Tàm dùl dơ̆ pơrjum ƀòn ờs mờng bơh ƀòn Khung Nhung, xã Quản Bạ dê. Kwang atbồ ƀòn sac rơwah tŭ tơngai pơrjum ƀòn tàm tŭ 7 jiơ nggùl mang mờ jơnau đơs ngui tàm dơ̆ pơrjum ƀòn là jơnau đơs dà kòn cau tiah do dê. Hơ̆ là broă lơh niam ngan rlau jơh nàng gơnoar atbồ in tơrgùm tơl làm làng bol tàm ƀòn nàng yal wơl jơnau yal tơngĭt, mờ do kung là broă lơh nàng iăt kơno ală jơnau đơs wơl bơh đah làng bol dê kờñ pơyoa tus mờ ală kấp geh gơnoar.

Mò Cư Thị Sông, làng bol ƀòn Khung Nhung, xã Quản Bạ lòt pơrjum bal pà gĭt: Kơnờm pơrjum ƀòn, tơl nă cau ndrờm gơtùi gĭt di ngan ală gùng dà broă lơh bơh Dà lơgar dê nàng mŭt ngui mờ lơh jat bal. Kơnờm lòt pơrjum mờ iăt kơno jơnau mblàng yal mờ làng bol sơlơ gĭt broă lơh sa pa nàng bơt bơtàu ƀòn hờm ram lơngap lơngai.

Kung bè uă làng bol kòn cau dùl ết nă cau tàm ƀòn Khung Nhung sơl, bulah ờ hoan gĭt wă ngan đơs dà yoan mờ bơta jak chài, bơta niam chài, mơya mờ bơta kơ̆p kờñ lơh pas uă ngan, tơnơ̆ uă dơ̆ lòt pơrjum ƀòn mờ iăt kwang atbồ ƀòn, Phó Kwang atbồ ƀòn yal bè broă lơh pas, bi Lý Tà Bâu ơm tàm ƀòn Trúc Sơn, xã Quản Bạ neh khin cha tus tàm Ủy ƀan Ñân zân xã nàng jòi gĭt bè broă lơh lơh broă sa, tơn jơh jơgloh tơrmù rƀah. Tàm xã, bi Bâu geh kwang bàng xã jơh nùs ngan bơto pơlam, bơto bơtê broă pờ tàm internet bơh tàm măy tíñ, ai bi gĭt ală jơnau cih di pal nàng jòi gĭt tơngume he kờñ sền gròi, tơnơ̆ ală dơ̆ kwi kwơ ờ gĭt lơh bơh chờm, bi Bâu tŭ do chờ hờp ngan tŭ gĭt tus ală jơnau yal niam ngan bè ală broă lơh ròng be tàm internet.

Bi Lý Tà Bâu đơs: Hìu bơnhă añ den kờñ ngan bơtàu tơnguh lơh sa mờ broă ròng be. Añ geh kơno gơ̆p bơyô gùt dar đơs là tàm xã geh broă lơh ròng be tàm internet, mờ añ tus tàm xã lùp kwang bàng xã den kwang bàng xã pờ măy tíñ añ in sền den añ gŏ là geh cồng nha ngan den añ kung kờñ ngan sền jơh den rê wơl tàm hìu bơnhă nàng bơtàu tơnguh lơh sa mờ mpồl be sơn tìl bè tàm măy tíñ neh bơto bơtê.

Jat bi Lệnh Thế Tú, Kwang atbồ drơng broă bơt bơtàu ƀòn lơgar pa xã Quản Bạ, kơnhoàl Quản Bạ, càr Hà Giang, bơh tŭ bi dờp kơnòl broă rê lơh broă tàm xã, bi sùm dờp geh jơnau sồr bơh làng bol ai khi in sền ală broă lơh ròng phan geh cồng nha tàm măy tíñ. Bi Tú sền gŏ làng bol kòn cau tàm xã  bulah ờ hoan gĭt ngan đơs dà yoan mơya làng bol sùm geh bơta kơ̆p kờñ brồ guh tơn jơh jơgloh, lik klàs rƀah. Den tàng, pah tŭ geh cau lơi sồr bi pờ măy tíñ nàng sền, bi ndrờm jơh nùs ngan bơto pơlam làng bol in gĭt broă ngui, pờ internet.

