Nàng lơh geh jơnau kờñ bơ̆t bơtàu Tây Nguyên gơ gơs là tiah lơh sa jak bơh jơh gùt lơgar dê, geh rài lơh sa tơlir, gơ tàm pơdar...bơh nam 2022 tơn, gơnoar ătbồ, làng bol, ală mpồl lơh sa kă bro tàm Tây Nguyên neh mờ gam rơcăng lài uă ngan kơlôi sơnơng mờ lam lơh. Bơh broă lơh broă bơh Cíñ phủ dê, bơta kơ̆p rò bơh ală mpồl lơh sa kă bro dê...pà gŏ Kơrnoăt 23 gam lơh gơlik geh ai Tây Nguyên in tŭ niam bơtàu tơnguh uă. Mờ nàng tŭ niam hơ̆ gơ gơs ngan ngồn, kờñ pal geh bơta hơ pơrgon kơnòl bơh ală kâp ủy Đảng mờ gơnoar ătbồ tiah do dê.

Sơlơ mờr tus ngai sa tềp bơhiàn dà lơgar dê nam Qúy Mão 2023, ală sở, ngàñ tàm càr Dăk Lăk sơlơ lơh mhar rơcăng ai Dơ̆ lơh chờ kơphê Buôn dơ̆ 8 in. Gơwèt mờ Ală mpồl lơh kơphê Buôn Ma Thuột, broă tờm bơh jơh ală broă rơcăng dê là Dơ̆ pơrlòng lơh klài dà kơphê bơkah pơnrơ is Việt Nam, rơ̆p geh bơyai lơh dơ̆ sơnrờp. Jăt ồng Lê Đức Huy, Phó Kwang ătbồ Ală mpồl lơh kơphê Buôn Ma Thuột đơs, ồng gơlơh pin dờn jơh lơm tàm dơ̆ pơrlòng mờr tus rơ̆p geh bơyai lơh geh cồng nha tài bơh ală mpồl neh geh bơta mờng chài mờ bơngă pin dờn bơh ală dơ̆ pơrlòng lơh klài kơphê bơkah pơnrơ is, pơrlòng coh kơphê, geh bơyai lơh sùm bơh nam 2018 tus tŭ do. Ồng Huy đơs nền, ală dơ̆ pơrlòng là anih nhơl bơh ală mpồl lơh kơphê bơkah pơnrơ is Việt Nam dê, pơn jờng broă bơcri priă ai bơta niam bơkah ngan rlau jơh in mơkung là broă bơto pơlam tàp mpồl cau, coă bồ lài ală tŭ niam pa tŭ Tây Nguyên lam lơh Kơrnoăt 23 bơh Ƀộ Cíñ trị dê. Ồng Lê Đức Huy, đơs: Bal mờ cau lơh broă sa den kờñ ală cau chài ngan tàm broă lơh, mờng chài lơh broă, nàng tơnguh bơngă kơphê gar Việt Nam dê gơ gơs là kơphê coh tàm Việt Nam. Tơngai mờr tus rơ̆p gam lơh niam rlau tai là geh ală gùng dà broă lơh krơi is tŭ bơcri priă tàm Buôn Ma Thuột. Den gơwèt mờ anih nhơl do, gơn kơnờm bol he rơ̆p geh ală cau coh kơphê mờng chài tàm broă lơh. Ală bơyô rơ̆p khin cha bơcri priă tàm coh măy, lơh gơlik phan niam bơkah uă tàm Việt Nam mờ tàm Dăk Lăk mờ Buôn Ma Thuột.

