Ủy ƀan Ñân zân càr Kon Tum pa ring bal rơndap broă lơh dong kờl lơh hìu ơm ai 876 hìu bơnhă rƀah mờ ndrờm bè cau rƀah gam ơm kis tàm 3 kơnhoàl rƀah bơh càr dê in mờ kờp jơh priă dong kờl rlau 32 tơmàn 600 tơlak đông.  Bơh tŭ do tus nam 2025, Kon Tum rơp dong kờl 876 hìu bơnhă rƀah mờ ndrờm bè cau rƀah (uă ngan là hìu bơnhă jơi bơtiàn dùl êt nă cau) lơh hìu ơm.

Bè khà dong kờl, gơ wèt mờ cau geh lơh hìu pa geh dong kờl 44 tơlak đông dùl hìu bơnhă, tàm hơ̆ 40 tơlak đông geh ai bơh kes priă dà lơgar mờ 4 tơlak đông geh ai bơh kes priă kâp kơnhoàl. Cau geh lơh niam wơl hìu ơm den tơl hìu bơnhă geh dong kờl 22 tơlak đông, tàm hơ̆ bơh kes priă dà lơgar dong kờl 20 tơlak đông mờ kes priă kâp kơnhoàl 2 tơlak đông. Càr Kon Tum tơlik jơnau kờñ tus jơh nam 2025 rơp lơh gơs broă dong kờl hìu ơm ai 876 hìu bơnhă rƀah mờ ndrờm bè cau rƀah in. Mìng is tàm nam 2023, càr kờp dŭ lam lơh dong kờl 530 hìu bơnhă rƀah, ndrờm bè cau rƀah lơh hìu ơm, tàm hơ̆ lơh pa 359 nơm hìu mờ lơh niam wơl 171 nơm hìu.