Nàng kờñ lơh geh jơnau kờñ tus nam 2025, rlau 90% cau bơh 15 sơnam rlau hơđang chài sền sră, chài cih akhar dà Yoan, càr Gia Lai gam lam lơh dùl ròt bal ală broă lơh, tàm hơ̆ geh broă bơto sền sră mờ cih akhar dà yoan ai làng bol tiah làng bol jơi bơtiàn dùl êt nă cau in, là làng bol ơm kis geh tus mờr nggùl khà kờp làng bol gùt càr dê. Jăt broă rơndăp lơh lơh jăt Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau mờ tiah kơh bơnơm tơngai dơ̆ I (bơh nam 2021- 2025), càr Gia Lai pờ 735 ơdŭ bơto sền mờ cih akhar dà yoan ai mờr 23 rbô 500 nă cau in tàm 176 xã. Mìng is tàm nam do, Sở Giáo zụk mờ Đào tạo càr Gia Lai rơ̆p pơgồp bal mờ Ƀan Jơi bơtiàn càr Gia Lai mờ ală anih lơh broă geh gơrềng cribơyai mờ Ủy ƀan Ñân zân càr tam pà priă jền ai ală tiah in pờ 217 ơdŭ ai rlau 6 rbô 500 nă cau in. Sở Giáo zụk mờ Đào tạo càr Gia Lai pà gĭt: Do là broă lơh cèng wơl làng bol jơi bơtiàn dùl êt nă cau in đơs bal mờ Gia Lai in đơs is geh tơnguh uă bồ tơngoh gĭt sră làng bol dê nàng bơh hơ̆ klàs bơh bơta rƀah, tơnguh uă bơta niam rài kis he dê.