 Hà Giang là dùl tàm ală càr rƀah ngan rlau jơh gùt lơgar dê, mơkung là tiah geh tus 22 jơi bơtiàn làng bol kòn cau dùl ết nă cau mờ pơgap mờr 800 rơbô nă cau, tàm hơ̆ geh rlau 90% là làng bol kòn cau dùl ết nă cau ơm kis tàm rlau 2 rơbô thôn, ƀòn. Mờ ù tiah kal ke, bơhiàn ơm kis rah rài, tàm ală dòr bơnơm jơnhoa, den broă yal tơngĭt jơnau yal tus mờ làng bol in sùm là broă kơlôi sơnơng ngan gơwèt mờ ală kwang bàng tàm tiah do dê. Ồng Thào Thái Tâm, ala mat Ủy ƀan Ñân zân xã  Quản Bạ pà gĭt: Tàm ală nam do, broă lơh mblàng yal tàm ù tiah xã Quản Bạ neh geh sền gròi lơh ngan, ngan là gơwèt mờ bơta broă lơh mblàng yal tơn. Gơwèt mờ broă lơh mblàng yal tơn, bol añ tàm pà ală ƀan, ngàñ, mpồl cau pơgồp bal mờ Ủy ƀan Mặt trận xã mblàng yal tơn tus mờ ală thôn, ală hìu bơnhă. Ai gơwèt mờ broă ờ mblàng yal tơn, den là bol añ mblàng yal tàm gah yal tơngĭt jơnau pờ tơlik jơnau đơs bơh xã dê tus mờ ală thôn.

 Broă lơh mblàng yal mùl gŏ ngan tàm ală tiah dê là ngui dà jơnau đơs dà kòn cau tàm ală tiah, jat tàm bơhiàn ơm kis ală tiah dê nàng sac rơwah broă lơh yal tơngĭt, lơh tam gơl bơta gĭt wă ai làng bol kòn cau dùl ết nă cau rƀah kis tàm ală tiah dòr bơnơm jơnhoa. Mơya, nàng ală cau lơh broă lơh mblàng yal geh tơl jơnau yal tơngĭt, geh jơnau tơngĭt di, di tŭ hơ̆ là gơnoar broă, mơkung là kơnòl bơh ală anih lơh broă atbồ tàm tơl kấp bơh càr Hà Giang dê. Ồng Nguyễn Văn Hưng, Phó kwang atbồ Ƀan Tuyên Giáo Tỉñ ủy Hà Giang pà gĭt: Càr Hà Giang gam pơn jat tai bơcri priă dong kờl ai ƀòn lơgar in nàng lơh mbè lơi ai ală broă lơh mblàng yal bơh thôn, ƀòn dùl bă geh cồng nha mờ kung neh geh jơnau dan gơwèt mờ Cíñ phủ, Dà lơgar in pơn jat tai geh bơta sền gròi gơwèt mờ càr Hà Giang in bơcri priă lơh phan bơna bơt bơtàu nàng ai broă lơh mblàng yal jơnau tus tàm thôn, ƀòn kung bè broă lơh yal tơngĭt jơnau yal tus tàm ƀòn lơgar ngai sơlơ geh cồng nha rlau tai.

Nàng bơsong ală bơta kal ke, gơnoar atbồ ală kấp, ngan là ală mpồl lơh broă mblàng yal tàm ù tiah càr Hà Giang dê kung neh ngui jơh ală bơta pràn bè mpồl cau. phan bơna măi mok geh lài, lơh lila uă broă lơh mblàng yal mùl gŏ ngan bơh ală tiah dê mờ ngui jơh ală broă lơh mblàng yal tàm uă gah. Bơdìh mờ hơ̆, dùl broă lơh kung geh càr Hà Giang sền gròi ngan, hơ̆ là pơgồp bal mờ ală mpồl ling phàu crong lơh pôs đồng tàm ù tiah càr dê, ngan là mpồl ling sền gàr tiah nhàr lơgar lơh pôs đồng tàm ală tiah dòr bơnơm jơnhoa tiah nhàr lơgar dê nàng mblàng yal jơnau di pal, mhar ngan mờ di tŭ ngan tus mờ làng bol.