Gĭt wă jrô jơnau bơto sồr bơh Wa Hồ dê, ală nam do, ồng K’Boer, là Đảng viên, Ƀí thư Ci ƀộ thon B’Dơr, xã Lộc An, kơnhoàl Bảo Lâm, càr Lâm Đồng neh lơh jăt niam ngan gơnoar broă lam lài, lơh krơh, khin kơlôi, khin lơh, khin kong kơnòl, pơgồp bơnah bơ̆t bơtàu ƀòn lơgar bơtàu tơnguh mờ gơ gơs là anih pơnrơ àng, tiah làng bol ơm kis lơh krơh lài bơh càr Lâm Đồng dê.

Mŭt Đảng bơh tŭ 26 sơnam, lơh Ƀí thư Ci ƀộ thôn bơh tŭ 30 sơnam mờ bơh tŭ hơ̆ tus tŭ do, ồng K’Boer, Ƀí thư Ci ƀộ thôn B’Dơr, xã Lộc An, kơnhoàl Bảo Lâm, càr Lâm Đồng kung gam ơm rềp mờ làng bol, đềt mềr mờ làng bol. Ồng neh bal mờ ală oh mi tàm ci bộ mờ làng bol tàm thôn jơh nùs tam gơl rơndăp tăp sèng chi tam, phan ròng, bơtàu tơnguh lơh sa, bơ̆t bơtàu rài kis niam chài. Jăt ồng K’Đèo, là cau geh bơngă pin dờn tàm thôn B’Dơr dê yal, tus tŭ do, rài kis niam chài nùs nhơm bơh làng bol tàm thôn dê geh bơtàu tơnguh tai loh làng ngan. Ală jơnau hơ pơrgon ƀòn lơgar dê, jơnau pal jăt bơ̆t bơtàu rài kis pa, tiah làng bol ơm kis lam lài lơh krơh geh làng bol ƀòn lơgar dùl nùs bal lơh jăt mờ jơh nùs ngan tus bal bơ̆t bơtàu. Ồng K’Đèo đơs là, tam gơl do geh bơta tă pơgồp bơta pràn uă ngan bơh ồng K’Boer, Ƀí thư Ci ƀộ thôn B’Dơr dê: Sền gŏ geh bơta àng, bơta bơtàu tơnguh ƀòn lơgar dê den chờ hờp ngan. Kung kơnờm bơh bơta sền gròi sồr lơh bơh kâp xã dê, mờ ngan là bi K’Boer, Ƀí thư Ci ƀộ thôn, sơnam kơnòm să bè hơ̆ mơya neh geh bơta pràn jak niam bè hơ̆...bol añ dùl nùs bal ngan.

Gơwèt mờ ală đảng viên tàm Ci ƀộ thôn, ồng K’Boer kung là Ƀí thư sùm jơh nùs jơh tồr ngan tàm broă lơh mờ geh uă jơnau kơlôi lơh. Mò Ka Thủy là dùl nă Đảng viên tàm Ci ƀộ pà gĭt, tàm ală dơ̆ pơrjum Đảng, ồng K’Boer sùm jà tai kwang bàng thôn, ƀòn, cau kwang ƀòn, kra ƀòn, cau geh bơngă pin dờn tàm ƀòn lơgar nàng tus bal pơrjum, cribơyai bal yal tơngĭt bal jơnau, bơyai jòi gùng dà bơsong ală broă kờñ ngan, jal mhar ngan, bơh hơ̆ lơh gơlik geh bơta ring bal uă mờ tŭ ai lơh jăt den lơh geh cồng nha ngan ngồn. Mùl màl, pal kờp tus broă hòi jà làng bol pà ù, tă pơgồp ngai lơh broă, priă jền, phan bơna bal mờ Dà lơgar bơ̆t bơtàu lơh gơs 20 kơi sồ gùng lòt ală thôn, rlau 15 kơi sồ gùng lòt tus sươn sre. Mò K’Thủy, yal: Ồng K’Boer là dùl nă Ƀí thư Ci ƀộ, là cau Đảng viên sùm lam lài, tŭ lơi kung rơcăng să tờm tơn lòt tìp làng bol nàng mblàng yal, hòi jà ai làng bol in wă wờng. Sùm tus bal tă pơgồp uă jơnau đơs nàng bơ̆t bơtàu, ai Ci ƀộ bơtàu tơnguh rlau tai.