Là Kwang ătbồ dờng, Ƀí thư Ci ƀộ dùl mpồl lơh sa kă bro lơh sa bal, mŭt bal tàm jơh ală broă lơh gơlik phan niam bơkah uă kơphê- plai chi, ồng Nguyễn Xuân Lợi, Kwang ătbồ dờng Kông ty Kổ phần bơcri priă bơtàu tơnguh An Thái, càr Dăk Lăk sơlơ sền gròi ngan tus Kơrnoăt 23. Ồng đơs là, jơnau kờñ bơtàu tơnguh lơh sa tơlir, tàm pơdar ai Tây Nguyên in mờ kơrnoăt cih là dipal ngan, mờ ngan să tờm An Thái kung gam bơtàu tơnguh jăt gùng dà do sơl, mờ hìu măy lơh ƀòk kơphê 40 rbô tấn dùl nam; jơh ală nsồp kơphê tơnơ̆ tŭ lơh gơh gơs ƀòk ndrờm geh ngui nàng lơh gơlik phơng sih niam ngan. Bulah bè hơ̆, nàng geh dùl rài lơh sa tơlir, tàm pơdar ai jơh gùt Tây Nguyên in den geh dùl pah gời dờng ngan kờñ pal ndơl bềng, ồng Lợi đơs là, kờñ bơta dùl nùs bal bơh jơh bal gơnoar ătbồ, làng bol mờ mpồl lơh sa kă bro dê. Ồng Nguyễn Xuân Lợi, đơs: Do là tŭ niam ngan. Bè đah ală mpồl lơh sa kă bro den bol he pal kơlôi sơnơng là, Kơrnoăt hơ̆ geh bơta geh kwơ ngan, geh bơta lơi tàm tơngai lơyah tơngai, bơta lơi tàm tơngai jŏ tơngai mờ tàm pơndrờm dipal mờ kơrnoăt hơ̆ bè mpồl lơh sa kă bro bơh he dê, he geh bơta lơi gơtùi ngui geh tơn den să tờm mpồl lơh sa kă bro pal gĭt geh ală bơta ƀươn, bơta kal ke mờ tŭ niam, bơta lòng tŭ ală mpồl lơh sa kă bro Tây Nguyên lơh jăt Kơrnoăt 23 do. Pal kờñ tus gơnoar broă ătbồ dà lơgar lơh gơlik geh dùl gùng dà broă lơh dipal, niam bơnĕ nàng dong ală mpồl lơh sa kă bro in tơrmù ƀà bơta gơkòl.

Nam 2023, nam sơnrờp ală càr tàm Tây Nguyên lam lơh jăt Kơrnoăt 23 bơh Ƀộ Cíñ trị dê, geh lơh bơnàng jă lơh sa mpồl bơtiàn ƀươn ƀoài ngan, tŭ khà gơguh lơh sa bơh ală càr dê geh bơh 7,6 tus rlau 12%, jơnhoa rlau uă ngan pơndrờm mờ khà bơh 7 tus 7,5% mờ Kơrnoăt 23 sồr lơh geh ai tơngai tus nam 2030 in. Bulah bè hơ̆, ală càr Tây Nguyên kung mpờl gŏ uă bơta ờ pràn. Mờ gơwèt mờ càr Lâm Đồng tơn, do là càr lơh geh khà gơguh lơh sa rlau 12%, jơnhoa ngan rlau jơh Tây Nguyên den ală bơta ờ pràn kung gam loh làng ngan, ngan là tàm jơnau sồr lơh đơng lam mờ lơh tam gơl wơl sră pơ àr dà lơgar dê. Jăt ồng Trần Đức Quận, Ƀí thư Tỉñ ủy, Củ tịc Hội đồng Ñân zân càr Lâm Đồng đơs, ală bơta ờ pràn bơh càr dê neh geh sùm tàm uă nam do. Dilah ờ gờñ bơsong, Lâm Đồng kal ke ngan lơh jăt niam jơh ală kơnòl broă dờng neh cih tàm Kơrnoăt 23. Ồng Trần Đức Quận, đơs: Yal lài rơ̆p gam uă ngan kal ke, bơta lòng kung bè ală bơta gơkòl, ờ hềt niam tàm tơl gah, tơl broă, ngan là ală bơta ờ hềt niam tàm broă đơng lam, sồr lơh, ătbồ bơh bàr pe ngàñ, ƀòn lơgar dê neh gơ dŏ jŏ jòng uă nam. Gơrềng ờ dùl êt tus lơh jăt kơnòl broă bơtàu tơnguh lơh sa- mpồl bơtiàn càr dê kung bè broă lơh sa kă bro, rài kis làng bol dê. Hơ̆ là bơta gơkòl, bơta ờ pràn mờ bol he pal song dơ pă sền swì, đơs wơl dùl bă dipal, tơl làm mờ ai geh ală jơnau bơsram mờng chài nàng pơn jăt tai lơh jăt kơnòl broă tàm nam 2023.

