Tus tŭ do pa geh 1/3 khà bă ù do geh tam wơl brê mờ tờm chi brê bơnơm, mơya cồng nha ờ hoan niam. Bơh nam 2017, lam lơh Rơndap broă lơh 1123 bơh Ủy ƀan Ñân zân càr Gia Lai dê bè broă ai wơl ù brê gơtìp sơgràm nàng tam gơl tam phan di pal mờ jơnau kờñ brê bơnơm mờ tam brê, 17 kơnhoàl, thị xã, ƀòn dờng tàm càr neh hòi jà mờr 20 rơbô hìu bơnhă làng bol yal wơl bă ù lơh mìr tàm ù brê bơnơm, mờ kờp jơh bă ù rlau 37 rơbô lồ.

Tus tŭ do, neh geh rlau 11 rơbô lồ ù ai wơl geh tam wơl brê halà tàm chi brê bơnơm. Bulah bè hơ̆, tàm bơta geh ngan tàm uă tiah, khà tờm chi brê ờ hềt dờng jơnhoa tài bơh phan tam ờ hềt di pal mờ ờ hoan sơngka sền gàr. Jơnau tờm lơh broă lơh jat Broă rơndap lơh geh cồng nha ờ hềt uă là tài bơh bă ù brê gơtìp sơgràm uă ngan là tài bơh làng bol kòn cau dùl ết nă cau gơwèt hìu bơnhă kal ke neh lơh sa suơn sre bơh jŏ, tŭ tam gơl tus tam brê den làng bol kal ke nàng gàr niam broă lơh sa rcang tàm rài kis. Bal mờ hơ̆, broă lơh dong kờl tam brê mờ broă lơh dong kờl dờp bơta kwơ bơh broă tam brê ờ hoan geh den broă lơh ai wơl ù brê gơtìp sơgràm mờ hòi jà làng bol tam brê gơtìp uă kal ke...