Bơh tàm ală ngai bồ nam 2023 tơn, Ủy ƀan Jơi bơtiàn kòn cau neh bơyai lơh Pỏjum gùt lơgar tơn jơh broă lơh jơi bơtiàn nam 2022; sền wơl 1 nam lơh jat Broă lơh Jơnau kờñ Dà lơgar bơtàu tơnguh lơh sa- mpồl bơtiàn tiah làng bol kòn cau mờ tiah kơh bơnơm tơngai bơh nam 2021-2030 mờ lam lơh kơnòl broă nam 2023. Kơnờm bơta đơng lam kràñ cê jơh nùs bơh Cíñ phủ, mờ bơta pơnđơl pràn lơh ngan bơh làng bol ală jơi bơtiàn kòn cau dê tàm broă lam lơh jat dùl ròt bal ală broă lơh jơi bơtiàn kòn cau, broă lơh sền gàr niam rài kis mpồl bơtiàn den rài kis làng bol ală jơi bơtiàn kòn cau dùl ết nă cau sền bal bè ờs mờ ngai sơlơ geh tam gơl pa. Nam 2022, khà hìu bơnhă rƀah tàm tiah làng bol kòn cau dùl ết nă cau gơmù rlau 3% dùl nam. Ƀộ trưởng, Củ ñiệm Ủy ƀan Jơi bơtiàn kòn cau ồng Hầu A Lềnh pà gĭt, tus nam 2023, broă kwơ màng ngan là lam lơh jat ală rơndap broă lơh tàm Broă lơh Jơnau kờñ Dà lơgar mờ bơnah priă tă dờng ngan bơh nam 2022 dê ai mờ broă rơndap lơh bơh nam 2023.

Jăt jơnau yal bơh Ủy ƀan Mặt trận Dà lơgar kơnhoàl Lâm Hà, càr Lâm Đồng dê, 5 nam do Dà lơgar neh bơcri priă rơlao 45 tơmàn đong bơh uă khà priă ai tiah làng bol kòn cau tàm kơnhoàl in. Tàm hơ̆, geh gŏ uă ngan là priă dong kờl lơh hìu ơm mờ ai geh broă lơh sa ai làng bol in tơnguh bơtàu. Kwơ màng, tàm broă dong kờl priă lơh sa, gơnoar atbồ bal mờ gah lơh broă geh gơnoar neh dong kờl làng bol lơh broă sa tơnguh bơtàu broă tam tờm jơu ròng tu. Tŭ do, Lâm Hà là kơnhoàl geh bă ù tam tờm jơu ròng tu uă ngan tàm càr Lâm Đồng mờ rơlao 3 rơbô 620 lồ ù. Ồng K’ Tân, Phó Củ tịc Ủy ƀan Mặt trận Dà lơgar Việt Nam kơnhoàl Lâm Hà đơs: “Lài do Đảng Dà lơgar kung neh sền gròi uă, mờ tŭ do den sền gròi uă rơlao. Mùl màl bè dong kờl cau rơƀah lơh hìu ơm, dong kờl rài kis broă lơh sa. Hơ̆ là dong kờl priă tam tờm jơu ròng tu, tơl hìu geh 20 tơlăk đong ha là 50 tơlăk đong. Ha là dong kờl mờ broă lơh hìu ơm pa ai cau rơƀah, gơtìp kal ke bè hìu ơm in, tơl nơm hìu geh dong kờl 50 tơlăk đong. Hìu nhă tă tai bơh 10 tus 20 tơlăk đong nàng lơh hìu ơm kơl jăp. Mặt trận Dà lơgar Việt Nam kơnhoàl Lâm Hà bol añ lơh jăt gơnoar jăt sền, yal wơl jơnau jăt sền kwang bàng tàm tàm broă dong kờl làng bol tơnguh bơtàu lơh sa, brồ guh lơh pas”.

Kơnhoàl Lạc Dương, càr Lâm Đồng geh mờr 70% khà kờp làng bol là làng bol kòn cau. Kơnờm lơh jat niam geh cồng nha ală rơndap broă lơh bơcri priă bơh broă lơh jơnau kờñ Dà lơgar, lơh ngan tam gơl rơndap tap sèng phan tam, ai bơta jak chài pa, măy mok pa tàm broă lơh sa suơn sre jat gùng dà kông nghệ kao den khà tơrmù rƀah mhar. Jat ồng Cill Poh, Phó Củ tịc Ủy ƀan Ñân zân kơnhoàl Lạc Dương pà gĭt, bulah 2 nam do gơrềng bơh kòp Kovid-19 mơya ală phan bơna lơh geh bơh broă lơh sa suơn sre bè tờm lơh sơnơm Atisô, bơkào, biăp ală bơta mờ kơphê... geh drà tăc bro bè ờs đau, giă tăc gơguh uă den rài kis làng bol dê neh tam gơl uă rlau; khà hìu bơnhă rƀah kơnhoàl dê gơmù bơh 8,6% gam 5,8%, sơr lèt broă jàu pơndrờm mờ broă rơndap lơh geh ai. Ồng Cill Poh, đơs: Tàm broă lơh nam pa do den làng bol bol añ neh gĭt lơh sa suơn sre kông nghệ kao, bè tam biăp, bơkào tàm hìu krơh, hìu jàl, den lơh sa hìu bơnhă bơtàu tơnguh đau. Bè bơt bơtàu ƀòn lơgar pa den jơh ală xã, thị trấn bơh kơnhoàl dê ndrờm neh lơh sir, sền gàr lơngap lơngai geh gàr niam. Làng bol gĭt wă uă ngan mờ gĭt broă lơh sa, gĭt pơnđơl pràn lơh is bơcri priă bơtàu tơnguh lơh sa hìu bơnhă. Kơnờm bơh hơ̆ broă jàu tơrmù rƀah neh lơh geh niam ngan pơndrờm mờ broă jàu geh ai.