Nàng lơh jăt Kơrnoăt 23 bơh Ƀộ Cíñ trị dê, bơtàu tơnguh Tây Nguyên mhar mờ kơ̆ kơl jăp, bơnĕ bơnài jơh bal lơh broă sa sươn sre, brê bơnơm, năng lượng, nhơl chờ, lơh sa mờ măy mok, Cíñ phủ neh yal bơcri priă 9 rơndăp broă lơh gùng lòt dờng. Bal mờ ală rơndăp broă lơh neh geh kĭ bơh lài, Tây Nguyên geh 11 rơndăp broă lơh gùng lòt tàm tơrbŏ tàm dơlam is kơnhoàl mờ tàm tơrbŏ mờ ală kơnhoàl, kờp jơh priă bơcri pơgăp 180 rbô tơmàn đong. Do là bơnàng jă kwơmàng, là tŭ niam dờng ai Tây Nguyên in mơya kung là ală bơta lòng dờng, tài bơh gam geh uă ir rơndăp broă lơh bơcri priă dà lơgar tàm Tây Nguyên gơtìp tơnguh priă, lơyài tơngai lơh gơs halà ờ lơh geh cồng nha. Ngan den tàng bè hơ̆, jăt ồng Lê Đình Trung, Ƀí thư Tỉñ ủy Dăk Lăk dê đơs, nàng Kơrnoăt 23 ngan ngồn gơ gơs là bơta gơn kơnờm bơtàu tơnguh ai tŭ tơngai tus in, càr hơ tơnguh uă kơnòl, hơ pơgồp bal niam mờ ală ƀộ, ngàñ, ală tiah. Ồng Lê Đình Trung, Ƀí thư Tỉñ ủy Dăk Lăk, đơs: Càr Dăk Lăk hơ tơnguh uă rlau tai nùs nhơm geh kơnòl, lơh geh bơta ring bal tàm tŭ lam lơh jăt; gĭt nền loh làng kơnòl bơh tơl anih lơh broă, tơl tiah, tơl mpồl cau dê tàm tŭ lam lơh jăt. Rơcăng lài kràñ cê jơh nùs tàm tŭ lam lơh jăt ală kơnòl broă bơh tiah he dê. Càr rơ̆p kơlôi sơnơng jrô ơnàng, lơh gơlik bơta ring bal uă tàm ală kâp ală ngàñ bè jơnau sồr jal mhar tàm tŭ lơh pràn lơh broă lơh bal tàm tơrbŏ bal ală kơnhoàl ù tiah lơh gơlik geh ù tiah ring bal bơsong ală bơta gơkòl, tơnguh uă bơta tơl pràn tàm pơrlòng, ngui niam ngan rlau jơh bơta pràn bơta geh.

Sơnam pa 2023 tus mờ Tây Nguyên bal mờ Kơrnoăt 23, dùl Kơrnoăt jàu tŭ niam dờng mơya kung gơ tơlik ai Tây Nguyên in uă kơnòl broă dờng mờ kal ke. Nàng lơh gơs ală kơnòl broă dờng hơ̆, kờñ ngan tus ală jơnau hơ pơrgon kơnòl bơh ală kâp ủy, mpồl đảng- gơnoar ătbồ ală càr Tây Nguyên dê bal mờ bơta tơrgùm bal pràn dùl nùs bal bơh làng bol mờ jơh ală mpồl lơh sa kă bro dê. Tơnguh uă kơnòl, di tŭ tă bơsong ală bơta gơkòl, bơta kơryan, mờ bơta pràn tàm dơlam is bơh he dê, bal mờ bơta bơcri priă dờng bơh Cíñ phủ dê, Tây Nguyên geh gơn kơnờm geh bơ̆t bơtàu gơs tiah bơtàu tơnguh jak bơh jơh gùt lơgar dê, di mờ jơnau kờñ mờ Kơrnoăt neh cih.