ală mat 3 kông ty tàm pơrlòng geh tăc 14 rbô nơm măy tíñ ƀảng ai kơnòm bơsram in mờ giă 2 tơlak 294 rbô đong dùl nơm, ndrờm mờ rlau 32 tơmàn đong. Priă tềm pềr bơh tàm pơrlòng jòi cau tăc blơi mờr 3 tơmàn đong neh geh Sở Giáo zụk mờ Đào tạo jun yal mờ kâp geh gơnăp gơnoar in pơn jăt tai blơi phan bơtơl nàng pà di tŭ ai kơnòm bơsram kal ke in. Ồng Đỗ Trọng Hiệp, Phó Kwang ătbồ Sở Giáo zụk mờ Đào tạo càr Dăk Lăk pà gĭt: Bơh dơ̆ hòi jà do, bol añ neh lơh gơrề jơnau đơs ờ mìng gơwèt mờ gah bơto bơtê mờ uă gah broă ndai tai, geh bal làng bol, bơta lơh gơrề tàm mpồl bơtiàn dùl bă lơh is nàng jơh ală oh kòn tàm ù tiah càr Dăk Lăk ndrờm geh bơsram tàm bơta kòp Kovid-19, ờ lời kơnòm bơsram lơi gơtìp lời ơm wơl bơh ngkời.