Thôn B’Dơr geh rlau 98% làng bol ơm kis là cau K’Ho. Lài do, bơdìh mờ broă lơh sa sươn sre gam ờ hềt jak chài ngan, uă bơta pin dờn, broă lơh gam bơngơl gơla gam geh ngui tàm rài kis, broă lơh sa kal ke. Tŭ do, bồ tơngoh kơlôi sơnơng tam phan bơh làng bol dê neh geh bơta tam gơl uă, lơh sa geh cồng nha bal mờ ală sơntìl cê, kơphê pa pràn, tam bơrlŭ bal mờ ală bơta chi sa plai bè ƀơ, sầu riêng...Kơnờm bơh hơ̆, priă lơh geh tàm dùl bă ù bal neh geh lơh kờp bal rlau 150 tơlak đong/ dùl lồ/ dùl nam, khà hìu bơnhă rƀah bơh 30% tŭ do mìng gam hơđơm 2%. Jăt mò Trịnh Thị Vân, Phó Ƀí thư Đảng ủy xã Lộc An yal, ồng K’Boer là dùl nă Ƀí thư Ci ƀộ pơnrơ ngan tàm broă bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê. Mờ gơnoar broă Ƀí thư Ci ƀộ, să tờm ồng sùm lơh ngan pơđơl pràn là anih tờm tam klăc, lơh krơh lơh jăt mờ lơh gơs jơh ală kơnòl broă geh jàu. Mò Trịnh Thị Vân, Phó Ƀí thư Đảng ủy xã Lộc An, yal: Ồng K’Boer là kwang bàng tàm Đảng ủy xã, Ƀí thư Ci ƀộ thôn B’Dơr, là dùl nă cau jơh nùs jơh tồr ngan, tơryăng tơryồng, ngăc ngar, khin kơlôi, khin đơs, khin lơh mờ khin ngan kong kơnòl. Tơnguh uă gơnoar broă đơng lam, sồr lơh, làng bol tàm thôn lơh jăt niam jơh ală gùng dà, broă lơh, jơnau sồr bơh Đảng dê, adat boh lam bơh Dà lơgar dê mờ ală jơnau sồr bơh ƀòn lơgar dê. Kis niam tàm rài kis lơh àng sơrdah jơnau Yàng.

Thôn B’Dơr tŭ do geh mờr 500 hìu bơnhă, rlau 2 rbô nă làng bol. Làng bol tàm thôn sùm lơh jăt niam gùng dà broă lơh, jơnau sồr bơh Đảng dê, jơnau cih bơh adat boh lam bơh Dà lơgar dê, khin cha bơcri priă bơtàu tơnguh lơh sa, jơh nùs tàm sơm băt tê bal bơ̆t bơtàu ƀòn lơgar pa. Nam 2021, thôn B’Dơr geh dờp là Tiah làng bol ơm kis pơnrơ ngan bơh xã Lộc An dê mờ tŭ do là thôn pơnrơ ngan geh uă broă lơh jak, broă lơh geh cồng nha bơh mpồl cau mờ cau dùl nă să is dê.

Ồng K’Boer, Ƀí thư Ci ƀộ thôn B’Dơr pà gĭt, mờ kơnòl broă bơh să tờm he dê, ồng rơ̆p gam pơn jăt tai pơđơl pràn lơh ngan uă rlau tai, bơsram tàp uă rlau tai nàng rơcăng tă pơgồp jơnau đơs, tă pơgồp ai bơta bơtàu tơnguh bơh ƀòn lơgar he dê in. Ồng K’Boer, đơs: Añ sền gròi ngan rlau jơh bè broă lơh sa, lơh bè lơi nàng ai làng bol ƀòn lơgar he dê in gơmù geh hìu bơnhă rƀah, tơnguh hìu bơnhă pas mờ tơl ngui tơl sa. Jơnau hơ̆ gơ sồr bol añ pal geh ală kơrnoăt dipal mờ bơta geh ngan bơh tiah he dê.

Mờ bơta lơh ngan tàm broă lơh bơ̆t bơtàu ală anih lơh broă cíñ trị kơnă hơđơm, tă pơgồp jơh nùs jơh pràn ai broă lơh bơtàu tơnguh bơh ƀòn lơgar dê in, ồng K’Boer neh geh uă nam sùm geh dờp Sră jờng rơ bơh Mpồl đơng lam tiah Tây Nguyên dê bè cồng nha lơh geh jak ngan tàm broă lơh bơ̆t bơtàu Đảng. Ồng K’Boer gam chờ hờp ngan geh Củ tịc Ủy ƀan Ñân zân càr Lâm Đồng pà Sră jờng rơ tài bơh neh geh cồng nha jak ngan tàm broă bơsram mờ lơh jăt bồ tơngoh, nùs nhơm, broă lơh mờ rài kis Hồ Chí Minh dê tơngai bơh nam 2016- 2022.