Drim ngai òr (10/01), Mpồl cau gơtìp sơnơm khih tàm rài tam lơh càr Kon Tum pơgồp bal mờ Kông ty kă bro Tơrgùm bal Kon Tum bơyai lơh jào pà 389 pò phan satềp geh khà priă rơlao 146 tơlăk đong ai cau koĕt kơl te là cau gơtìp sơnơm khih tàm rài tam lơh rơcang dơ̆ 3 tàm ală kơnhoàl: Đăk Hà, Kon Rẫy, Ngọc Hồi mờ ƀòn dờng Kon Tum in.

Bal mờ hơ̆, Mpồl cau gơtìp sơnơm khih tàm rài tam lơh càr Kon Tum kung tă Kes priă Cau gơtìp sơnơm khih tàm rài tam lơh rơlao 137 tơlăk đong pà 846 nă cau gơtìp tàm càr do in. lài mờ hơ̆, Kông đoàn Ală tiah lơh sa mờ măi mŏk-Tiah lơh sa càr Kon Tum pơgồp bal mờ Kông đoàn Viên cứk càr bơyai lơh broă “Satềp tơrgùm bal-Nam pa tam klăc bal nam 2023”. Tàm broă lơh, geh 360 nă đoàn viên kông đoàn, cau lơh broă geh rài kis gơtìp kal ke geh pà phan, tơl pò phan geh bơh 500 rơbô tus 1 tơlăk đong.