Cau lơh băo Anih jơnau đơs Việt Nam geh jơnau lùp Đại tá Lê Văn Hùng, Phó Kwang atbồ mơkung là Kwang atbồ Mpồl pơlam broă Gah đơng lam ling klàng càr Dăk Lăk dê bè ală bơta pa, kung bè ală bơta ƀuơn, bơta kal ke tàm broă lơh sac rơwah ling tàm càr dê.

-Ơ ồng, broă sac rơwah ling, hòi jà làng bol lòt ling nam 2023 càr Dăk Lăk dê geh bơta pa lơi?

Broă sac rơwah ling nam 2023 den tŭ do kung gam lơh jat Adat Kơnòl broă ling klàng nam 2015. Mơya, broă lơh sac rơwah, hòi jà làng bol lòt ling nam 2023 geh bơta pa hơ̆ là Cíñ phủ neh ai lơh jat Nghị địñ sồ 37 ngai 06/06/2022 tam gơl, bơtơl bàr pe bơta bơh Nghị địñ sồ 120 ngai 09/10/2013 sồr lơh glài cau lơh tìs mờ priă tàm gah sền gàr Dà lơgar, tiah tờm dà lơgar dê. Jat hơ̆, khà priă lơh glài gơwèt mờ broă lơh tìs gơ wèt mờ broă lơh sac rơwah, hòi jà làng bol lòt ling tơnguh uă ngan. Mờ do kung là dùl tàm ală broă lơh nàng kờñ tơrmù, bơsong bơta ờ bài lơh jat kơnòl broă ling klàng.

Mờ geh tơngŏ ngan ngồn, mờ cồng nha, nam 2022 ờ bài lòt kham pràn kơl dang să jan lòt lơh kơnòl broă ling klàng là 103 nă làng bol, mơya, nam 2023 do den broă ờ bài lòt kham pràn kơl dang să jan lòt lơh kơnòl broă ling klàng mìng gam 2 nă làng bol lơm. Hơ̆ là bơta pa, bơta niam bơh broă lơh sac rơwah, hòi jà làng bol lòt ling nam 2023 dê.

 - Broă lơh sac rơwah, hòi jà làng bol lòt ling nam 2023 càr Dăk Lăk dê geh ală bơta ƀuơn mờ bơta kal ke lơi, ơ ồng?

Broă lơh sac rơwah, hòi jà làng bol lòt ling namm 2023 càr dê bè bơta ƀuơn là geh bơta sền gròi đơng lam, sồr lơh tơn bơh Tỉñ ủy, Hội đông Ñân zân, Ủy ƀan Ñân zân, bơta mŭt lơh bal bơh Sở, ƀan, ngàñ, mpồl cau, kấp ủy, gơnoar atbồ ală tiah, ală kấp, bơh thôn, ƀòn, tổ dân phố tus kấp xã, kấp kơnhoàl, kấp càr. Bơh hơ̆, neh tơnguh uă bơta gĭt wă bơh ală rơnàng làng bol dê, ngan là làng bol tàm sơnam rcang lòt ling. Sền gĭt geh gơnoar broă, kơnòl broă, bơta chờ hờp bơh tơl nă làng bol dê tŭ lơh jat kơnòl broă ling klàng kung bè tus bal tàm kơnòl broă kwang àng làng bol.

Mơya, kung geh ală bơta kal ke sơl, dơ̆ 1 là broă să tờm neh là làng bol tơrgùm ai broă bơtàu tơnguh lơh sa, uă làng bol lòt lơh broă sa tiah ngài tàm ală tiah lơh sa mờ măi mok. Den tàng, broă hòi jà làng bol rê kham pràn kơl dang să jan, lơh jat kơnòl broă ling klàng bơh kấp ủy, gơnoar atbồ ală tiah, ală kấp kung tìp uă kal ke. Dơ̆ bàr, pràn kơl dang să jan bơh làng bol dê tŭ do gơmù uă ngan, pơn yơu bè bơtờp kòp khúc xạ bè mắt, gơguh gùng mhàm, tim mạch. Ngan là, bàr pe nă làng bol sơnờm ngui chất kích thích, den hơ̆ là ală bơta sơnơm nàng lơh tìs hệ tim mạch, gơguh gùng mhàm, lơh mpồl kham pràn kơl dang să jan kấp kơnhoàl đơs là tìp uă ngan kal ke.

- Ơ ồng, càr Dăk Lăk neh geh ală broă lơh rcang lài bè lơi ai dơ̆ jàu mờ dờp ling nam 2023 in.

Broă jàu bơh Cíñ phủ dê jàu ai càr Dăk Lăk in nam 2023 là sac rơwah 2 rơbô 968 nă làng bol. Tàm hơ̆ geh 2 rơbô 502 nă lơh jat kơnòl broă ling klàng, geh 2 nă cau ùr. Mờ 466 nă làng bol lơh kơnòl broă tus bal Kwang àng làng bol, geh 1 nă làng bol là cau ùr. Nàng lơh sir niam ngan ai dơ̆ jàu mờ dờp ling tàm ală tiah, anih lơh broă sùm là Gah đơng lam ling klàng càr dê neh tă pơgồp jơnau đơs mờ Mpồl duh broă kơnòl broă ling klàng sồr Mpồl duh broă kơnòl broă ling klàng bơh 15 kơnhoàl, thị xã, ƀòn dờng sơlơ gĭt loh bơta niam, atbồ làng bol tàm sơnam lòt ling. Bơto pơlam ală tiah in, ngan là Gah đơng lam ling klàng ală kơnhoàl lơh niam broă lơh rcang lài, pơlam tàp ală tơnguh me nàng lơh dơ̆ jàu mờ dờp ling yŭ rơyùm, jơh nùs, ngan ngồn là ngai chờ lòt ling bơh làng bol ală jơi bơtiàn càr dê. Mơkung, sồr kấp ủy, gơnoar atbồ ală tiah, ală kấp mŭt lơh bal, lơh niam broă lơh dong kờl hìu bơnhă cau ling dê, ngan là lùp còp, pơndờm pơnđiang ală làng bol iang bồ tơngoh, rcang lòt ling nam 2023.

-Ơi, dan ưn ngài Đại tá Lê Văn Hùng uă ngan!