Uă jơnau đơs tă pơgồp bè jàu ù, ai ơpah ù, tam gơl jơnau kờñ ngui ù, ai wơl, tơm wơl, dong kờl rơndap ƀòn ơm kis pa tŭ dà lơgar ai wơl ù neh geh ală kwang bàng đơs tus. Jat ală kwang bàng đơs, ngan ngồn tàm broă ai wơl ù geh uă kal ke, bơta ờ niam lơh gơlik ală broă lah yă kal ke, gal cau, uă ngan jơnau sơn đờm lơh gơlik geh là tài ờ hềt geh jơnau cih mùl màl bè broă lơh tơm wơl, dong kờl, ờ hềt geh bơta ring bal tàm broă pơgồp bal lam lơh. Bè hơ̆ den tàng, broă rơndap tap sèng, sră nggal tơm wơl, dong kờl, rơndap ƀòn ơm kis pa, ai wơl ù pal dờp geh bơta ring bal jơnau đơs làng bol, loh làng, song dơpă, di pal mờ geh kơnòl mblàng lơh loh, gàr bơta ring bal đah bơta kuơ dà lơgar, mpồl lơh sa kă bro mờ làng bol.

Ai jơnau đơs bè tơnguh khà ù lơh gơs khà ù lơh sa suơn sre, brê bơnơm bơh broă ơpah mờ tac bro, ală kwang bàng đơs, do là tơngume pa lơh gơlik bơta ƀuơn tàm broă lam lơh broă tơnguh bă ù lơh sa. Bulah bè hơ̆, adat pal cih loh rlau tai bè ală cau geh ai ơpah halà tac bro ù. Tàm pơrjum, ală kwang bàng kung tơrgùm ai jơnau đơs bè broă lam lơh rơndap ù tiah, rơndap broă ngui ù; ală jơnau cih gơ rềng tus bơtàu tơnguh khà ù, bè cih mat ù tiah, lơh sră ngui ù mờ ală sră nggal hàñ cíñ, zữ liệu, jơnau tơnggit ù tiah.