Nam 2022, Kes priă Sền gàr dong kờl kơnòm dềt càr Dăk Lăk neh hòi jà tă pơgồp geh mờr 8 tơmàn đông, dong kờl ai rlau 9 rbô nă kơnòm dềt in.

Broă lơh dong kờl geh: Broă lơh sền gàr pràn kơldang să jan mờ phan sa tơl pràn ai kơnòm dềt in bè broă lơh kham sac rơ wah mờ reh plai nùs bơh pa deh, kham ală bơta kòp bè mat mờ pà sơnơm ờ sa priă, Broă lơh dong kờl bơto bơsram bè lơh cơldŭ bơsram mờ pà phan bơna bơsram sră, nhơl ñŏ ai kơnòm bơsram tiah sar lơgar ngài in, jàu priă dong kờl bơsram ai kơnòm dềt geh rài kis kal ke bơsram jak in, pà rơndeh coh mờ phan ngui bơsram ai kơnòm bơsram in; broă lơh sền gàr kơnòm dềt bè: dong kờl ai kơnòm dềt gơtìp rềs àr, bŭ dà, gơtìp pù pờng, gơbàn kòp ngòt rơngơt, kòn đời jơh mè bèp, dong kờl ai kơnòm dềt geh mè bèp gơtìp chơt tài bơh kòp Kovid-19 mờ lơh hìu ơm nùs nhơm ai kơnòm dềt geh rài kis kal ke, kơnòm kòn đời in… Di dơ̆ do, kwang đơng lam bồ càr Dăk Lăk sồr ală kâp, ală gah broă lơh, mpồl lơh broă geh gơ rềng pal pơn jat tai lòt bal mờ Kes priă sền gàr dong kờl kơnòm dềt càr nàng tàm tơrbŏ, yal tơnggit ală broă lơh, rơndap broă, ală mpồl, ală cau dong kờl, ală mpồl lơh broă ờ di Cíñ phủ đơng lam nàng sơlơ tơnguh priă jền dong kờl ai kơnòm dềt in.