Bă brê hòn is bơh càr Bắc Kạn tŭ do geh mờr 26 rơbô lồ, tơrgùm tàm ală tiah: Brê Dà lơgar Ba Bể, Tiah prăp gàr ù tiah geh is Kim Hỷ mờ Tiah prăp gàr bơta chi che Nam Xuân Lạc. Ală bă brê hòn is geh tàm bơrlŭ bal mờ ală ƀòn bal mờ uă bă brê neh geh ală mpồl atbồ jào nàng ai làng bol in sền gàr mờ khà priă 150 rơbô đong tàm 1 lồ 1 nam. Càr Bắc Kạn kung geh broă dong kờl chi, sơntìl phan ròng, bơto khoa họk kỹ thuật mờ dong kờl tơl ƀòn kis jăt gah brê 40 tơlăk đong tàm 1 nam nàng lơh gùng, rơbàng, hìu chài rơgơi... Mơya, ală khà priă dong kờl do ờ uă ngan tài làng bol kis tàm tiah brê geh sền gàr nền nòn, ờ geh ai mus kơl chi che, phan brê ha là mus brê lơh mìr, gùng lòt gơtìp kal ke den tàng rài kis làng bol gơtìp kal ke ngan. Ồng Phùng Thanh Vinh, Kwang atbồ thôn Khuổi Kẹn, xã Bản Thi, kơnhoàl Chợ Đồn, càr Bắc Kạn, do là dùl ƀòn kis jăt gah brê Prăp gàr bơta chi mờ chi che Nam Xuân Lạc yal: “Tàm do bol añ lòt jơng tŭ lòt sền gròi brê bơh 6 tus 7 kơi sồ tàm tiah tàm gùl Brê prăp gàr. Bol añ tam pà lơh gơs 4 mpồl, tơl mpồl lòt 1 poh. Làng bol lòt sền gròi brê ndrờm bal, làng bol ờ geh ù lơh sa, mìng sền gàr brê. Kung kơ̆p kờñ geh priă uă rơlao nàng lồi nam dờp priă geh tơl nàng blơi phe sa mờ drơng tàm rài kis”.

Ồng Nông Thiêm Du, Kwang atbồ thôn Vằng Khít, xã Lương Thượng, kơnhoàl Na Rì, càr Bắc Kạn kung đơs là: “Mờ khà priă dong kờl 40 tơlăk đong den mờ ƀòn ờ gal làng bol geh cồng nha rơlao, gam ƀòn gal làng bol geh tam pà tơl nă cau geh ờ uă ngan, tài khà priă dong kờl ờ uă. Añ kơ̆p kờñ ală kấp đơng lam lơh wơl, tơnguh khà priă dong kờl bè lơi di pal tài làng bol kis tàm tiah brê, tiah jăt gah brê ndrờm gơtìp kal ke”.

Mờ rơlao 73 rơbô lồ brê rơcang gàr lài, ală nam do càr Bắc Kạn neh lơh jăt broă tơn priă, dong kờl broă jào ròng sền gàr brê ai ală mpồl lơh broă, cau dùl nă să in mờ khà bă brê mờr 59 rơbô lồ tàm ală xã tiah II, tiah III mờ khà 400 rơbô đong tàm 1 lồ 1 nam. Geh uă ngan là 168 rơbô lồ brê hòn is là brê lơh sa, tàm khà do geh uă bă brê neh jào làng bol in atbồ, geh tŭ neh ai sră dờp gơnoar ngui ù brê. Tài geh tờm chi brê hòn is den tàng làng bol ờ gơtùi tam brê lơh sa mờ pal atbồ, sền gàr mờ ờ geh priă bơh tàm ală broă lơh lơi tàm uă nam do. Den tàng, nam lơi tàm tiah do kung gơtìp git nđờ jơ̆t dơ̆ mus kơl chi brê ờ di mờ adăt boh lam nàng tam chi brê.

Tŭ do, càr Bắc Kạn gam lơh sră nàng dong kờl bă brê hòn is lơh jăt broă lơh tŭ do mờ xã tiah I (rềp) là 300 rơbô đong tàm 1 lồ 1 nam, xã tiah II mờ Tiah III (ngài) là 400 rơbô đong tàm 1 lồ 1 nam. Mơya, làng bol dờp sền gàr brê đơs là, khà priă dong kờl do ờ uă ngan pơn drờm mờ bơta pràn geh ai lơh. Bi Nông Văn Quân, cau kis tàm thôn Bản Nhuần, xã Quảng Chu, kơnhoàl Chợ Mới, càr Bắc Kạn đơs là: “Tàm do geh uă làng bol ndrờm geh bơh 3 tus 4 lồ brê, geh sră cih loh brê lơh sa, mơya ờ gơtùi mus kơl tài ờ hoan geh chi dềt hòn is. Mờ tàm do làng bol geh ờ uă sre, mìng kis mờ brê mơ, mìng geh dong kờl bơh 300 tus 400 rơbô đong, bŭ lah tus 500 rơbô đong tơl lồ brê den bol añ kung ờ tơl nàng ngui sa tàm rài kis sơl. Tŭ do, mìng jào bàr brê, di lah geh cau mus kơl den mìng geh bol añ dờp kơnòl”.

Mò Triệu Thị Thu Phương, Kwang atbồ ƀan Zân tộk càr Bắc Kạn kung pà git, gah lơh broă do neh uă dơ̆ dan mờ ală ƀộ, gah lơh broă dà lơgar kung bè Cíñ phủ tơnguh priă dong kờl ai cau dờp sền gàr brê in: “Càr Bắc Kạn geh khà kơl dìng bơh chi brê uă, mơya làng bol ờ hềt gơtùi kis bơh broă sền gàr brê. Hìu atbồ geh 20 lồ brê den dùl nam kung mìng geh di pơgăp 8 tơlăk đong di lah kis tàm xã kal ke. Den tàng geh ală jơnau làng bol tìs mờ adăt boh lam tài gơrềng bơh broă mus kơl chi brê. Càr Bắc Kạn kơ̆p kờñ Cíñ phủ, Ƀộ NN mờ PTNT sền wơl, tơnguh khà priă sền gàr brê ai làng bol in nàng làng bol geh tơmù bơnah lơi gơtìp kal ke”.

Pal geh khà dong kờl di pal nàng gơtùi “kis” bơh broă sền gàr brê ai làng bol càr Bắc Kạn in mờ kung gam là jơnau kơ̆p kờñ bal bơh cau gàr brê tàm uă càr tiah kơh bơnơm gơtìp kal ke tŭ do dê sơl. Bơdìh hơ̆ tai, broă geh tai ală broă dong kờl rài kis lơh broă sa di tŭ, geh cồng nha kung là ală broă lơh kwơ màng nàng làng bol iang nùs ơm kis mờ sền gàr brê.