Bal mờ ală kwang bàng Mpồl đơng lam ling klàng ƀòn dờng Sơn La tus còp hìu bơnhă oh Chiêu Thanh Trúc, kòn cau Thái, kơnòm bơsram ơdŭ 5 ơm tàm ƀòn Nà Ngùa, gơwèt mpồl 2, sơnah ƀòn Chiềng An, ƀòn dờng Sơn La, càr Sơn La. Hìu bơnhă oh Trúc là hìu bơnhă rƀah, mè bèp ờ geh broă lơh sùm. Rlau mờ hơ̆, bèp oh Trúc dê, gam gơtìp kòp kơn jơ̆, pal sùm lòt sơm kòp, den hìu bơnhă sơlơ kal ke rlau tai.

Gĭt rài kis kal ke bơh oh Trúc dê, Mpồl đơng lam ling klàng ƀòn dờng Sơn La neh tus tìp cau tàm hìu bơnhă oh dê; mơkung tìp mpồl Kwang atbồ Hìu bơsram kấp dùl Lò Văn Giá- tiah oh Trúc gam bơsram sră dờp ròng mờ dong kờl oh geh tơl ală bơta nàng lòt bơsram. Ờ lơh muăt jrùm nùs nhơm mè bèp, cau pơgru mờ mpồl kwang bàng, cau ling Mpồl đơng lam ling klàng ƀòn dờng dê, ală nam do, Trúc sùm lơh geh kơnòm bơsram jak ngan mờ Sau gơlòng sồr Bác Hồ dê. Oh Chiêu Thanh Trúc đơs: Geh bơta dong kờl bơh ală wa ling dê, kòn gơ lơh chờ mờ dong kờl bơnah lơi hơ̆ ai mè bèp in, kòn rơ̆p pơnđơl pràn lơh ngan nàng bơsram sră jak ngan, lơh geh cồng nha jak ngan nàng ờ lơh muăt jrùm nùs nhơm bơh ală wa mờ ală cau pơgru tàm hìu bơsram dê.

 Lam lơh broă lơh “Dong kờl oh lòt bơsram” tus tŭ do, Mpồl đơng lam ling klàng ƀòn dờng Sơn La neh dờp ròng 5 nă kơnòm bơsram geh rài kis kal ke bơh hìu bơsram kấp dùl Lò Văn Giá, ƀòn dờng Sơn La dê mờ khà priă dong kờl 250 rơbô đong dùl nhai dùl nă oh tàm 5 nam sùm. Bơdìh hơ̆, gam dong kờl blơi phan ngui bơsram sră ai ală kơnòm in pah dơ̆ mŭt tàm nam bơsram pa.

Trung tá Khuất Minh Tuấn, Cíñ trị viên phó, Mpồl đơng lam ling klàng ƀòn dờng Sơn La pà gĭt: Khà priă dong kờl ờ uă, mơya do là phan pà bơh mpồl kwang bàng, cau ling tàm mpồl ling dê kơ̆p kờñ geh tă pơgồp tàm broă dong kờl ală kơnòm dềt ờ bơtoah tàm gùng bơsram sră, gơ gơs làng bol geh kwơ ai ƀòn lơgar, dà lơgar in. Trung tá Khuất Minh Tuấn, đơs: Tàm tơngai tus, Đảng ủy, Mpồl đơng lam mpồl ling klàng ƀòn dờng bol añ sền gĭt là pơn jat tai bơsram lơh jat geh cồng nha ală gùng dà broă lơh bơh Đảng mờ Dà lơgar, lơh ngan ngồn mờ Nghị quyết kwang đơng lam bồ bơh mpồl lơh broă; lơh ngan mblàng yal tơnguh uă bơta gĭt wă ai kwang bàng, cau ling tàm mpồl ling bè jơnau kờñ, bơta kwơ nùs nhơm niam kòn bơnus bơh broă lơh do dê; mơkung pơgồp bal niam mờ kấp ủy, gơnoar atbồ ală tiah kờp sền wơl, lòt sền tơl nă cau, sền gĭt cau ngan ngồn, bơh hơ̆ geh ală broă lơh pơndờm pơnđiang, dong kờl di tŭ gơ wèt mờ ală kơnòm geh rài kis kal ke.

Bơh broă dờp ròng siam ală kơnòm bơsram geh rài kis kal ke bơh Mpồl đơng lam ling klàng ƀòn dờng dê, uă mpồl ling, mpồl cau, cau dùl nă să is tàm ù tiah ƀòn dờng Sơn La kung neh dờp ròng siam mờ dong kờl, jơm glòm “ală nha ờ hềt niam”. Tus tŭ do, kờp jơh neh geh rlau 110 nă kơnòm bơsram geh rài kis kal ke tàm ù tiah geh dờp dong kờl tàm broă bơsram sră, bơsram tàp. Ồng Hà Trung Chiến, Ƀí thư Thàñ ủy Sơn La pà gĭt: Mờ bơta lam lài tàm uă gah broă tàm rài kis, ngan là broă lơh sền gàr rài kis mpồl bơtiàn, tơl nă kwang bàng, cau ling Mpồl đơng lam ling klàng ƀòn dờng Sơn La neh mờ gam lơh jat niam ngan gơnoar broă, kơnòl broă gơwèt mờ rài kis mpồl bơtiàn, di pal mờ bơta pin dờn, kờñ gơboh bơh làng bol kòn cau ƀòn dờng Sơn La dê.

Ồng Hà Trung Chiến, đơs: Ƀan Thường vụ Thàñ ủy jờng rơ uă ngan  nùs nhơm sac rơwah broă lơh mờ broă lơh bơh Mpồl đơng lam ling klàng ƀòn dờng dê, broă lơh do ờ mìng dong ai ală hìu bơnhă, ală kơnòm bơsram geh rài kis kal ke ngan geh ală bơta niam rlau tàm rài kis, geh ală bơta niam rlau geh lòt bơsram lơm mờ gam cèng nùs nhơm niam bơnĕ jrô nàng, lơh gơrề uă tàm jơh ală anih lơh broă cíñ trị nàng ală anih lơh broă, mpồl lơh broă ndai dùl nùs bal nàng lơh niam ngan broă lơh sền gàr rài kis mpồl bơtiàn tàm ù tiah do dê.

“Lòt bal lơh broă sền gàr rài kis mpồl bơtiàn mờ lơh geh bơta dong kờl ai kơnòm in lòt bơsram” ờ mìng là srơh halà broă lơh, mờ neh gơ gơs broă lơh ngan ngồn, geh ngan tàm Mpồl đơng lam ling klàng ƀòn dờng Sơn La dê, lơh niam rlau tai rùp hin niam bơnĕ bè cau ling wa Hồ dê.

Do kung là tơngume kơ̆ kơljap nàng Mpồl đơng lam ling klàng ƀòn dờng in pơnđơl pràn lơh ngan bơt bơtàu “Mpồl ling chài hòi jà làng bol” pơn jat tai lơh kơ̆ kơljap nùs nhơm pin dờn tàm làng bol, lơh niam rlau tai bơta pràn tơrgùm bal bơh làng bol dê tàm broă lơh jat ală kơnòl broă cíñ trị mờ tơnguh uă bơta niam lơh broă sền gàr dà lơgar, mpồl ling klàng ală tiah; pơgồp bơnah bơt bơtàu ƀòn dờng Sơn La bơtàu tơnguh tơlir, mhar, kơ̆ kơljap, pa mờ ngăc ngar.