Dờp phan pà geh 1 tơlăk đong bal mờ sră blơi phan 0 đơng geh Liên đoàn Lao động càr Dăk Lăk jào pà, bi Y Krich Êban, kis tàm xã Ea Tul, kơnhoàl Cư̆ Mgarlà kông đoàn viên Kông đoàn Anih lơh dà sàng kloh mờ kloh niam tiah kis ƀòn lơgar càr Dăk Lăk yal, tơnơ̆ mờ bàr niam gơtìp gơrềng bơh kòp Kovid-19, bi mờuă cau lơh broă gơtìp kal ke tàm rài kis. Phan pà do geh kwơ màng ngan, dong kờl hìu nhă bi wă rò satềp Quý Mão hờm ram, chờ hờp, gơboh gơbài. “Ờ mìng añ mờ jơh ală cau lơh broă ndrờm gơtìp kal ke, geh cau gơtìp roh broă, geh cau den bơtoah bè añ geh Sở Nông nghiệp kĭ lơh broă bal jŏ jòng. Hìu nhă gơtìp kal ke ngan, tŭ dờp geh phan pà do den hìu nhă añ chờ hờp ngan tàm satềp nam do”.

Gơwèt mờ oh Y Hổ H’Mok, kis tàm ƀòn Com Leo, xã Hoà Thắng, ƀòn dờng Buôn Ma Thuột yal, rơndeh coh geh Mpồl Cữ thập đỏ ƀòn dờng Buôn Ma Thuột lam sồr ală cau geh nùs nhơm niam jào pà di tàm satềp do là phan pà geh kwơ dờng ngan. Rơndeh coh geh dong kờl oh tàm nam pa ờ pal guh gờñ nàng lòt jơng tus hờ hìu bơsram tai mờ satềp do oh Y Hổ geh pơn diang oh tàm rơndeh coh pa nàng lòt nhơl mờ ală bơyô tàm ƀòn tai; “Lài do ờ geh rơndeh coh, kòn lòt bơsram glar bòl ngan, dờp geh rơndeh coh kòn chờ hờp ngan, kòn lơh ngan bơsram jăk nàng bơsal wơl mờ nùs nhơm ală cau neh dong kờl”.

Tàm hìu pa lơh dờng niam, ơnàng, bi Trịnh Thế Hậu, kis tàm sơnah ƀòn Thiện An, thị xã Buôn Hồ pà git, bi geh 23 nam lơh broă tàm gah bơto bơtê, ală nam do tài rài kis gơtìp kal ke, să tờm bi gơtìp kòp klờm, pal sơm kòp roh uă ngan priă, den tàng ờ geh tơl priă nàng lơh hìu is mờ gam ơm bal mờ mè bèp. Nam 2021, bi Hậu geh bao hơ̆ sồng deh kòn, hìu ơm bal gơtìp hăt mờ ờ niam. Dờp gŏ rài kis gơtìp kal ke bơh bi Hậu dê, nhai 10 nam 2022, kông đoàn gah bơto bơtê mờ bơsram càr Dăk Lăk neh dong kờl bi Hậu 50 tơlăk đong nàng lơh hìu ram kông đoàn. Di tàm satềp, hìu neh lơh gơs mờ geh ai ngui. “Di lah pơn drờm mờ ală nam lài den tàm nam do hìu nhă bol añ geh hìu pa den chờ gờp ngan, kung iang nùs nàng lơh broă. Wă rò atềp nam pa tàm nùs nhơm chờ hờp bal bơh ùr bơklao là pa deh kòn mờ geh hìu pa ơm mờ broă lơh geh kơl jăp mờ geh broă sền gròi bơh kông ñân viên cứk lơh broă den bol añ kung ưn ngài broă dong kờl bơh ală cau lơh broă bal dê”.

Jăt ồng Nguyễn Quang Thuân, Phó Kwang atbồ Sở Lao động mờ Thương binh xã hội càr Dăk Lăk yal, di satềp Quý Mão nam 2023, UɃÑZ càr Dăk Lăk ai geh 76 tơmàn đong nàng pà phan ală cau, mpồl lơh broă geh pơnrơ jăk in. Git nđờ jơ̆t rơbô pò phan dong kờl hìu rơƀah, hìu ndrờm mờ rơƀah bal mờ cau lơh broă geh rài kis gơtìp kal ke kung geh ală mpồl lơh broă, mpồl lơh sa kă bro mờ cau geh nùs nhơm niam jào pà tus mờ làng bol di tàm satềp do. “Nam do càr đơng lam ai ală kơnhoàl, thị xã, ƀòn dờng; ală xã, sơnah ƀòn, thị trấn geh bơyai lơh ală broă nàng pà phan ai ală cau rơƀah tàm càr in, mìng is càr den geh lơh 8 mpồl lơh broă nàng còp ală cau geh sră dong kờl bơh dà lơgar bal mờ còp ală cau sền gàr broă lơh di tàm satềp. Bơdìh mờ priă bơh càr dong kờl, den càr kung đơng lam Mpồl Cữ thập đỏ, Mặt trận mờ ală mpồl lơh broă ndai tus bal lam sồr ală mpồl lơh sa kă bro, mpồl lơh broă, cau dùl nă să kis tàm càr nàng drơng gàr ai cau rơƀah in nàng bañ geh cau lơi gơtìp sơbì is hờ tơnơ̆”.

Ală phan pà geh kwơ geh jào tus làng bol geh rài kis gơtìp kal ke di tàm satềp neh dong kờl ai ală cau geh rài kis kal ke in ram nùs, ai tai bơta pràn nàng ală cau geh rài kis kal ke in brồ guh tàm rài kis mờ jơnau kơ̆p kờñ nam pa geh uă bơta chờ pa.